ભાજપ અને કોંગ્રેસ બન્ને દ્વારા આગામી ચૂંટણીઓ માટે કેટલાક માપદંડ જાહેર કરાયા છે. તેવામાં હવે ભાજપ અને કોંગ્રેસના નેતાના પ્રેમપ્રકરણની ચર્ચા જામી છે. પ્રેમિકાને ટિકિટ અપાવવા નેતાઓ મથી રહ્યા છે.
ઇશ્કમીજાજી નેતાઓના પ્રેમિકાઓને ટિકિટ અપાવવા માટે ધમપછાડા
6 મહાનગરપાલિકાઓ માટે આગામી 21 ફેબ્રુઆરીએ મતદાન યોજાશે અને 23 ફેબ્રુઆરીએ મતગણતરી થશે. ત્યારે રાજકીય પક્ષો આગામી ચૂંટણીઓ માટે પોતાના પક્ષના ઉમેદવારોની યાદી તબક્કાવાર જાહેર કરી રહ્યા છે. જેમાં ભાજપ આ વખતે ધારાસભ્ય અને સાંસદોના સગા સંબંધીઓના બદલે યુવાનોને ચૂંટણીમાં તક આપવા માંગે છે તો કોંગ્રેસ યુવાનો અને શિક્ષિતોને ટિકિટ આપવા પર ભાર મૂકી રહી છે. તો કેટલાક નેતાઓને ટિકિટ ન મળતા નારાજગી જોવા મળી રહી છે. તો બીજી તરફ નેતાઓના ઇલુ-ઇલુની ચર્ચાએ જોર પકડ્યું છે. તેવામાં બન્ને પક્ષના એક-એક નેતાનું પ્રેમ પ્રકરણ ચર્ચાનું કેન્દ્ર બન્યું છે. કોંગ્રેસના નેતા પોતાની પ્રેમિકાને વેલેન્ટાઇન ડે પર ગિફ્ટમાં ચૂંટણીની ટિકિટ અપાવવા માટે મથી રહ્યા છે. જ્યારે ભાજપના મોટા નેતા દીકરીની ઉંમરના પ્રેમિકાને ટિકિટ અપાવવા ધમપછાડા કરી રહ્યા છે.
કોંગ્રેસમાં ફરી એકવાર નેતાનું પ્રેમ પ્રકરણ ચર્ચાનું કેન્દ્ર બન્યું છે. કોંગ્રેસના મોટા નેતા વેલેન્ટાઇન ડેની ગીફ્ટમાં પ્રેમિકાને ટિકિટ અપાવવા જીદે ચડ્યા છે. પ્રેમમાં પાગલ નેતાના ભરપૂર લોબિંગના પ્રયાસો થઇ રહ્યા છે. લોબિંગની ગંધ અમદાવાદના પશ્ચિમ વિસ્તારના એક વોર્ડ સુધી પહોંચી છે. કોંગ્રેસના સિનિયર નેતા પ્રેમિકાને ટિકિટ અપાવવા મેદાને આવ્યા છે. કોંગ્રેસના સિનિયર નેતા યુવાન મહિલા કાર્યકર પર ફિદા થયા છે. આ અગાઉ પણ પ્રેમિકાને મોંઘી ગિફ્ટને લઇ ચર્ચામાં આવ્યા હતા.
કોંગ્રેસની સાથે અમદાવાદ શહેર ભાજપ નેતાનું પણ પ્રેમ પ્રકરણ બન્યુ ચર્ચાનું કેન્દ્ર છે. અમદાવાદ શહેરના મોટા નેતાના પ્રેમ પ્રકરણની ચર્ચા પૂરજોશમાં ચાલી રહી છે. નેતા પોતાની પ્રેમિકાને ટિકિટ અપાવવા જીદે ચડ્યા છે. આધેડ વર્ષના નેતા તેમનાથી અડધી ઉંમરની પ્રેમિકાને ટિકિટ અપાવવા માટે મથી રહ્યા છે. અમદાવાદ ભાજપના કાર્યકરોમાં જોરદાર ચર્ચા ચાલી રહી છે. પ્રેમિકાના કારણે નેતાના ઘરમાં પણ ડખો થયો હતો. નેતાને 15 દિવસ પોતાના ઘરની બહાર વિતાવવા પડ્યા હતા. નેતાના આવી હરકતોથી ભાજપ હાઇકમાન્ડ પણ નારાજ છે. જો નેતાના કહેવા અનુસાર, નામ જાહેર કરવામાં આવશે તો આગામી દિવસોમાં ભાજપમાં ભડકો થવાની પૂર્ણ સંભાવના છે.