લાઈફસ્ટાઈલ / ભર ઉનાળે નાકમાંથી નસકોરી ફૂટે છે? તો હોઇ શકે છે આ બીમારી, અપનાવો આ ઉપાય

હવે ગરમી પોતાનો પ્રભાવ બતાવી રહી છે . આ ઋતુ શરૂ થતાની સાથે જ આરોગ્યને અનેક પ્રકારની મુશ્કેલીઓ થવા લાગે છે. ઘણાં લોકોને નાકમાંથી લોહી આવવાની ફરિયાદ રહે છે.

ખાસ કરીને જ્યારે તાપમાન ઝડપથી વધે ત્યારે આ સમસ્યા વધી જાય છે. પરંતુ શું તમે ક્યારેય વિચાર્યું છે કે નાકમાંથી લોહી આવવું ફક્ત ગરમીનું પરિણામ નથી પણ કોઈ ગંભીર બીમારીનો સંકેત પણ હોઈ શકે છે? તેને અવગણવી હાનિકારક બની શકે છે. તો ચાલો જાણીએ કે નાકમાંથી લોહી આવવું કઈ બીમારીઓનો સંકેત હોઈ શકે છે.

ગરમીમાં નાકમાંથી લોહી આવવાનું કારણ:

• હવામાં ભેજની અછત

ગરમીના સમયમાં નાકમાંથી લોહી આવવું એ શારીરિક કે પર્યાવરણ સંબંધિત કારણોથી થતી સામાન્ય સમસ્યા છે. ગરમી વધતાં વાતાવરણમાં ભેજ ઘટી જાય છે, જેના કારણે નાકની અંદરની ત્વચા સુકાઈ જાય છે. આથી નાકમાંથી લોહી નીકળી શકે છે.

• ખૂબ વધુ ગરમી

જ્યારે ખૂબ ગરમી પડે છે, ત્યારે શરીરનું તાપમાન વધી જાય છે. આથી નાકની લોહીની નસો ફૂલવા લાગે છે અને થોડું દબાણ પણ નાસિકાથી લોહી બહાર આવવાનું કારણ બની શકે છે.

• એલર્જી, ઉધરસ કે છીંક

ગરમીમાં ધૂળ, પ્રદૂષણ અને બીજા એલર્જી પેદા કરનારા તત્ત્વો વધી જાય છે, જેનાથી નાકની અંદરના પડ પર અસર થાય છે. સતત ઉધરસ કે છીંક આવવાથી નાકની અંદરની નસો છોલાય જાય છે અને લોહી આવતું થઈ શકે છે.

નાકમાંથી લોહી કયા રોગનો સંકેત આપી શકે છે?

ગરમીમાં નાકમાંથી લોહી આવવું સામાન્ય હોય શકે છે, પણ જો એ વારંવાર થાય અથવા વધુ માત્રામાં લોહી નીકળે, તો તે હાઈ બ્લડ પ્રેશરનો સંકેત હોઈ શકે છે. જો તમને વારંવાર નાકમાંથી લોહી આવતું હોય, તો સાવચેત થઈ જાવ. બ્લડ પ્રેશર વધવાથી લોહીની નસો પર દબાણ વધે છે અને નાકમાંથી લોહી આવવાની શક્યતા વધી જાય છે.

આ બીમારીઓમાં પણ નાકમાંથી લોહી આવે છે

• જો નાકમાં કોઈ ચેપ હોય, તો પણ લોહી આવી શકે છે. આ ચેપ વાયરલ કે બેક્ટેરિયલ હોઈ શકે છે.
• બ્લડ ડિસઓર્ડર જેવા કે થ્રોમ્બોસાયટોપેનિયા અથવા હિમોફિલિયા જેવી સ્થિતિમાં પણ નાકમાંથી લોહી આવી શકે છે.
• એલર્જી કે સાઇનસાઇટિસ જેવી બીમારીઓમાં પણ નાકમાંથી લોહી આવતું હોય છે.

વધુ વાંચો: જો રાત્રે ઊંઘતી વખતે પરસેવો આવતો હોય તો ચેંતી જજો, હોઈ શકે આ 6 મોટી બીમારીઓના સંકેત

જ્યારે નાકમાંથી લોહી આવે ત્યારે શું કરવું?

• માથું થોડીક ઊંચાઈ પર રાખો જેથી લોહી ગળામાં ન જાય.
• નાકને હળવે દબાવો જેથી નસો પર દબાણ બને અને લોહી બંધ થઈ શકે.
• નાકની ઉપર અથવા ગળા પર ઠંડું પાણી મૂકો કે આઈસ પેક રાખો, જેથી નસો સંકુચિત થાય અને લોહી આવવાનું બંધ થઈ શકે.
• ઘરમાં ભેજ જાળવવા હ્યુમિડિફાયરનો ઉપયોગ કરો જેથી નાકની અંદર ની ત્વચા સુકાઈ ન જાય.
• જો નાકમાંથી લોહી આવવાનું ફરી શરૂ થાય કે વધારે માત્રામાં લોહી આવે, તો તરત ડૉક્ટરની સલાહ લો.

Disclaimer: આરોગ્ય અને સુખાકારી હેઠળ પ્રકાશિત સામગ્રી સામાન્ય જાણકારી ઉપલબ્ધ કરાવે છે. અહીં પ્રકાશિત લેખ તબીબ, વૈદ્ય, નિષ્ણાત અને રિસર્ચ આધારિત નિષ્કર્ષ પર છે. તમામ નિર્દેશોનું પાલન કરી વાંચકોની જાગૃતિ વધારવાના હેતુથી આ સામગ્રી તૈયાર કરાઈ છે. આ લેખ કોઈ પણ રીતે યોગ્ય ઉપચારનો વિકલ્પ નથી, વધુ જાણકારી માટે હંમેશા નિષ્ણાત કે આપના ચિકિત્સકની સલાહ લેવી. vtvgujarati.com આ જાણકારી માટે જવાબદારીનો દાવો કરતું નથી.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