મોંઘા બાઈક અને લગ્ઝરી કાર હંમેશા સ્ટેટસ સિમ્બોલ રહ્યા છે. જો કે, હવે સ્વાસ્થ્ય પ્રત્યે જાગૃત લોકોમાં સાઈકલ ચલાવવાનો ક્રેઝ વધી રહ્યો છે.
મોટી સંખ્યામાં લોકો તંદુરસ્ત રહેવા માટે સાઈકલ ચલાવી રહ્યા છે. સાઈકલિંગ શ્રેષ્ઠ એક્સર્સાઈઝ કહી શકાય. આ કસરતમાં શરીરની માંસપેશીઓ પણ સંકળાયેલી હોય છે અને શરીર એક્ટિવ રહે છે. સાઈકલ ચલાવવાના અન્ય ફાયદા જાણશો તો તમે પણ રોજ લઈને નીકળી પડશો!
સાઈકલ ચલાવવાથી હૃદયની બીમારીઓની સાથે-સાથે અકાળે થતા મોતથી પણ બચી શકાય છે. રિસર્ચમાં ખુલાસો થયો છે કે સાઈકલ ચલાવવાથી હૃદય સંબંધિત બીમારીઓનું જોખમ 46 ટકા ઘટી જાય છે. જ્યારે ચાલવાથી હૃદયની બીમારીઓનું જોખમ 27 ટકા જ ઓછું થાય છે.
સાઈકલ ચલાવવાથી કેન્સર જેવી ગંભીર બીમારીઓ સામે રક્ષણ મળે છે. હાલમાં જ થયેલા રિસર્ચ પ્રમાણે, નિયમિત રૂપે સાઈકલ ચલાવવાથી કેન્સરનું જોખમ ઘટે છે. આ રિસર્ચ બ્રિટિશ મેડિકલ જર્નલમાં પ્રકાશિત કરવામાં આવ્યું છે. રિસર્ચર્સના મતે, ઘરેથી ઓફિસ ચાલીને જવા કરતાં સાઈકલ પર જવું વધુ લાભદાયી છે. નિયમિતપણે સાઈકલ ચલાવવાથી કેન્સરનું જોખમ 45 ટકા ઘટી જાય છે. રિસર્ચ દરમિયાન 2,64,377 લોકોને સામેલ કરવામાં આવ્યા જેમની સરેરાશ ઉંમર 53 વર્ષ હતી.
રિસર્ચનું માનીએ તો વજન ઘટાડવા માટે કસરત કરીને એક અઠવાડિયામાં ઓછામાં ઓછી 2000 કેલરી બાળવી જોઈએ. તમને જાણીને નવાઈ લાગશે કે નિયમિતરૂપે સાઈકલ ચલાવવાથી દર કલાકે 300 કેલરી બર્ન થાય છે. એવામાં તમે જેટલી સાઈકલ ચલાવશો તેટલી વધારે કેલરી બર્ન થશે અને શરીરમાંથી ફેટ ઘટશે. જો કે, સાઈકલિંગ કરવાની સાથે હેલ્ધી ડાયટ લેવું પણ જરૂરી છે.
હેલ્થ એક્સપર્ટનું માનીએ તો સાઈકલ ચલાવવાથી હાર્ટ રેટ વધે છે સાથે જ કેલરી બળે છે. નિયમિત સાઈકલિંગ કરવાથી શરીરના દરેક ભાગમાંથી ચરબી ઘટવાનું શરૂ થાય છે, આમાં બેલી ફેટ પણ સામેલ છે.
સાઈકલિંગની સૌથી સારી બાબત છે કે તમે સરળતાથી ડેઈલી રૂટિનમાં સામેલ કરી શકો છો. બજારમાંથી સામાન લાવવો હોય કે ઘરથી બહુ દૂર ના આવેલી ઓફિસ કે સ્કૂલ જવું હોય તો કાર કે ટુ-વ્હીલરના બદલે સાઈકલનો ઉપયોગ કરી શકાય છે. સાઈકલ લો-ઈમ્પેક્ટ એક્સર્સાઈઝ છે જેને દરેક ઉંમરના લોકો કરી શકે છે.