Happy Birthday Amdavad! / ડિયર અમદાવાદ! આઈ લવ યુ... ના તું સુંદર, સ્માર્ટ અને વિશાળ છે એટલે નહીં પરંતુ...

ડિયર અમદાવાદ! 
આઈ લવ યુ! માત્ર એટલા માટે નહીં કે તું સુંદર છે. એટલા માટે પણ નહીં કે તું સ્માર્ટ છે. એટલા માટે પણ નહીં કે તું વિશાળ છે. 

પણ એટલા માટે કે તે અમને સપના જોતાં શિખવાડ્યું છે! એટલા માટે કે તે એ સપનાઓ માટે સંઘર્ષ કરતાં શિખવાડ્યું છે. દેશના કોઈપણ ખૂણેથી આંખોમાં સપના લઈને આવેલા દરેક યુવાનને તે આવકાર્યો છે. સાબરમતીના કિનારાની જેમ બાહો ફેલાવીને. મજૂરથી લઈને મેનેજર સુધીના તમામને તે સાચવ્યા છે. સહન કર્યા છે. તે એમની નિષ્ફળતા અને એમની આંખોનાં આંસુ જોયા છે તે એમના પ્રમોશન થતાં પણ જોયા છે.
      તે આયશા જેવી દીકરીઓને જિંદગીથી હારી જતી પણ જોઈ છે અને તે IIM અને NID માં જિંદગી બનાવતા યુવાનોને પણ જોયા છે. તે દહેશત અને ડર .ફેલાવનારાઓ પણ જોયા અને તે રિવરફ્રન્ટના કિનારે પ્રેમી પંખીડાઓને બાહો ફેલાવતા જોયા છે. 

અરે એટલું જ નહીં તે તો આતંકીઓના હુમલા પણ ખમી લીધા! તે એમને ૧૪ વર્ષે સજા પામતા પણ જોયા. પણ તું એમ જ ઊભું રહ્યું અમદાવાદ! તું પોળોમાં જીવતું રહ્યું. તું નદીની રેતમાં રમતું રહ્યું. તું અમારા દિલોમાં ધબકતું રહ્યું.

લોકો આવીને ગયા. શાસકો આવીને ગયા. પેન્ડેમીક  આવીને ગયા, આફતોના અનેક વાવાઝોડા આવીને ગયા. પણ તું નવરાત્રિમાં ઝૂમવાનું ન ભૂલ્યું. તું ઉત્તરાયણમાં અગાસીએથી થતી ચિચિયારીઓ ન ભૂલ્યું. તું માણેકચોકમાં મોડી રાત્રે થતી ઉજાણી ન ભૂલ્યું. તું લાલ દરવાજે થતી શોપિંગ ન ભૂલ્યું તું સિંધુ ભવન રોડ પર થતી ડ્રાઈવ ન ભૂલ્યું. તું...... ન ભૂલ્યું!
!
તો હવે તું જ કહે અમદાવાદ! કે તારી પાસે રહેલો કોઈ માણસ તને ભૂલી શકે ખરો? 

આજે તારો બર્થ ડે છે! 611 મો બર્થ ડે! અને મને કહી જ દેવા દે આઈ લવ યુ અમદાવાદ! ફોરેવર... 

 

 

 

 

View this post on Instagram

 

 

 

 

 

 

 

 

 

 

 

A post shared by VTV Gujarati News and Beyond (@vtv_gujarati_news)

આજે આપણા વ્હાલા અમદાવાદ શહેરના બર્થ ડે પર જાણો કેટલીક ખાસ વાતો, જે આ શહેરને ખાસ બનાવે છે. 

પુરાતત્વીય પ્રમાણાનુસાર અમદાવાદનું જૂનું નામ આશાપલ્લી કે આશાવલ તરીકે ઓળખાતું હતું. ત્યારે અહીંના મૂળ શાસક એક ભીલ સરદાર હતા. ત્યાર પછી કર્ણદેવ સોલંકીએ તેઓને હરાવ્યા અને આ પ્રદેશનું નામ કર્ણાવતી તરીકે ઓળખાવા લાગ્યું. 

