જનાદેશ / હાર્દિક પટેલના વતનમાં પોતાના પક્ષનો જ સફાયો, પરિણામ જાણીને કોંગ્રેસને વાગશે પંજો

• હાર્દિક પટેલના વતન વિરમગામમાં કોંગ્રેસનો સફાયો
• હજુ સુધી કોંગ્રેસનો નગરપાલિકામાં એકપણ ઉમેદવાર નથી જીતી શક્યો
• અત્યાર સુધીમાં 12 ભાજપ અને 10 અપક્ષ ઉમેદવારની જીત

ઉલ્લેખનીય છે કે, આજે સ્થાનિક સ્વરાજ ચૂંટણીના મહાપરિણામ સામે આવી રહ્યા છે અને ભાજપને જંગી બહુમતિ મળી રહી છે તો કોંગ્રેસના સુપડા સાફ થઇ રહ્યા છે. ત્યારે કોંગ્રેસના સ્ટાર પ્રચારક હાર્દિક પટેલના વતન વિરમગામમાં કોંગ્રેસનો સફાયો થયો છે. 

કોંગ્રેસના સુપડા સાફ

હજુ સુધી કોંગ્રેસનો એકપણ ઉમેદવાર નગરપાલિકામાં જીત મેળવી શક્યો નથી. અત્યાર સુધીમાં 12 ભાજપ અને 10 અપક્ષ ઉમેદવારની જીત થઈ છે. જ્યારે આ તરફ તાલુકા પંચાયતમાં પણ કોંગ્રેસે હજી સુધી ખાતુ ખોલાવ્યું નથી અને વિરમગામ જિલ્લા પંચાયતની 3 બેઠક પર ભાજપનો ભવ્ય વિજય થયો છે.

સવારે 9 વાગે શરૂ થઈ મત ગણતરી 

આજે સ્થાનિક સ્વરાજ ચૂંટણીના મહાપરિણામ સામે આવી રહ્યા છે. સવારે 9 વાગ્યાથી મતોની ગણતરી શરૂ થઈ છે. જેમાં 81 નગરપાલિકાઓની 2720 બેઠક, 31 જિલ્લા પંચાયતોની 980 બેઠક અને 231 તાલુકા પંચાયતની 4774 બેઠકોની મતગણતરી થશે. 25 જિલ્લાની અને 117 તાલુકાની જ્યારે નગરપાલિકાઓની 95 બેઠકો બિનહરીફ થઇ છે. રાજ્યની કુલ 8474 બેઠકો પર 22,200થી વધુ ઉમેદવારોના ભાવીનો આજે ફેંસલો થશે. આ ચૂંટણીમાં BJP, Congress, AAP, BSP અને AIMIM સહિતના પક્ષ મેદાનમાં છે. ત્યારે આજે ચૂસ્ત પોલીસ બંદોબસ્ત વચ્ચે મતગણતરી યોજાઇ રહી છે. 

કોવિડ ગાઈડલાઈનના પાલન સાથે વ્યવસ્થા કરાઈ છે.

સ્વરાજ ચૂંટણીને લઈને મતગણતરી યોજાશે. ત્યારે સવારથી જ મતગણતરીકેન્દ્રો પર કોવિડ-19ની ગાઇડલાઇન અનુસાર સોશિયલ ડિસ્ટન્સિંગ સહિતના તકેદારીનાં પગલાઓનો ચુસ્તપણે અમલ થાય તે માટે પહેલાંથી જ તૈયારી કરવામાં આવી હતી. કોરોના પ્રોટોકોલને ધ્યાનમાં રાખીને મતગણતરી હાથ ધરાશે.

ગત ચૂંટણીમાં કોંગ્રેસે જિલ્લા અને તાલુકામાં પંચાયતમાં વધુ બેઠકો જીતી હતી

મહત્વનું છે કે 2015ની ચૂંટણીમાં 31માંથી 23 જિલ્લા પંચાયત કોંગ્રેસે કબજે કરી હતી. 31માંથી માત્ર 8 જિલ્લા પંચાયત જ ભાજપના ફાળે આવી હતી. 231 તાલુકા પંચાયતમાંથી 146 કોંગ્રેસ અને 85માં ભાજપને જીત મળી હતી. 51 નગરપાલિકામાંથી ભાજપને 37 અને કોંગ્રેસનો 14માં વિજય થયો હતો.

ગુજરાતની 231 તા.પંચાયતની ચૂંટણીમાં કેટલા ઉમેદવારો લડ્યા

ગુજરાતની 231 તા.પંની ચૂંટણીમાં કુલ 12,265 ઉમેદવારો મેદાને છે. જેમાં ભાજપના 4652, કોંગ્રેસના 4594 ઉમેદવારો ચૂંટણી લડી રહ્યા છે. જ્યારે BSP-255, NCP-61 અને AAPના 1067 ઉમેદવારો મેદાને છે. તો અન્ય પક્ષોના 462 અને 1139 અપક્ષ ઉમેદવારો ચૂંટણી જંગમાં છે.

31 જિલ્લા પંચાયતની ચૂંટણીમાં કેટલા ઉમેદવારો લડ્યા

રાજ્યની જિલ્લા પંચાયતની ચૂંટણીમાં કુલ 2,655 ઉમેદવારો ચૂંટણી લડ્યા છે. જેમાં ભાજપના 954, કોંગ્રેસના 937 ઉમેદવારો મેદાને છે. BSPના 88, NCPના 23, CPI-Mના 3, AAPના 304 ઉમેદવાર છે. જ્યારે અન્ય પક્ષોના 133 અને 209 અપક્ષ ઉમેદવારો રણસંગ્રામમાં છે.

ગુજરાતની 81 નગરપાલિકાની ચૂંટણીમાં કેટલા ઉમેદવાર લડ્યા

રાજ્યભરમાં 81 નગરપાલિકામાં 7,245 ઉમેદવારો ચૂંટણી લડ્યા. ભાજપના 2,555 અને કોંગ્રેસના 2,247 ઉમેદવારો મેદાનમાં છે. BSP-109, NCP-88, SP-64 ઉમેદવારો ચૂંટણી લડી રહ્યા છે. AAPના 719 અને અન્ય પક્ષોના 264 અને 1,184 અપક્ષ ઉમેદવારો પણ ચૂંટણી લડ્યા છે.