ગુજરાતમાં દારૂબંધી છે તેમ છતાં દરરોજ દારૂ ઝડપાયાના કિસ્સા સામે આવતા રહે છે. ત્યારે હવે વડોદરામાં બુટલેગરનો વધુ એક કિમીયાનો પર્દાફાશ થયો છે.
વડોદરામાં દારૂ સંતાડવાના બુટલેગરના નવા કિમીયાનો પર્દાફાશ
શેરખી ગામની કોતરમાં સુરંગ બનાવીને સંતાડેલો હતો દારૂ
દારૂ સંતાડનારા શખ્સોને લઇને પોલીસે હાથધરી પૂછપરછ
વડોદરાના શેરખી ગામમાંથી મોટા પ્રમાણમાં દારૂનો જથ્થો ઝડપાયો છે. શેરખી ગામે મહિસાગર નદીની કોતરમાં સુરંગ બનાવીને સંતાડેલા દારૂના જથ્થાને પોલીસ ઝડપી પાડ્યો છે. શેરખી ગામે બુટલેગરે ભૂગર્ભમાં ખાના બનાવીને દારૂની બોટલો સંતાડી હતી. જોકે વડોદરા શહેર અને ગ્રામ્ય પોલીસ દ્વારા પેટ્રોલિંગ કરવામાં આવી રહ્યું હતું. આ દરમિયાન બાતમી મળતા પોલીસ ત્રાટકી હતી.
બુટલેગરે ભૂગર્ભમાં ખાના બનાવીને સંતાડી હતી દારૂની બોટલ
પોલીસે શેરખી ગામમાં બુટલેગરના ઘર અને મહિસાગર નદીની કોતરમાં સુરંગ બનાવીને સંતાડેલા રૂપિયા 76 હજારની કિંમતના વિદેશી દારૂને કબજે કર્યો હતો. મળતી માહિતી અનુસાર, કુલ 2 લાખ 68 હજાર રૂપિયાનો દારૂ ઝડપાયો છે. તો બુટલેગરને પણ પોલીસે ઝડપી પાડ્યો હતો. હાલ પોલીસ દ્વારા દારૂનો જથ્થો મળવા અંગે વધુ તપાસ હાથ ધરી છે. દારૂ સંતાડનારા શખ્સોની પોલીસે પુછપરછ હાથ ધરી છે.