મુશ્કેલી / મુંબઈ એરપોર્ટ પર લાગી ગઈ લાઈનોની લાઈન, જાણો અચાનક શું બની ગયું

• મુંબઈ એરપોર્ટ પર સર્વર ડાઉન થતા મુસાફરો પરેશાન
• ઓપ્ટિકસ ફાયબર કેબલને નુકશાન થતા સિસ્ટમ બંધ થઈ ગઈ હતીઃડીઆઈજી શ્રીકાંત કિશોર
• ટેકનિકલ ટીમની બે કલાકની મહેનત બાદ સર્વર ફરી શરૂ થયું 

મુંબઈના છત્રપતિ શિવાજી મહારાજ ઈન્ટરનેશનલ એરપોર્ટ પર ગુરુવારે સર્વર ડાઉન થવાના કારણે મુસાફરોને હેરાન થવાનો વારો આવ્યો હતો. કાઉન્ટરો પર લાંબી કતારો જોવા મળી હતી. કેન્દ્રીય ઔદ્યોગિક સુરક્ષા દળના ડીઆઈજી શ્રીકાંત કિશોરે જણાવ્યું કે મુસાફરો સામાન મૂકવા માટે લગભગ એક કલાકથી રાહ જોઈ રહ્યા છે. તેમણે એ પણ માહિતી આપી હતી કે ઓપ્ટિક ફાઈબર કેબલને નુકસાન થવાને કારણે સિસ્ટમ બંધ થઈ હતી. જોકે, બે કલાકથી વધુ સમયમાં ટેકનિકલ ટીમે સમસ્યાનો ઉકેલ લાવી સર્વર પુનઃસ્થાપિત કર્યું હતું. સાંજે લગભગ 6.35 વાગ્યા સુધી સર્વર ફરી શરૂ કરી દેવામાં આવ્યું હતું.

સર્વર રિસ્ટોર થવા છતાં મુસાફરોની ભીડ જોવા મળી
મીડિયા રિપોર્ટ્સ અનુસાર, સર્વર રિસ્ટોર થવા છતાં એરપોર્ટ પર મુસાફરોની ભીડ જોવા મળી હતી. તમામ મુસાફરો પોતપોતાની ફ્લાઈટ છુટવાનીં ચિંતામાં હતા. વિસ્તારાના પ્રવક્તાએ કહ્યું કે તમામ એરલાઈન્સને અસર થઈ છે. અકાસા એરના પ્રવક્તાએ પણ એરલાઇન સેવાઓ પર અસરની પુષ્ટિ કરી અને કહ્યું કે એરપોર્ટ ઓપરેટરો આ મુદ્દા પર કામ કરી રહ્યા છે. પ્રવક્તાએ કહ્યું કે અમે મુસાફરોને તેમની જરૂરિયાત મુજબ મદદ કરી રહ્યા છીએ.

સર્વર ડાઉન થતાં જ કાઉન્ટરો પર લાંબી કતારો
એરપોર્ટનું સર્વર ડાઉન થતાં કાઉન્ટરો પર લાંબી કતારો જોવા મળી હતી. સાથે જ સર્વર ડાઉન હોવાના કારણે એરપોર્ટ સ્ટાફમાં પણ ગભરાટ ફેલાયો હતો. તમામ મુસાફરો તેમની ફ્લાઇટ ગુમ થવાથી ડરવા લાગ્યા હતા. એક પછી એક મુસાફરોએ એરપોર્ટ મેનેજમેન્ટ અને સ્ટાફ સાથે બોલાચાલી કરી હતી. જોકે, સ્ટાફે સમસ્યાના નિરાકરણ માટે કામગીરી ચાલુ રાખી હતી. સર્વર ડાઉન માટે ટેકનિકલ ટીમને પણ બોલાવવામાં આવી હતી. જેમણે સમસ્યા હલ કરવાનો પ્રયાસ કર્યો હતો. બીજી તરફ, સીએસએમઆઈએ અથવા મુંબઈ ઈન્ટરનેશનલ એરપોર્ટના પ્રવક્તાના જણાવ્યા અનુસાર, મુસાફરોને શાંત રહેવા માટે વિનંતી કરવામાં આવી છે. તેમજ સર્વર ડાઉન હોવાના કારણે ઉકેલ માટે ટેકનિકલ ટીમ તૈનાત કરવામાં આવી છે અને તેનું મેન્યુઅલ પ્રોસેસિંગ શરૂ થયું.