સોલંકી કાળ એટલે ગોલ્ડન પિરિયડ
સોલંકી કાળમાં ગુજરાતનો ઘણો વિકાસ થયો હતો. ત્યાર બાદ વાઘેલા વંશનું શાસન આવ્યું અને પછી કર્ણાવતી પર દિલ્હી સલ્તનતનું  શાસન આવ્યું. 

સુલતાન અહમદશાહે પોતાના પ્રથમ પાટનગર તરીકે અમદાવાદને રાખ્યું અને તેને પોતાના નામ પરથી અહમદાબાદ નામ આપ્યું. 

એક કથા પ્રમાણે અહમદશાહ જ્યારે સાબરમતીના કિનારે ફરતા હતા ત્યારે તેમણે એક અનોખી ઘટના જોઈ. એક સસલું કૂતરાનો પીછો કરી રહ્યું હતું. આ ઘટના પછી અહમદશાહને લાગ્યું કે આ જ વિસ્તાર પાટનગરની સ્થાપના માટે સૌથી યોગ્ય છે. 

આ ઘટના માટે એક જાણીતી કહેવત પણ છે કે જબ કુત્તે પે સસ્સા આયા તબ બાદશાહને શહર બસાયા! ૨૬ ફેબ્રુઆરી ૧૪૧૧ ના રોજ બાદશાહ અહમદશાહે આ શહેરનો પાયો માણેક બુર્જ પાસે નાખ્યો હતો. 

પૂર્વનું માન્ચેસ્ટર બન્યું 
ત્યાર પછી મહંમદ બેગડા ૧૨ દરવાજાઓ અને કિલ્લો બનવડાવ્યો. મુઘલ કાળ દરમિયાન અહી ઔધોગિક વિકાસ થયો. ત્યારે અહીંથી વિદેશમાં કાપડ મોકલવામાં આવતું હતું. એક સમયે તો આ શહેર પૂર્વનું માન્ચેસ્ટર કહેવાતું હતું.  અંગ્રેજ શાસનમાં અહી ઘણી કાપડની મિલો બની અને કાપડ માટે દુનિયાભરમાં સુપ્રસિદ્ધ બની ગયું હતું. અંગ્રેજોએ અહીં નગરપાલિકા બનાવી હતી અને ખાસ્સો વિકાસ કર્યો હોવાના પુરાવા છે. 

આઝાદીનું એપીસેન્ટર
મહાત્મા ગાંધીએ પોતાના જીવનનો ઘણો સમય અહીં કાઢ્યો હોવાથી અંગ્રેજો સામેની આઝાદીની લડાઈમાં પણ અમદાવાદ એક રીતે એપીસેન્ટર બની રહ્યું હતું. કોચરબ આશ્રમ અને સાબરમતી આશ્રમ મહાત્મા ગાંધી અને બીજા ઘણા સ્વાતંત્ર્ય સેનાનીઓની કર્મભૂમિ બન્યું હતું. 

યુનેસ્કોએ આ શહેરને દેશનું પહેલું વર્લ્ડ હેરિટેજ સિટી ઘોષિત કર્યું હતું કારણ કે અહીં આર્કિટેક્ટનાં બેનમૂન સ્થાપત્યો આજ સુધી ટકી રહ્યા છે. સ્થાપત્ય કળા ઉપરાંત દરેક ધર્મના વિશિષ્ટ સ્થાપત્યો અહીં આવેલા છે. 

જામા મસ્જિદ હોય કે હઠીસિંહના દેરા કે કેમ્પ હનુમાન અને વૈષ્ણોદેવી મંદિર જેવા કેટલાય ધાર્મિક સ્થળો અહીંની વિવિધતામાં એકતા અને સામાજિક સમરસતા પણ બતાવે છે.

વર્લ્ડ હેરિટેજ સિટી અમદાવાદમાં અચૂક મુલાકાત લેવા જેવા ૧૦ સ્થળો 
૧)સાબરમતી આશ્રમ 
૨)સીદી સૈયદની જાળી 
૩)લાલ દરવાજા, દિલ્હી દરવાજા (કુલ ૨૧ દરવાજા)
૪)રિવરફ્રન્ટ 
૫)ભદ્રનો કિલ્લો 
૬)હઠીસિંહના દેરા 
૭)ઇસરો
૮)સાયન્સ સિટી 
૯)હઠીસિંહના દેરા 
૧૦)રાણીનો હજીરો