દારૂ વેચવા અને ખરીદવા આવતા લોકોમાં પણ કાયદાનો ડર નહીં, ઉપલેટામાં બાળકોની આંગણવાડીમાં દારૂ સંતાડાયો
આંગણવાડી બની દારૂનો અડ્ડો
ઉપલેટા રેલવે સ્ટેશન નજીક
દેશી દારૂનું ધૂમ વેચાણ
ગુજરાતમાં દારૂબંધીની ગુલબાંગો મારતા નેતાઓ અને કડક કાર્યવાહી કરાઇ રહી હોવાની દાવા કરતી પોલીસ રાજકોટના ઉપલેટાની આંગણવાડીના આ દ્રશ્યો જોઈ લે.. અહી ખુલ્લેઆમ ઉપલેટામાં બાળકોની આંગણવાડી વિસ્તારને દારૂના વેપલાનું કેન્દ્ર બનાવવામાં આવી રહ્યું છે. ખુલ્લેઆમ દેશી દારૂની કોથળીઓ વેચતો શખ્સ કેમેરામાં કેદ થયો છે. દારૂ વેચવા અને ખરીદવા આવતા લોકોમાં પણ કાયદાનો ડર રહ્યો નથી. મોતની પોટલી ઢીંચી ઈસમો પોતે અને પોતાના પરિવારને ખુલ્લેઆમ બરબાદીના રસ્તા તરફ લઈ જઈ રહ્યા છે.
ગુજરાતમાં ક્યા છે દારૂબંધી?
ઉપલેટાની આંગણવાડીને બનાવી દીધો દારૂનો અડ્ડો?
વિદ્યાધામને બનાવી દીધો દારૂનો અડ્ડો?
દારૂ વેચનારાની હિંમત કોને કારણે વધી છે?
શું આ અડ્ડાથી સ્થાનિક પોલીસ અજાણ છે?
આ હાટડીઓ હપ્તાઓને કારણે ચાલે છે?
દારૂ ખરીદનારા અને વેચનારા બંને બેખૌફ કેમ?
કોની મીઠીનજર હેઠળ થઇ રહી છે રેલમછેલ?
કદાચ આવા જ છૂટાદોરથી બરવાળા લઠ્ઠાકાંડમાં 30થી વધુ લોકોના મોત નિપજ્યાં અરે હદ તો ત્યાં થાય છે કે ઉપલેટામાં રેલવે સ્ટેશન નજીક આંગણવાડીમાં આ દારૂ વેચતો બુટલેગર કહી રહ્યો છે કે પોલીસકર્મીઓને 2થી 3 હજારના હપ્તા આપવામાં આવે છે. હંમેશા પોલીસ ઘોડા છૂટયા પછી તબેલે તાળાં મારવા જેવી સ્થિતિનું નિર્માણ કરે છે. હાલ બરવાળા લઠ્ઠાકાંડમાં થયેલા મોતના ખેલ બાદ હમણાં થોડા દિવસ કાર્યવાહી કરશે. બાદમાં જેમ હતું તેમ ભગવાન ભરોસે મૂકી ખિસ્સા ગરમ કરવાનું ષડયંત્ર રચશે.
બરવાળા લઠ્ઠાકાંડ બાદ કડક દાવા કરતી પોલીસ રાજકોટના ઉપલેટાની આંગણવાડીના આ દ્રશ્યો જોઈ લે.. અહી ખુલ્લેઆમ ઉપલેટામાં બાળકોની આંગણવાડી વિસ્તારને દારૂના વેપલાનું કેન્દ્ર બનાવવામાં આવી રહ્યું છે. ખુલ્લેઆમ દેશી દારૂની કોથળીઓ વેચતો શખ્સ કેમેરામાં કેદ થયો છે#BotadLatthaKand@GujaratPolicepic.twitter.com/p7WdW7lAAx
— VTV Gujarati News and Beyond (@VtvGujarati) July 26, 2022
થોરળા પોલીસ સ્ટેશનની પાછળના વિસ્તારમાં દેશી દારૂની ભઠ્ઠી
રાજકોટમાં ખુલ્લેઆમ દેશી દારૂની ભઠ્ઠી ધમધમી રહી હોવાનું સામે આવ્યું છે. રાજકોટના થોરળા પોલીસ સ્ટેશનની પાછળના વિસ્તારમાં ખુલ્લેઆમ દેશી દારૂની ભઠ્ઠી ધમધમી રહી હોવાનું જાણવા મળ્યું છે. ત્યારે એકતરફ સરકાર દારૂબંધીના મોટા દાવા કરી રહી છે તો બીજી બાજુ રાજકોટમાં ખુલ્લેઆમ ધમધમતી દારૂની ભઠ્ઠી આખરે કોની રહેમનજર હેઠળ ધમધમી રહી છે તેને લઇને મોટો સવાલ ઉભો થાય છે.
