ચૂંટણીજંગ / જુઓ ભાજપના વડોદરાના આ દબંગ ધારાસભ્યને લાગ્યો એક વધુ ઝટકો

• MLA મધુશ્રી વાસ્તવને વધુ એક ઝટકો
• દીકરી નિલમને પણ ન મળી ટિકિટ
• જિલ્લા પંચાયત માટે માગી હતી ટિકિટ

વડોદરામાં MLA મધુ શ્રીવાસ્તવને વધુ એક ઝટકો લાગ્યો છે. પુત્ર બાદ દીકરી નિલમને પણ ટિકિટ ન મળી. મધુ શ્રીવાસ્તવે જિલ્લા પંચાયતની ચૂંટણીમાં દિકરી માટે ટિકિટ માંગી હતી
ત્યારે પાર્લામેન્ટરીએ મધુ શ્રીવાસ્તવની દિકરીને ટિકિટ ન આપવા નિર્ણય લીધો છે. પાર્લામેન્ટરી બોર્ડે મધુ શ્રીવાસ્તવની માંગ ફગાવી દીધી હતી. સગાઓને ટિકિટ ન આપવાનો નિયમ આગળ ધર્યો હતો. 

દિપક શ્રીવાસ્તવે કહ્યું કે, મારે બે સંતાનો જ છે. ત્રણ નથી

વાઘોડિયાના ધારાસભ્ય મધુ શ્રીવાસ્તવના દિકરા દિપક શ્રીવાસ્તવને વધુ એક નિરાશા હાથ લાગી છે. મનપા ચૂંટણી માટે નોંધાવેલી અપક્ષ ઉમેદવારીના ફોર્મને પંચ દ્વારા રદ કરવામાં આવ્યું છે. અને તેની ઉમેદાવારી વિરુદ્ધ ખુદ ભાજપે જ વાંધો ઉઠાવ્યો હતો. મહત્વનું છે કે, દિપક શ્રીવાસ્તવના પિતા મધુ શ્રીવાસ્તવ ભાજપના જ ધારાસભ્ય છે. આમ છતાં પાર્ટીએ તેમની ઉમેદવારી વિરુદ્ધ ફરિયાદ નોંધાવી હતી. દિપક શ્રીવાસ્તવને ત્રણ બાળકો હોવાથી તેની ઉમેદવારી રદ કરવામાં આવી છે. ચૂંટણી પંચ દ્વારા જાહેર ગાઈડ લાઈન પ્રમાણે જે ઉમેદવારને ત્રણ બાળકો હશે. તેમની ઉમેદવારી માન્ય રખાશે નહીં. જો કે, દિપક શ્રીવાસ્તવે કહ્યું કે, મારે બે સંતાનો જ છે. ત્રણ નથી. 

ફોર્મ રદ થતા ચૂંટણી અધિકારીની ઓફિસમાં તોડફોડ

વડોદરામાં ચૂંટણી અધિકારીની ઓફિસમાં તોડફોડ કરાઈ છે. અપક્ષ ઉમેદવારી ફોર્મ રદ થવાની આશંકાએ દીપક શ્રીવાસ્તવના સમર્થકોએ રોષમાં આવી તોડફોડ કરી છે. જે બાદ જિલ્લા પંચાયત કચેરી પર ભાજપના આગેવાનો પહોચ્યા હતા. તો સાથે પોલીસના ધાડેધાડા જિલ્લા પંચાયત ભવન ખાતે તૈનાત કરાયા હતા. DCP,SP, પીઆઈ કક્ષાના પોલીસ અધિકારીઓનો કાફલો પણ પહોચ્યો.

શું હતો સમગ્ર મામલો

ભાજપે વડોદરા મહાનગરપાલિકા માટે ઉમેદવારોની યાદી જાહેર કરતાની સાથે જ હોબાળો મચ્યો હતો. ભાજપે બનાવેલા નવા નિયમ અનુસાર, 60થી વધુ ઉંમર અને ધારાસભ્ય-સાંસદોના સગાને ટિકિટ ન આપવી. જે હેઠળ વાઘોડિયાના ભાજપના ધારાસભ્ય મધુ શ્રીવાસ્તવના દીકરા દીપક શ્રીવાસ્તવની ટિકિટ કપાઇ હતી. જેને લઇને દીપક શ્રીવાસ્તવે પક્ષ સામે બળવો કર્યો છે. ભાજપે ટિકિટ ન આપતા દીપક શ્રીવાસ્તવે વડોદરા શહેરના વોર્ડ નં-15માંથી અપક્ષ ઉમેદવારી નોંધાવી છે.

ઉમેદવાર કેટલો ખર્ચ કરી શકશે?

રાજ્ય ચૂંટણી આયોગ દ્વારા આગામી સ્થાનિક સ્વારાજ્યની ચૂંટણીને લઈને ચૂંટણીના પ્રચારના ખર્ચને લઈને જાહેરનામું બહાર પાડવામાં આવ્યું છે. આ જાહેરનામા મુજબ મનપા ઉમેદવારો મહત્તમ 6 લાખ જેટલો ખર્ચ કરી શકશે તથા 9 કરતા વધુ વોર્ડ ધરાવતી નગરપાલીકાના ઉમેદવારો રૂ.2.25 લાખ ખર્ચી શકશે.

9 વોર્ડથી ઓછા વોર્ડની નપા અને 9 વોર્ડથી વધુની નપાના નિયમ

તો, 9 વોર્ડથી ઓછા વોર્ડ ધરાવતી નગરપાલીકાના ઉમેદવાર 1 લાખ 50 હજાર જેટલા ખર્ચી શકશે. તો જિલ્લા પંચાયત માટે આ લિમિટ 4 લાખ તથા તાલુકા પંચાયત માટે 2 લાખ જેટલો ખર્ચ કરવાનું રાજ્ય ચૂંટણી આયોગ દ્વારા જાહેરનામું બહાર પાડવામાં આવ્યું છે.

ક્યારે છે ઈલેક્શન ?

21 ફેબ્રુઆરીએ 6 મહાનગર પાલિકાઓ અમદાવાદ, સુરત, રાજકોટ, વડોદરા, ભાવનગર અને જામનગર માટે મતદાન થશે. જ્યારે જૂનાગઢની બે બેઠક પર પણ ચૂંટણી થશે.