ગાંધીનગર બાર એસોસિએશન દ્વારા PM મોદીને પત્ર લખી હાઇકોર્ટની કાર્યવાહી ગુજરાતી ભાષામાં કરવા રજૂઆત કરાઇ છે.
હાઇકોર્ટની કોર્ટ કાર્યવાહી ગુજરાતીમાં કરવા રજુઆત
ગાંધીનગર બાર એસોશીએશન દ્વારા PM મોદીને પત્ર
પક્ષકારો અને વકીલોને મુશ્કેલી પડતી હોવાની રજુઆત કરાઈ
ગાંધીનગર બાર એસોસીએશન દ્વારા વડાપ્રધાન નરેન્દ્ર મોદીને પત્ર લખીને ગુજરાત હાઇકોર્ટની કોર્ટની કાર્યવાહીમાં ગુજરાતી ભાષાનો સમાવેશ કરવા માંગ ઉઠાવાઈ છે. કોર્ટમાં અંગેજી ભાષામાં રજૂઆત, દલીલો દરમિયાન મુશ્કેલી પડતી હોવાના ઉલ્લેખ સાથે આ આંગે ઘટતું કરવા જણાવાયું છે.
ગુજરાતી ભાષામાં કોર્ટ કાર્યવાહીને મંજૂરી આપવા રજૂઆત કરી
ગુજરાત હાઇકોર્ટમાં હાલ તમામ કાર્યવાહી અંગ્રેજી ભાષમાં ચાલે છે. જેને લઇને પક્ષકારો તથા વકીલોને ઘણી મુશ્કેલીઓનો સામનો કરવો પડે છે. વધુમાં તેમણે ઉમેર્યું હતું કે, ગુજરાત હાઇકોર્ટ દ્વારા આપવામાં આવતા ઓડર્સ તથા જજમેન્ટમાં અંગ્રેજી ભાષાનો જ ઉલ્લેખ કરવામાં આવે છે. ઉપરાંત અપીલ તથા રીવીઝન, ક્રિમીનલ સહીતની અરજીઓ પણ અંગેજી ભાષામાં જ હોય છે. જેને પગલે દલીલ પણ અંગ્રેજી ભાષામાં જ કરવી પડે છે આથી અંગેજી ભાષાના અપૂરતા જ્ઞાન અથવા ઓછી પ્રેકસટીશને લીધે અવરોધો ઊભા થાય છે. વધુમાં અમુક રાજ્યમાં હાઇકોર્ટમાં પ્રાદેશીક ભાષામાં કાર્યવાહી થાય છે તો આથી ગુજરાતમાં પણ અંગ્રેજી ભાષામાંથી મુક્તિ અપાવવા માંગ ઊઠાવાઈ છે.
અગાઉ રાજ્યપાલને કરાઇ હતી રજૂઆત
ગુજરાત હાઇકોર્ટમાં ગુજરાતી ભાષાને સત્તાવાર ભાષા તરીકે સમાવિષ્ટ કરવાની માંગ સાથે ગુજરાત બાર કાઉન્સીલના પૂર્વ ચેરમેન અનિલ સી.કેલ્લા અને ભરત ભગત સહિતના સભ્યોએ આગાઉ રાજ્યપાલ સમક્ષ માંગ ઉઠાવી હતી. જેમાં જણાવ્યું હતું કે રાજ્યમાં આશરે એક લાખથી વધુ વકીલો બાર કાઉન્સીલ ઓફ ગુજરાતમાં નોંધાયેલા છે. જેમાંથી આશરે પાંચ હજાર વકીલો ગુજરાત હાઇકોર્ટમાં વકીલાત કરે છે. બાકીના વકીલો કાયદાકીય જ્ઞાન અને અનુભવ ધરાવતાં હોવા છતાં પણ હાઇકોર્ટમાં માત્ર અંગ્રેજી ભાષાનો ઉપયોગ થતો હોવાથી તેઓ હાઇકોર્ટમાં વકીલાત કરી શકતા નથી. પરિણામે, ગુજરાતની પ્રજાને સસ્તો અને ઘરઆંગણે ન્યાય આપવામાં અવરોધ થાય છે. ગુજરાતી ભાષામાં કેસ ચલાવવા દેવામાં આવે તો અસીલોને પણ સસ્તો તેમજ ઝડપી ન્યાય ઉપલબ્ધ થઇ શકે.' તમને જણાવી દઇએ કે, અનુચ્છેદ 384 (2) હેઠળ રાજ્યપાલ પાસે ગુજરાતીમાં સુનાવણી કરવાની મંજૂરી આપવાની સત્તા રહેલી છે. તેમ રજૂઆતમાં ઉલ્લેખ કરાયો છે.