ગુજરાતમાં સ્થાનિક સ્વરાજની ચૂંટણીના પરિણામો સામે આવી રહ્યા છે ત્યારે મોટા શહેરો બાદ ગ્રામીણ વિસ્તારોમાં પણ ભાજપનો ભગવો લહેરાયો છે.
ગુજરાતમાં ફરી કેસરીયો
સીએમ રૂપાણી અને સીઆર પાટીલ કાર્યાલય પહોંચ્યા
વિવિધ નપા અને જિલ્લા-તાલુકા પંચાયતોમાં ભાજપની વિજય કૂચ
સીએમ રૂપાણીએ જનતાનો આભાર માન્યો
ગુજરાત સ્થાનિક સ્વરાજની ચૂંટણીમાં ફરીવાર ભાજપ ઐતિહાસિક જીત હાંસલ કરવા જઈ રહી છે. નગરપાલિકા અને જિલ્લા પંચાયતોમાં ભાજપની પ્રચંડ જીત જોવા મળી રહી છે ત્યારે ભાજપ નેતાઓમાં ખુશીનો માહોલ છે. ગુજરાતની સ્થાનિક સ્વરાજની ચૂંટણીમાં ભાજપની એકતરફી જીત થઈ રહી છે અને મોટા ભાગની તાલુકા પંચાયત, જિલ્લા પંચાયત તથા નગરપાલિકામાં ભાજપનો ભગવો લહેરાયો છે ત્યારે ગદગદ થયેલા સીએમ રૂપાણીએ ગુજરાતની જનતાનો આભાર માન્યો છે.
ભાજપનું ગઢ છે ગુજરાત
સીએમ રૂપાણીએ કહ્યું કે ગુજરાતની જનતાએ જુસ્સાથી કોંગ્રેસના લોકોનો વીણી વીણીને સફાયો કર્યો છે. ફરી એકવાર સાબિત થઈ ગયું છે કે ગુજરાત ભાજપનો ગઢ છે અને આ ગુજરાત નરેન્દ્ર મોદી અને અમિત શાહનું ગુજરાત છે.
સીઆર પાટીલને પણ અભિનંદન પાઠવ્યા
સીએમ રૂપાણીએ આ જીતનો શ્રેય પીએમ મોદી અને ગૃહમંત્રી શાહને આપતા કહ્યું કે દિલ્હીમાં તો મોસાળે મા પીરસે તેમ તે પીએમ મોદી ગુજરાતને મદદ કરે છે. સાથે સાથે તેમણે ભાજપ પ્રદેશ અધ્યક્ષ પાટીલને પણ અભિનંદન પાઠવ્યું અને કહ્યું કે લાખો કાર્યકર્તાઓએ પરિશ્રમ કર્યો છે ત્યારે આ પરિણામ આવ્યું છે.
2022નો પાયો નંખાયો
સીએમ રૂપાણીએ કહ્યું કે ભૂતકાળમાં કોઈ પણ પાર્ટીને આટલી બધી બેઠકો મળી નથી, આ પાર્ટીના કાર્યકર્તાઓના પરિશ્રમ બદલ અભિનંદન પાઠવું છું. 2017માં અમે જીત્યા, 2019માં પણ જીત્યા અને 2021માં પણ જીત્યા છે અને 2022માં પણ ફરીવાર ભાજપની સરકાર માટે પાયો નંખાયો છે.
કોંગ્રેસ પર નિશાન સાધતાં સીએમ રૂપાણીએ કહ્યું કે કોંગ્રેસ સત્તા જ નહીં વિપક્ષને પણ લાયક નથી પ્રજાએ શોધી-શોધીને કોંગ્રેસને હરાવી છે.
ગુજરાતના સ્થાનિક સ્વરાજની ચૂંટણીમાં કોંગ્રેસનો રકાસ નીકળી ગયો છે. ભાજપનું બુલ્ડોજર જાણે પંજા પર ફરી વળ્યું હોય તેમ બપોરે 2 વાગ્યા સુધીના પરિણામ મુજબ 31 જિલ્લા પંચાયતોમાં ભાજપ બહુમતિ તરફ છે. જ્યારે 81માંથી 60 કરતા વધુ નગરપાલિકામાં ભાજપ આગળ છે જ્યારે 231માંથી 200થી વધુ તાલુકા પંચાયતોમાં ભાજપ આગળ દેખાઈ રહી છે.
