૩૦ વર્ષના ઇંતેજાર બાદ લિવરપુલ ફરી એક વાર ઈંગ્લિશ પ્રીમિયર લીગનો ખિતાબ જીતવામાં સફળ રહી છે. કોરોનાના કહેર વચ્ચે જ્યારે આ લીગની પુનઃ શરૂઆત થઈ ત્યારે તસવીરો લગભગ સ્પષ્ટ થઈ ગઈ હતી કે આ વખતે લિવરપુલ જ ખિતાબ જીતશે, પરંતુ છેલ્લા કેટલીક મેચોમાં માન્ચેસ્ટર સિટીએ લિવરપુલની ચિંતા વધારી દીધી હતી. ગત માર્ચમાં આ ટૂર્નામેન્ટ જ્યારે રોકી દેવામાં આવી હતી ત્યારે લિવરપુલની ટીમ બીજા સ્થાને રહેલી માન્ચેસ્ટર સિટી કરતાં ૨૫ પોઇન્ટ આગળ હતી. લિવરપુલના હાલ ૮૬ પોઇન્ટ છે.
લિવરપુલ ફરી એક વાર જીત્યુ
જીતનો શ્રેય લિવરપુલના કોચ જુર્ગેન કલોપને
આ જીતનો શ્રેય લિવરપુલના કોચ જુર્ગેન કલોપને આપવામાં આવી રહ્યો છે, જેમના નેતૃત્વમાં ટીમ ગત વર્ષે ફાઇનલમાં પહોંચી હતી. લિવરપુર આગામી ગુરુવારે બીજા સ્થાને રહેલી માન્ચેસ્ટર સિટી સામે ટકરાશે. લિવરપુલે કુલ ૧૯મી વાર આ ખિતાબ જીત્યો છે. તે ૧૩૨ વર્ષના ઇતિહાસમાં બીજી એવી ક્લબ છે, જેણે આટલી વાર આ ખિતાબ જીત્યો છે. માન્ચેસ્ટર યુનાઇટેડ પહેલી એવી ક્લબ છે, જેણે પણ ૧૯ વાર આ ખિતાબ પર કબજો જમાવ્યો છે.
લિવરપુલની ટીમે આ સિઝનમાં અત્યાર સુધીમાં રમેલી ૩૧ મેચમાં શાનદાર પ્રદર્શન કરીને ૨૮ મેચમાં જીત હાંસલ કરી છે, બે મેચ ડ્રો રહી છે અને ફક્ત એક જ મેચમાં હારનો સામનો કરવો પડ્યો છે.
કાલે રાત્રે જ્યારે ચેલ્સી વિરુદ્ધ માન્ચેસ્ટર સિટીની મેચમાં અંતિમ વ્હિસલ વાગી તો લિવરપુલના ચાહકો ખુશીથી ઝૂમી ઊઠ્યા હતા. ચેલ્સીએ બીજા સ્થાન પર રહીને માન્ચેસ્ટર સિટીને 2-1થી મ્હાત આપી.
1988માં ઈંગ્લિશ પ્રીમિયર લીગની શરૂઆત થયા બાદ પહેલી વાર એવું બન્યું છે કે જ્યારે કોઈ ટીમ સાત મેચ બાકી હોવા છતાં ચેમ્પિયન બની ગઈ છે. માન્ચેસ્ટર યુનાઇટેડે 2000'1માં અને માન્ચેસ્ટર સિટીએ 2017'18માં પાંચ-પાંચ બાકી હતી ત્યારે ટાઇટલ પોતાના નામે કરી લીધું હતું. આ ઉપરાંત કોઈ પણ ટીમ જૂન મહિનામાં ચેમ્પિયન બની નથી.