Coronavirus / WHOએ કહ્યું સ્થિતિ કાબૂમાં આવ્યાં પહેલાં લૉકડાઉન હટાવવું ગંભીર, આ રીતે હટાવવું પડશે

• યુરોપમાં વાયરસ ઉપર નિયંત્રણ સારા સમાચાર પણ હવે આફ્રિકામાં ચિંતાજનક રીતે વધી રહ્યા છે કેસ 
• આરોગ્ય કર્મચારીઓને કોરોના પોઝીટીવ આવે તે સમગ્ર દેશ માટે જોખમી 
• લોક ડાઉન પતે પછી પણ ફરીથી આ વાયરસ ગમે ત્યારે ત્રાટકી શકે છે  

કોરોના વાયરસના આતંકથી વિશ્વ લોક ડાઉન મોડમાં છે. બગડતા અથતંત્ર અને અવ્યવસ્થાના કારણે હવે સૌ કોઈની ધીરજ ખૂંટી રહી છે. ઇટાલી જેવા દેશોમાં જ્યાં થોડા સમયથી એક્ટિવ કેસ ધીમે ધીમે ઘટી રહ્યા છે ત્યાં લોક ડાઉન હટાવવા માટે લોકો બેબાકળા બન્યા છે. નોંધનીય છે કે ભારતમાં પણ 14 એપ્રિલે સરકાર જો કોઈ નવી સુચના ન આપે તો સત્તાવાર રીતે લોક ડાઉનનો અંત આવે છે. 

જો કે WHOના વડાએ એક અગત્યનું નિવેદન આપતા જણાવ્યું છે કે સ્થિતિ કાબૂમાં આવ્યા પહેલા જે દેશ લોક ડાઉન હટાવી દેશે ત્યાં વાયરસ બમણા જોરથી ફરીથી ત્રાટકે તેવી ભીતિ છે. કેટલાક દેશોએ લોક ડાઉનને થોડું હળવું કર્યું છે પણ તેને હટાવવું હશે તો ક્રમશ: પદ્ધતિસર પગલા લઇને તેને હટાવવું પડશે નહીંતર વરવા પરિણામો ભોગવવા પડશે. 

તેમણે એમ પણ ઉમેર્યું કે WHO પણ ઈચ્છે છે કે લોકો જલ્દી થી જલ્દી પોતાના ઘરોથી બહાર આવીને પોતાનું સામાન્ય જીવન ફરીથી જીવવાનું શરુ કરી શકે. આ માટે WHO ગંભીર રીતે અસરગ્રસ્ત દેશો સાથે વાતચીત કરીને એક સ્ટ્રેટેજી બનાવી રહ્યું છે કે કેવી રીતે વ્યવસ્થાપૂર્વક ક્રમશ: લોક ડાઉનમાંથી સામાન્ય જીવન શરુ કરી શકાય. 

કોઈ પણ દેશમાં લોક ડાઉન હટાવવું કે નહીં તે નક્કી કરવા માટે WHOએ ૬ પરિબળો ગણાવ્યા છે 

• રોગનો ચેપ કાબૂમાં આવી ગયો હોવો જોઈએ. 
• જાહેર આરોગ્યની સેવાઓ સંપૂર્ણપણે તૈયાર હોવી જોઈએ
• વૃદ્ધાશ્રમ અનાથાશ્રમ જેવા કેર હોમ્સમાં રોગ ફાટી નીકળવાનું જોખમ ન હોવું જોઈએ 
• રોગથી બચવા માટેના નિરોધક પગલાઓ ઓફિસ અને શાળા કોલેજમાં લેવાયેલા હોય
• બીજા દેશથી વાયરસનો ચેપ ફાટી ન નીકળે એ જોખમ નિયંત્રિત કરેલું હોય 
• આ માટે દેશના તમામ નાગરિકોમાં પુરતી જાગૃતિ હોય 

નોંધનીય છે કે અત્યારે વૈશ્વિક મૃતાંક ૧ લાખને વટાવી ચુક્યો છે જયારે ૧૬ લાખ કોરોના વાયરસના પોઝીટીવ કેસીસ નોંધાઈ ચુક્યા છે. WHOએ સંતોષ વ્યક્ત કર્યો છે કે સ્પેન, ઇટાલી , જર્મની, ફ્રાંસ જેવા દેશોમાં વાયરસે રૌદ્ર સ્વરૂપ દેખાડ્યા બાદ હવે ધીમે ધીમે સ્થિતિ નિયંત્રણમાં આવી રહી હોય એમ જણાઈ રહ્યું છે. જો કે એવી પણ ચિંતા વ્યક્ત કરી હતી કે આફ્રિકાના ગ્રામીણ વિસ્તારોમાં આ વાયરસ પગપેસારો કરી રહ્યો છે જ્યાં ટેસ્ટિંગ અને હોસ્પિટલ્સની સારી સુવિધા ઉપલબ્ધ નથી. 16થી વધુ આફ્રિકન દેશોમાં વાયરસ હાલ કોમ્યુનિટી સ્પ્રેડ સ્તરે ઝડપથી ફેલાઈ રહ્યો છે. 

આ ઉપરાંત ઘણા દેશોમાં હેલ્થ વર્કર્સ વાયરસથી સંક્રમિત થઇ રહ્યા છે જે મુદ્દે WHOએ ચિંતા વ્યક્ત કરી હતી. WHOએ કહ્યું હતું કે જે દેશોમાં હેલ્થ વર્કર્સ સંક્રમિત થશે ત્યાં બીજા લોકો પણ ચેપના જોખમમાં આવશે કારણ કે દર્દીઓ અને શંકાસ્પદ કેસના સંપર્કમાં સૌથી વધુ હેલ્થ વર્કર્સ જ આવે છે. 

આમ લોક ડાઉન બાદ પણ WHOએ તમામ દેશોને સતર્ક રહેવા માટે અને કોઈ પણ ક્ષણે આ વાયરસ ફરી ત્રાટકી શકે છે એ બાબતથી સાબદા રહેવા માટે જણાવ્યું હતું.