ભાજપની વિજયકૂચ
ગુજરાતમાં સ્થાનિક સ્વરાજ ચૂંટણીના પરિણામ સામે આવી રહ્યા છે ત્યારે ભાજપના દિગ્ગજ નેતાઑના ગઢમાં ભાજપનો ભવ્ય વિજય થઈ રહ્યો છે. મ્યુનિસપિલ કોર્પોરેશનમાં ભાજપનો ભગવો લહેરાયો છે ત્યારે આજે તાલુકા-જિલ્લા પંચાયત તથા નગરપાલિકાઓમાં ભાજપની વિજયકૂચ થઈ રહી છે.
ગુજરાતમાં જેમ જેમ પરિણામો સામે આવી રહ્યા છે તેમ તેમ નગરપાલિકાઓમાં ભાજપની ફતેહ સામે આવી રહી છે ત્યારે ભાજપના દિગ્ગજ નેતા અને ગુજરાતના નાયબ મુખ્યમંત્રીના ગઢ કડીમાં ભાજપનો ભવ્ય વિજય થયો છે. કડીમાં બધી જ બેઠકો પર કેસરીયો લહેરાયો છે.
કડી નગરપાલિકામાં વોર્ડ નંબર પાંચમાં એક બેઠક કોંગ્રેસને મળી
નોંધનીય છે કે કડીમાં કુલ 9 વોર્ડ છે અને તેમાં 36 બેઠકો આવેલ છે. 36માંથી 26 બેઠકો બિનહરીફ ભાજપના ફાળે ગઈ હતી જ્યારે બાકીની 10 બેઠકો પર પણ કોંગ્રેસના સૂપડા સાફ થયા છે. આખી નગરપાલિકામાં કોંગ્રેસને 1 બેઠક મળી છે. કડી નગરપાલિકામાં 2015 માં ભાજપે 28 બેઠકો પર વિજય મેળવી હતી.
કોંગ્રેસનો ઉમેદવાર 1 મતથી હાર્યો
ગીર સોમનાથનાં સુત્રાપાડા તાલુકા પંચાયતની લોઢવા બેઠક પર ભાજપના ઉમેદવાર રામભાઇ વાઢેરનો માત્ર એક જ મતથી વિજય થયો છે. સામે પક્ષે કૉંગ્રેસના ઉમેદવારનો એક જ વોટથી પરાજય થતાં સમર્થકો નિરાશ થયાં હતા. જણાવી દઇએ કે, ગીર સોમનાથ જિલ્લા પંચાયતમાં 28 બેઠક પર 63.64 ટકા મતદાન નોંધાયું છે.
કોંગ્રેસમાંથી ભાજપમાં જઈને મંત્રી બનેલા કુંવરજી બાવળીયાના વતનમાં કોંગ્રેસે પોતાનો પંજો મારી દીધો છે. વિછીંયા તાલુકા પંચાયતમાં કોંગ્રેસની બહુમત સાથે જીત થઈ છે. તો આ તરફ કુંવરજી બાવળીયા સાથે કોંગ્રેસમાંથી રાજીનામું આપીને ભાજપમાં અન્ય એક મંત્રી બનેલા માણાવદરના નેતા જવાહર ચાવડાના મતવિસ્તારમાં કોંગ્રેસે પંજો લાગ્યો છે.
હાર્દિક પટેલના વતન વિરમગામમાં કોંગ્રેસનો સફાયો
કોંગ્રેસ નેતા હાર્દિક પટેલના વતન વિરમગામમાં કોંગ્રેસને જાકારો મળ્યો છે. નગરપાલિકામાં કોંગ્રેસનો એકપણ ઉમેદવાર જીતી શક્યો નથી. અત્યાર સુધીમાં 12 ભાજપ અને 10 અપક્ષ ઉમેદવારની જીત નોંધાઈ છે. તાલુકા પંચાયતમાં 10 બેઠકો ઉપર ભાજપનો વિજય થયો છે. વિરમગામ તાલુકા પંચાયતમાં પણ હજુ સુધી કોંગ્રેસે ખાતુ નથી ખોલ્યું. વિરમગામમાં આવતી 3 જિલ્લા પંચાયતની બેઠક ઉપર પણ ભાજપનો વિજય થયો છે.