વિવાદ / સિક્યોરિટી ગાર્ડે વિદ્યાર્થી પાસે દારૂ મંગાવતા LG હોસ્પિટલમાં હોબાળો

એલ.જી. હોસ્પિટલમાં અવારનવાર અનેક વિવાદો સામે આવી રહ્યા છે ત્યારે ગઇ કાલે વધુ એક વિવાદ સામે આવ્યો છે. એલ.જી. હોસ્પિટલમાં ફરજ બજાવતા સિક્યો‌િરટી ગાર્ડે એક સગીર પાસે દેશી દારૂ મંગાવ્યો હતો. સૂત્રોના જણાવ્યા અનુસાર એલ.જી.હોસ્પિટલના આઇસીયુમાં મહેશ ચુનારા નામનો દર્દી દાખલ છે.

ગઇ કાલે મહેશ ચુનારાનાં પરિવારજનો તેમજ  તેમનો ધોરણ-૧૦માં અભ્યાસ કરતો પુત્ર હોસ્પિટલમાં હાજર હતાં. મહેશનો પુત્ર આઇસીયુ રૂમમાં જતો હતો ત્યારે સિક્યો‌િરટી ગાર્ડ તરીકે ફરજ બજાવતા સંતોષસિંહ રાજપૂતે તેને રોક્યો હતો. મહેશનો પુત્ર રૂમમાં જવા માટેની જીદ કરતો હતો ત્યારે સંતોષસિંહે તેને દેશી દારૂ લઇ આવવાનું કહ્યું હતું.
 

સંતોષસિંહે મહેશના પુત્રને કહ્યું હતું કે તું દેશી દારૂની પોટલી લઇને આવીશ તો જ તને આઇસીયુમાં જવા દઇશ. સંતોષસિંહની વાત સાંભળીને સગીર દેશી દારૂની પોટલી લેવા જવા માટે તૈયાર થઇ ગયો હતો. સંતોષે દારૂ ક્યાંથી લાવવાનું તે સ્થળ પણ સગીરને બતાવ્યું હતું. સગીર દેશી દારૂની પોટલી લઇને હોસ્પિટલમાં આવ્યો હતો અને તે સંતોષને આપી દીધી હતી.

સંતોષ ચાલુ ડ્યૂટી પર હોસ્પિટલમાં દારૂની પોટલી પીવા જતાં અન્ય એક સિક્યો‌િરટી ગાર્ડની નજર પડી ગઇ હતી. સિક્યો‌િરટી ગાર્ડે તેને રોકી લીધો હતો અને સીધો એલ.જી.હોસ્પિટલના પોલીસ ટેબલ પાસે લઇ ગયો હતો.

આ ઘટના દરમિયાન હોસ્પિટલમાં હાજર ખોખરાના કોર્પોરેટર અને વોટર સપ્લાય ડિપાર્ટમેન્ટના ડેપ્યુટી ચેરમેન નયન બ્રહ્મભટ્ટે જણાવ્યું છે કે સિક્યો‌િરટી ગાર્ડ સંતોષસિંહે એક સગીર પાસે દેશી દારૂની પોટલી મંગાવી હતી. અન્ય સિક્યોરિટી ગાર્ડ તેને પકડીને પોલીસ ટેબલ લાવ્યા હતા. આ ઘટના અંગે હોસ્પિટલના સુપરિન્ટેન્ડેન્ટને ફોન કરીને જાણ કરાઇ હતી.

દરમિયાન મ્યુનિસિપલ સંચાલિત એલજી હોસ્પિટલમાં ગુજરાત સિક્યોરિટીને ગત તા.૧ એપ્રિલ, ર૦૧૯થી બે વર્ષ માટે સિક્યોરિટીનો કોન્ટ્રાક્ટ અપાયો છે. આ એજન્સીના હોસ્પિટલ અને કોલેેજ એમ બંને સ્થળે મળીને ૧૪ર સિક્યોરિટી ગાર્ડ ફરજ બજાવે છે, જ્યારે રાતના સમયે આ બંને સ્થળોએ કુલ ૪ર સિક્યોરિટી ગાર્ડ ફરજ બજાવે છે.

સંતોષ રાજપૂત સ્ટાફના ચેકિંગ દરમિયાન ઝડપાયો હતો, જોકે મ્યુનિસિપલ સત્તાવાળાઓનો એલજી હોસ્પિટલમાં ૬૮ સીસીટીવી કેમેરા હોઇ તમામ સીસીટીવી કેમેરા કાર્યરત હોવાનો દાવો હોવા છતાં સંતોષ રાજપૂતની હરકત સીસીટીવી કેમેરામાં ઝડપાઇ ન હતી.

એલજી હોસ્પિટલના સત્તાવાળાઓએ સંતોષ રાજપૂતને ફરજમાંથી ટર્મિનેટ કર્યો છે, પરંતુ હજુ સુધી તંત્રે તેની સામે પોલીસ ફરિયાદ કરી નથી. આ અંગે એલજી હોસ્પિટલના સુપરિટેન્ડેન્ટ સંજય ત્રિપાઠીને પૂછતાં તેઓ કહે છે કે અત્યારે આ મામલો એજન્સી સાથે સંકળાયેલો હોઇ અમે ગુજરાત સિક્યોરિટી એજન્સીના સંચાલકોને નોટિસ ફટકારી છે.

મ્યુનિસિપલ કોર્પોરેશનના હોસ્પિટલના ડેપ્યુટી મ્યુનિસિપલ કમિશનર અને કમિશનરને આ સમગ્ર બાબતથી વાકેફ કરીને આગામી દિવસોમાં કસૂરવાર સિક્યોરિટી ગાર્ડ સામે પોલીસ ફરિયાદ કરવા અંગે નિર્ણય લેેવાશે.