અંકલેશ્વર તાલુકામાંથી છેલ્લા 24 કલાકમાં ત્રણ અલગ-અલગ જગ્યાએથી લાખો રૂપિયાનો દારૂ પોલીસે ઝડપી પાડ્યો છે. હાલ પોલીસે આ મામલે ગુના નોંધીને વધુ તપાસ હાથ ધરી છે.
અંકલેશ્વરમાંથી 24 કલાકમાં ઝડપાયો લાખોનો દારૂ
ગટરની પાઇપલાઇનમાંથી 429 દારૂની બોટલો કરી જપ્ત
નવા દિવા ગામે કારમાંથી ઝડપાયો લાખોનો દારૂ
અંકલેશ્વર-વાલિયા રોડ ઉપર ટ્રકમાંથી વિદેશી દારૂનો જથ્થો ઝડપી પાડ્યો
રાજ્યમાં દારૂબંધીનો કાયદો કડક હોવાના દાવાઓ કરવામાં આવે છે. પરંતુ રાજ્યમાં લાખો રૂપિયાનો દારૂ ઝડપાઈ રહ્યો છે. રાજ્યમાં દારૂના કારણે યુવાધન બરબાદ થઈ રહ્યું છે. ગાંધીના ગુજરાતમાં દારૂબંધી કેવી છે તેનાથી સૌ કોઇ વાકેફ છે. ત્યાં સુધી કે પોલીસકર્મીઓ જ દારૂની હેરાફેરી કરી રહ્યા હોવાના કિસ્સા પણ સામે આવી ચૂક્યા છે. આમ છતાં વાતો તો દારૂબંધીના કડક કાયદાની થાય છે. ત્યારે છેલ્લા 24 કલાકમાં અંકલેશ્વર તાલુકામાંથી પોલીસે લાખો રૂપિયાનો દારૂ ઝડપી પાડ્યો છે.
ગટરની પાઈપ લાઈમાં સંતાડેલી 429 જેટલી દારૂની બોટલો કરી જપ્ત
આ અંગે વિગતવાર વાત કરીએ ભરૂચ જિલ્લામાં દારૂબંધીનો કડક અમલ થાય તે માટે અંકલેશ્વર શહેર પોલીસનો સ્ટાફ પેટ્રોલીંગમાં હતો. આ દરમિયાન બાતમીના આધારે એક સ્થળે દરોડો પાડ્યો હતો. આ દરમિયાન પોલીસને વિદેશી દારૂની 429 જેટલી બોટલો મળી આવી હતી. બુટલેગરનો દારૂ સંતાડવાનો નવો કિમીયો જોઈને પોલીસ પણ ચોંકી ગઈ હતી. બુટલેગરે જમીનમાં પાઈપલાઈન લગાવીને દારૂની બોટલો સંતાડી હતી. હાલ પોલીસે ગટરની પાઈપ લાઈમાં સંતાડેલી 429 જેટલી દારૂની બોટલો જપ્ત કરીને આ મામલે વધુ તપાસ હાથ ધરી છે.
નવા દિવા ગામેથી 13.10 લાખનો મુદ્દામાલ કર્યો કબજે
અંકલેશ્વર તાલુકાના નવા દિવા ગામેથી પોલીસે દારૂનો જથ્થો કબજે કરીને બે શખ્સોને વોન્ટેડ જાહેર કરી વધુ તપાસ હાથ ધરી છે. મળતી માહિતી અનુસાર, અંકલેશ્વર શહેર પોલીસને નવા દિવા ગામનો એક શખ્સ કારમાં ગાડી લઈને આવી રહ્યો હોવાની બાતમી મળતા પોલીસે નવા દિવા ગામે શામજી ફળિયામાં દરોડો પાડ્યો હતો. આ દરમિયાન બુટલેગર દારૂનો જથ્તો સગેવગે કરે તે પહેલા જ વિદેશી દારૂનો જથ્થો કબજે કર્યો હતો. જોકે, આ દરોડા દરમિયાન બુટલેગર વિજય વસાવા અને કાર ચાલક ફરાર થઈ ગયા હતા. અંકલેશ્વર પોલીસે રૂપિયા 1 લાખ 10 હજારની કિંમતનો વિદેશીદારૂ અને 12 લાખની કાર મળી રૂપિયા 13 લાખ 10 હજારનો મુદ્દામાલ કબ્જે કરી વિજય વસાવા અને કાર ચાલકને ઝડપી પાડવા ચક્રો ગતિમાન કર્યા છે.
અંકલેશ્વર-વાલિયા રોડ ઉપરથી 11.09 લાખથી વધુનો મુદ્દામાલ કર્યો કબજે
આ ઉપરાંત અંકલેશ્વર જીઆઈડીસી પોલીસે બાતમીના આધારે બંધ બોડીના ટ્રકમાંથી વિદેશી દારૂ જપ્ત કરી કારચાલક સહિત બે ઇસમોને ઝડપી પાડ્યા હતા. અંકલેશ્વર જીઆઈડીસી પોલીસની ટીમને યોગ્ય બાતમી મળતા અંકલેશ્વર-વાલિયા રોડ ઉપર માતંગી પેટ્રોલ પંપ પાસે વોચ ગોઠવી હતી. આ દરમિયાન બાતમી વાળી ટ્રેક આવતા તેને અટકાવી અંદર તપાસ કરતા જૂના ખાલી કેરેટ નજરે પડ્યા હતા. જોકે, પોલીસે ઝીણવટભરી તપાસ કરતા ટ્રકમાંથી ચોર ખાનું મળી આવ્યું હતું. જેમાંથી 4848 વિદેશ દારૂની બોટલો મળી આવી હતી. પોલીસે 7 લાખનો દારૂ અને 4 લાખની ટ્રક મળી કુલ 11.09 લાખથી વધુનો મુદ્દામાલ કબ્જે કર્યો હતો. સાથે જ ડ્રાઈવર સહિત બે ઈસમોને ઝડપી પાડ્યા હતા.