NO ENTRY / કેન્દ્રીય ટેલિકોમ મંત્રી રવિશંકરને લખાયો પત્ર, ભારતમાં આ બંને ચીની કંપની પર મૂકાય પ્રતિબંધ

• CAITએ કરી કેન્દ્રીય ટેલિકોમ મંત્રી સમક્ષ માંગ, ચીનને 5જી થી રાખવામાં આવે દૂર 
• ચીની કંપનીઓ ભારતના સાર્વભૌમત્વ અને સંપ્રભુતા માટે ખતરો છે એવો આક્ષેપ 
• અમેરિકા અને બ્રિટન જેવા દેશોમાં પણ બે કંપનીઓ પર લાગઈ ચૂક્યો છે પ્રતિબંધ 

છેલ્લા ઘણા સમયથી ચીન તેની અલગ અલગ કરતૂતો માટે જગતના ચોરે અને ચૌટે ખૂબ જ વગોવાઈ ચૂક્યું છે. અમેરિકા અને અન્ય દેશો ચીનની સરકાર પર કોરોના ફેલાવાનો આરોપ લગાડી રહ્યા છે, તો વિશ્વ ભરમાં પગપેસારો કરી ચૂકેલી ચીની કંપનીઓ પણ ઓચી નામચીન નથી. જાસૂસીના આરોપસર ઘેરાયેલી ચીનની કુખ્યાત કંપનીઓ હુઆવે અને ઝેડટીઇને અમુક સમય પહેલા ભારતમાં  5જીની ટ્રાયલમાં ભાગ લેવાની અનુમતિ મળી હતી જો કે તેનો વગોવાયેલો ઇતિહાસ જોતાં તેના પર પ્રતિબંધની દેશમાં માંગણીઑ ઉઠી રહી છે. 

ડેટા સુરક્ષા માટે જરૂરી છે પ્રતિબંધ 

CAIT એટલે કે કૉંફડેરેશન ઓફ ઓલ ઈન્ડિયા ટ્રેડર્સે કેન્દ્રીય સૂચના મંત્રીને મોકલેલા પત્રમાં જણાવ્યું હતું કે દેશમાં ડેટા સુરક્ષા માટે ચીની કંપનીઓનો રેકોર્ડ ખરાબ છે. આ ચીજ દેશના સાર્વભૌમત્વ અને સંપ્રભુતાને અસર કરે છે માટે આ બંને કંપનીઓને ભારતના 5 જીના ટ્રાયલ અને રોલ આઉટ પ્રક્રિયા માટે બેન કરવામાં આવે તે અતિ જરૂરી છે અને દેશના પણ હિતમાં છે. 

ફાઇવ જી નેટવર્કમાં ન થાય ચીની ઉપકરણોનો ઉપયોગ 

CAITના  રાષ્ટ્રીય અધ્યક્ષ બી.સી. ભરતીયાએ જણાવ્યું હતું કે, ચીનના હ્યુઆવે અને ઝેડટીઇ કોર્પોરેશનને ભારતમાં 5 જી નેટવર્ક રોલઆઉટમાં ભાગ લેવા પર તાત્કાલિક અસરથી પ્રતિબંધ મૂકી દેવો જોઈએ. આ સાથે સરકારે એ પણ સુનિશ્ચિત કરવું જોઈએ કે આ બંને ચીની કંપનીઓની ટેકનોલોજી અને ઉપકરણોનો ઉપયોગ ભારતમાં 5 જી નેટવર્ક રોલઆઉટમાં ભાગ લેવા વળી કોઈ બીજી કંપની પણ ન જ કરી શકે. 

ચીની કંપનીઓને મળશે લાભ, ભારતીય કંપનીઓને નુકસાન 

ભરતીયાના કહ્યાનુસાર, એવું પણ જાણવા મળ્યું છે કે હ્યુવાવે અને ઝેડટીઇ બંને, ચીની કંપનીઓએ ભારતમાં રોલ કરવામાં આવતા 5 જી નેટવર્ક ઈન્ફ્રાસ્ટ્રક્ચરમાં ભાગ લેવા માટે અરજી કરી હતી. ગયા વર્ષે જૂનમાં સરકારે લીધેલા વિવિધ નિર્ણયોને ટાંકીને તેમણે જણાવ્યું હતું કે જો ચીની કંપનીઓને આની મંજૂરી આપવામાં આવશે તો તેઓને 5 જી નેટવર્ક માટે જરૂરી હાર્ડવેર અને સોફ્ટવેરના સાધનો બનાવવાનો લાભ મળી શકે છે. આ પગલાથી ભારતીય ટેલિકોમ ક્ષેત્રને કબજે કરવાનો માર્ગ ચીની કંપનીઓ માટે મોકળો થશે, અને ઉલટું જો પ્રતિબંધ મૂકવામાં આવે તો ભારતીય કંપનીઓને તેમની તકનીકનો યોગ્ય રીતે ઉપયોગ કરવાની તક મળશે.