દિગ્ગજ ફૂટબોલર લિયોનેલ મેસ્સીએ મંગળવારે કુરાકાઓ સામેની આંતરરાષ્ટ્રીય મૈત્રીપૂર્ણ મેચના પ્રથમ હાફમાં હેટ્રિક ફટકારીને આર્જેન્ટીના માટે 100 ગોલનો આંકડો પાર કર્યો હતો.
કુરાકાઓ સામે મેસ્સીએ પ્રથમ હાફમાં હેટ્રિક ફટકારી
આર્જેન્ટીના માટે 100 ગોલનો આંકડો પાર કર્યો
પીએસજી અને આર્જેન્ટિના તરફથી રમતા અનુભવી ખેલાડી લિયોનેલ મેસ્સી હાલમાં ખૂબ જ ચર્ચામાં છે. તે તાજેતરમાં તેના દેશ માટે રમતી વખતે તેની શાનદાર હેટ્રિક માટે હેડલાઇન્સમાં આવ્યો હતો. મેસ્સીએ આ હેટ્રિક સાથે ખાસ સદી પણ ફટકારી છે. અર્જેન્ટીનાને તાજેતરના વિશ્વ ચેમ્પિયન બનાવવામાં મહત્વની ભૂમિકા ભજવનાર દિગ્ગજ ફૂટબોલર લિયોનેલ મેસ્સીએ મંગળવારે કુરાકાઓ સામેની આંતરરાષ્ટ્રીય મૈત્રીપૂર્ણ મેચના પ્રથમ હાફમાં હેટ્રિક ફટકારીને આર્જેન્ટીના માટે 100 ગોલનો આંકડો પાર કર્યો હતો.
મેસ્સીએ ફટકારી સદી
જણાવી દઈએ કે મેસ્સીએ ઇન્ટરનેશનલ ફૂટબોલમાં આર્જેન્ટિના તરફથી રમતા પોતાના 100 ગોલ પૂરા કર્યા છે. મેસ્સીને તેના 100મા ગોલ માટે લો સેલ્સોએ મદદ કરી હતી.આપણે બધા જાણીએ છીએ કે આર્જેન્ટિનાએ ગયા ડિસેમ્બરમાં ફાઇનલમાં ફ્રાન્સને હરાવીને વર્લ્ડ કપ જીત્યો હતો. એવામાં હાલ આર્જેન્ટિનાએ કુરાકાઓને 7-0થી હરાવ્યું. એ મેચમાં 35 વર્ષીય મેસ્સીએ 20મી મિનિટે ટીમનું ખાતું ખોલાવીને આંતરરાષ્ટ્રીય મેચોમાં 100 ગોલનો આંકડો પૂરો કર્યો હતો ત્યારબાદ તેણે 33મી અને 37મી મિનિટમાં પણ ગોલ કર્યા હતા. મેસ્સીના હવે આંતરરાષ્ટ્રીય સ્તર પર 102 ગોલ છે.
રાષ્ટ્રીય ટીમો દ્વારા સૌથી વધુ ગોલ કરવાની યાદીમાં મેસ્સી માત્ર બે ખેલાડીઓથી પાછળ છે. આ યાદીમાં ક્રિસ્ટિયાનો રોનાલ્ડો 122 ગોલ સાથે ટોચ પર છે અને ઈરાનનો અલી ડેઈ 109 ગોલ સાથે બીજા સ્થાન પર છે.