ગુજરાતમાં સ્થાનિક સ્વરાજ્યની ચૂંટણીમાં નેતાઓ પોતાના પરિવારજનો માટે ટિકિટ લોબિંગમાં લાગી ગયા છે.
ગુજરાતમાં સ્થાનિક સ્વરાજ્યની ચૂંટણીને લઈ રાજકીય પાર્ટીઓ એક્શનમાં આવી ચૂકી છે. તો બીજી તરફ બંને પાર્ટીના વર્તમાન અને ભૂતપૂર્વ નેતાઓ પોતાના પરિવારજનો માટે ટિકિટની વ્યવસ્થામાં લાગી ગયા છે. તો કોંગ્રેસ પાર્ટીએ આ વખતની સ્થાનિક સ્વરાજની ચૂંટણીમાં કેન્દ્રીય નેતાઓને જવાબદારી સોંપી છે.
ગુજરાતના પ્રવાસે તામ્રધ્વજ સાહૂ
સ્થાનિક ચૂંટણીમાં કોંગ્રેસ માટે નિરીક્ષક બનેલા તામ્રધ્વજ સાહૂ ગુજરાતના 2 દિવસના પ્રવાસે છે. કોંગ્રેસ નિરીક્ષક તામ્રધ્વજ સાહૂનું ગુજરાત એરપોર્ટ પર ભવ્ય સ્વાગત કરાયું હતું. તામ્રધ્વજ સાહુ છત્તીસગઢના ગૃહમંત્રી છે. ત્યારે ગુજરાતમાં તેમણે પોતાના રાજ્યના વિકાસ મોડલની વાતનું ઉદાહરણ પણ આપ્યું હતું. તામ્રધ્વજ સાહૂએ જણાવ્યું કે, દેશમાં મોંઘવારી વધી પણ છત્તીસગઢમાં નહીં, છત્તીસગઢમાં ખેડૂતોને અમે સારી સહાય આપી રહ્યા છીએ. અને સોનિયા ગાંધીએ મને વિશેષ જવાબદારી સોંપી છે.
પૂર્વ MLA કાંતિ લકુમની પત્ની માટે દોડાદોડી
અમદાવાદ જિલ્લા પંચાયત પ્રમુખ માટે સ્ત્રી અનામત બેઠક માટે લોબિંગની કામગીરી શરૂ થઈ ચૂકી છે. સ્ત્રી અનામત બેઠક માટે ભાજપનાં કેટલાક નેતાઓ દ્વારા લોબિંગ શરૂ કરી દેવાયું છે. પૂર્વ MLA કાંતિ લકુમે તેમની પત્નીના નામનું લોબિંગ શરૂ કરી દીધુ છે. કવિઠાની સ્ત્રી અનામત બેઠક પરથી ચૂંટણી લડવા લોબિંગ ચાલી રહ્યું છે. જો કે, પૂર્વ MLA કાંતિ લકુમના પત્નીના રાજકિય ભૂતકાળ વિશે જોઈએ તો, રેખાબેન લકુમ જિલ્લા પંચાયતમાં 2015માં ચૂંટાયા હતા. બદરખા બેઠક પરથી રેખાબેન લકુમ ચૂંટાયા હતા.
તો આ સાથે પૂર્વ મહિલા બાળ વિકાસના ચેરમેન સુશીલાબેન વણીયા નામનું પણ લોબિંગ શરૂ થઈ રહ્યું છે. સુશીલાબેનના નામ માટે તેમના પતિ બળદેવ વાણીયાએ લોબિંગ શરૂ કરી દીધુ છે. સુશીલાબેન માટે સ્ત્રી અનામતની કૌકા બેઠક પરથી ચૂંટણી લડાવવાના પ્રયાસો તેજ બની ગયા છે. સુશીલાબેન વાણીયા 2010માં સાથળ ગામ સીટ પરથી ચૂંટણી લડ્યા હતા.
સ્થાનિક સ્વરાજની ચૂંટણીમાં કોળી સક્રિય
રાજકોટ મહાનગર પાલિકાની ચૂંટણી મામલે કોળી સમાજ સક્રિય બની ગયો છે. કોળી સમાજે ભાજપના અગ્રણીઓ પાસે ટિકિટની માગણી કરી છે. ભાજપ ચૂંટણીમાં 10 ટિકિટ કોળી સમાજને આપે તેવી માગ થઈ રહી છે. સાથે આ સમાજના મેયર અને ડે.મેયર જેવા પદ પર પ્રતિનિધિત્વ થાય તેવી પણ માગ થઈ રહી છે.