અમે રાત્રિના 1 વાગ્યે પણ અહીં દરોડા પાડીએ છીએ: PI
શું પોલીસની રહેમનજર હેઠળ રાજકોટમાં દેશી દારૂના અડ્ડાઓ ધમધમી રહ્યાં છે. આ અંગે થોરળા પોલીસ સ્ટેશનના PIનું તો એમ કહેવું છે કે, 'અમે રાત્રિના 1 વાગ્યે પણ અહીં દરોડા પાડતા હોઇએ છીએ.' તો પછી કેમ વારંવાર આ વિસ્તારમાં દારૂની ભઠ્ઠીઓ ખુલ્લેઆમ ધમધમી રહી છે. PIનું કહેવું છે કે, 'અમે અહીં નાઇટ દરમ્યાન રાતના 1 વાગ્યે પણ આવીએ છીએ અને એક વાગે પણ અમે આ જ વિસ્તારમાં લોકોને પકડેલા છે.' તો પછી પોલીસ કેમ આ દારૂની ભઠ્ઠીઓ બંધ નથી કરાવતી. રાજકોટ પોલીસ ત્યાં પહોંચે પણ છે અને આ દારૂની ભઠ્ઠીઓ બંધ પણ કરાવવામાં આવે છે તેમ છતાં ફરી એજ જગ્યાએ દારૂની ભઠ્ઠીઓ શરૂ થઇ જાય છે. ત્યારે પોલીસ દ્વારા આ મામલે કેમ નક્કર કાર્યવાહી કરવામાં નથી આવી રહી. બેરોકટોક થોરળા પોલીસ સ્ટેશનની પાછળના વિસ્તારમાં ખુલ્લેઆમ દેશી દારૂની ભઠ્ઠી ધમધમી રહી છે.
રાજકોટ પોલીસની રહી રહીને રેડની કાર્યવાહી
રાજકોટ પોલીસે દેશી દારૂના અડ્ડા પર ત્રાટકી રહી છે. ઝોન-1 DCP પ્રવીણ કુમાર મિણાએ કહ્યું કે દારૂબંધીનો અમલ કરવા પોલીસ પ્રયત્નો કરે છે. આજે સવારે 2 કેસ કરવામાં આવ્યા છે. પોલીસ પર સવાલો ઉઠતાં બચાવમાં તેઓએ કહ્યું કે કુબલિયા પરામાં વારંવાર દરોડા પાડવામાં આવે છે. ગીચ વિસ્તાર હોવાથી આરોપીઓ ભાગી જાય છે. નાલામાં ભઠ્ઠી ચાલુ કરી ઘરમાં લોકો ચાલતા જાય છે. ગીચ વિસ્તાર હોવાથી પોલીસ પહોંચે તે પહેલા આરોપી ભાગી જાય છે. મનપા ડીમોલેશન કરે તો જ આ અટકી શકે. ગેરકાયદેસર મકાનો છે એટલે ભઠ્ઠી ઓ ચાલે છે. ભઠ્ઠીઓમાં આરોપીઓનાં નામ ખૂલે તે માટે પ્રયત્નો કરશુ. નામ સામે આવશે તો તેની સામે 10 વર્ષની સજા માટે પ્રયત્નો કરશુ
આખરે કોણ બુટલેગરોને છાવરી રહ્યું છે?
બોટાદમાં એકતરફ લઠ્ઠાકાંડની ઘટના સામે આવી છે. જેમાં 30થી વધુ લોકોના મોત થયા છે તેમ છતાં હજુ કેમ બુટલેગરોને છાવરવામાં આવી રહ્યાં છે? આખરે કોણ બુટલેગરોને છાવરી રહ્યું છે? પોલીસ સ્ટેશનની પાછળ દારૂની ભઠ્ઠી કોની રહેમ રાહે? આખરે પોલીસ કેમ દારૂની ભઠ્ઠીઓ બંધ નથી કરાવતી? ઝેરી દારૂ પીધા પછી જો મૃત્યુ થશે તો જવાબદાર કોણ? શું ગાંધી છાપના જોરે ચાલે છે દેશી દારૂની ભઠ્ઠીઓ? ભઠ્ઠીઓ બંધ કરાવવા તંત્રને કેમ રસ નથી? શું ખરેખર ગુજરાતમાં દારૂબંધી માત્ર કાગળ પર જ છે? જેવાં અનેક સવાલો અહીં ઉભા થાય છે.