31 જિલ્લા પંચાયત, 231 તાલુકા પંચાયત અને 81 નગરપાલિકાની ચૂંટણીના પરિણામો આવી રહ્યા છે ત્યારે ગીર સોમનાથનાં સુત્રાપાડા તાલુકા પંચાયતની લોઢવા બેઠક પર ભાજપના ઉમેદવારનો એક મતથી વિજય થયો હતો.
સ્થાનિક સ્વરાજની ચૂંટણીના જાહેર થયા પરિણામ
સુત્રાપાડાની લોઢવા બેઠક પરથી ભાજપનો ઉમેદવાર 1 મતથી જીત્યો
કોંગ્રેસના સમર્થકોમાં નિરાશા
પ્રાપ્ત થતી જાણકારી પ્રમાણે, ગીર સોમનાથનાં સુત્રાપાડા તાલુકા પંચાયતની લોઢવા બેઠક પર ભાજપના ઉમેદવાર રામભાઇ વાઢેરનો માત્ર એક જ મતથી વિજય થયો છે.
કોંગ્રેસનો ઉમેદવાર 1 મતથી હાર્યો
સામે પક્ષે કૉંગ્રેસના ઉમેદવારનો એક જ વોટથી પરાજય થતાં સમર્થકો નિરાશ થયાં હતા. જણાવી દઇએ કે, ગીર સોમનાથ જિલ્લા પંચાયતમાં 28 બેઠક પર 63.64 ટકા મતદાન નોંધાયું છે.
સવારે 9 વાગે શરૂ થઈ મત ગણતરી
આજે સ્થાનિક સ્વરાજ ચૂંટણીના મહાપરિણામ સામે આવી રહ્યા છે. સવારે 9 વાગ્યાથી મતોની ગણતરી શરૂ થઈ છે. જેમાં 81 નગરપાલિકાઓની 2720 બેઠક, 31 જિલ્લા પંચાયતોની 980 બેઠક અને 231 તાલુકા પંચાયતની 4774 બેઠકોની મતગણતરી થશે. 25 જિલ્લાની અને 117 તાલુકાની જ્યારે નગરપાલિકાઓની 95 બેઠકો બિનહરીફ થઇ છે. રાજ્યની કુલ 8474 બેઠકો પર 22,200થી વધુ ઉમેદવારોના ભાવીનો આજે ફેંસલો થશે. આ ચૂંટણીમાં BJP, Congress, AAP, BSP અને AIMIM સહિતના પક્ષ મેદાનમાં છે. ત્યારે આજે ચૂસ્ત પોલીસ બંદોબસ્ત વચ્ચે મતગણતરી યોજાઇ રહી છે.
કોવિડ ગાઈડલાઈનના પાલન સાથે વ્યવસ્થા કરાઈ છે.
સ્વરાજ ચૂંટણીને લઈને મતગણતરી યોજાશે. ત્યારે સવારથી જ મતગણતરીકેન્દ્રો પર કોવિડ-19ની ગાઇડલાઇન અનુસાર સોશિયલ ડિસ્ટન્સિંગ સહિતના તકેદારીનાં પગલાઓનો ચુસ્તપણે અમલ થાય તે માટે પહેલાંથી જ તૈયારી કરવામાં આવી હતી. કોરોના પ્રોટોકોલને ધ્યાનમાં રાખીને મતગણતરી હાથ ધરાશે.
ગત ચૂંટણીમાં કોંગ્રેસે જિલ્લા અને તાલુકામાં પંચાયતમાં વધુ બેઠકો જીતી હતી
મહત્વનું છે કે 2015ની ચૂંટણીમાં 31માંથી 23 જિલ્લા પંચાયત કોંગ્રેસે કબજે કરી હતી. 31માંથી માત્ર 8 જિલ્લા પંચાયત જ ભાજપના ફાળે આવી હતી. 231 તાલુકા પંચાયતમાંથી 146 કોંગ્રેસ અને 85માં ભાજપને જીત મળી હતી. 51 નગરપાલિકામાંથી ભાજપને 37 અને કોંગ્રેસનો 14માં વિજય થયો હતો.
ગુજરાતની 231 તા.પંની ચૂંટણીમાં કુલ 12,265 ઉમેદવારો મેદાને છે. જેમાં ભાજપના 4652, કોંગ્રેસના 4594 ઉમેદવારો ચૂંટણી લડી રહ્યા છે. જ્યારે BSP-255, NCP-61 અને AAPના 1067 ઉમેદવારો મેદાને છે. તો અન્ય પક્ષોના 462 અને 1139 અપક્ષ ઉમેદવારો ચૂંટણી જંગમાં છે.
31 જિલ્લા પંચાયતની ચૂંટણીમાં કેટલા ઉમેદવારો લડ્યા
રાજ્યની જિલ્લા પંચાયતની ચૂંટણીમાં કુલ 2,655 ઉમેદવારો ચૂંટણી લડ્યા છે. જેમાં ભાજપના 954, કોંગ્રેસના 937 ઉમેદવારો મેદાને છે. BSPના 88, NCPના 23, CPI-Mના 3, AAPના 304 ઉમેદવાર છે. જ્યારે અન્ય પક્ષોના 133 અને 209 અપક્ષ ઉમેદવારો રણસંગ્રામમાં છે.
રાજ્યભરમાં 81 નગરપાલિકામાં 7,245 ઉમેદવારો ચૂંટણી લડ્યા. ભાજપના 2,555 અને કોંગ્રેસના 2,247 ઉમેદવારો મેદાનમાં છે. BSP-109, NCP-88, SP-64 ઉમેદવારો ચૂંટણી લડી રહ્યા છે. AAPના 719 અને અન્ય પક્ષોના 264 અને 1,184 અપક્ષ ઉમેદવારો પણ ચૂંટણી લડ્યા છે.