લૉકડાઉન / રાજ્યમાં લાયસન્સવાળી લિકર શોપને આ તારીખ બાદ ખોલવાની મળી શકે છે છૂટ

• સરકાર લાયસન્સ વાળી લિકર શોપ ખોલવાને આપી શકે છે મંજૂરી
• પરમિટવાળા લોકોને ટુંક સમયમાં દારૂ મળી રહે તેવા એંધાણ
• પ્રથમ લૉકડાઉનથી તમામ લાયન્સવાળી લિકર શોપ બંધ છે

કોરોના વાયરસના કારણે સરકાર દ્વારા લૉકડાઉન જાહેર કરાયું છે. સરકાર દ્વારા ચોથા તબક્કાના લૉકડાઉનમાં સલૂન શોપ ખોલવાની મંજૂરી આપી હતી. જોકે હજુ સુધી રાજ્યમાં લાયન્સવાળી લિકર શોપ(દારૂની દુકાન) ખોલવાની પરવાનગી આપવામાં આવી નથી. રાજ્ય સરકાર 31 મે સુધીમાં અથવા ત્યારબાદ તરત દારૂની દુકાનોને ખોલવાની છૂટ આપી શકે છે. 

ગુજરાતમાં અંદાજિત 5 સ્ટાર હોટલોમાં લિકર શોપ છે. 70 જેટલી હોટલોની સાથે સરકાર માન્ય દારૂની દુકાનો નોંધાયેલી હોય છે, ત્યાંથી પરવાના ધારકોને નક્કી કરેલી માત્રામાં યુનિટ દીઠ દારૂ મળી રહે છે. દારૂનો પરવાનો મેળવવા માટે આરોગ્યનો હેતુ હોવો જરૂરી છે. સરકારી સિવિલ હોસ્પિટલોમાં તપાસ કરી નિયમ મુજબ દારૂની પરમિટ આપવામાં આવે છે. રાજ્યમાં આવા 27 હજાર જેટલા લોકો દારૂ ખરીદવાની અને બંધબારણે પીવાની પરમિટ ધરાવે છે.

હોટલોને છૂટ મળશે તો દારૂની દુકાનો પણ ખુલશે

હાલ માત્ર કોરોનાની કામગીરી સાથે જોડાયેલી હોટલોને જ દર્દીઓની સુવિધા માટે ખોલવાની મંજૂરી આપવામાં આવી છે. હવે હવાઇ મુસાફરી શરૂ થતા પ્રવાસીઓ માટે રહેવાની વ્યવસ્થા જરૂરી છે. જેને લઇને હવે હોટલો ખોલવાની છૂટ આપવામાં આવી શકે છે. અત્યાર સુધી હોટલોને મંજૂરી ન હોવાથી તેની સાથે સંકળાયેલી દારૂની દુકાનોને સરકાર ખોલવાની મંજુરી આપતી ન હતી. પરંતુ હવે પરમિટવાળા લોકોને દારૂ મેળવવાની મુશ્કેલીનો ટૂંક સમયમાં અંત આવી શકે છે.