દિલ્લી-એનસીઆરમાં મોસમનો મિજાજ બદલાયેલો જોવા મળ્યો છે. આજરોજ વહેલી સવારે 7 વાગ્યાની આસપાસ વરસાદ પડ્યો. ભારે ગરમીથી પરેશાન લોકોને વરસાદ પડવાથી રાહત મળી છે.
ઉલ્લેખનીય છે કે છેલ્લા કેટલાક દિવસોથી દિલ્લી-એનસીઆરમાં ભારે ગરમીથી લોકો પરેશાન જોવા મળી રહ્યાં હતા. હવામાન વિભાગની આગાહી મુજબ આગામી 48 કલાક સુધી વરસાદની આગાહી કરી છે. નોઇડા સેકટર 15, સિટી સેન્ટર, સેકટર 52 અને અશોક નગર સહિત અનેક વિસ્તારમાં ભારે વરસાદ પડ્યો છે.
જ્યારે દિલ્લીના કાલકાજી વિસ્તાર, વસંત કુજ, મુનિરકા અને વસંત વિહાર વિસ્તારમાં પણ વરસાદ પડ્યો છે. જો કે સવારમાં વરસાદ પડવાથી લોકોને ઓફિસ જવામાં મુશ્કેલીનો સામનો કરવો પડયો છે. જો કે આ અગાઉ સોમવારે પડેલા વરસાદના કારણે લોકોને ગરમીમાંથી રાહત મળી હતી. વરસાદ પડવાથી ગત ત્રણ વર્ષમાં 14 મેનું સૌથી ઓછુ તાપમાન નોંધાયું હતું.
જો કે આગામી બે દિવસ સુધી હવામાન વિભાગ અનુસાર વરસાદી વાતાવરણ જોવા મળશે. જ્યારે દિલ્લીથી નજીક આવેલા ફરીદાબાદ, પલવલ, ગાઝિયાબાદ, નોઇડામાં પણ હવામાનમાં પલટો આવે તેવી સંભાવના છે.
જ્યાં ઉત્તર ભારતમાં વરસાદની સંભાવના છે ત્યારે છત્તીસગઢ, તેલંગાણા, તમિલનાડૂ અને પોંડૂચેરીમાં ગરમ હવા આગામી 4 થી 5 દિવસ સુધી જોવા મળશે. હવામાન વિભાગ અનુસાર 16 મેના રોજ સામાન્ય વરસાદ પડે તેવી સંભાવના છે. આગામી બે દિવસ સુધી ઉત્તર-પશ્ચિમી ભારતમાં અધિકતમ તાપમાનમાં વિશેષ પરિવર્તન જોવા મળશે નહીં.