દિ..વાળીએ / નવા વર્ષે બીજું કાઈ કરીએ કે નહીં પરંતુ આ એક કામ જરૂર કરીએ...કોઈના જીવનમાં રંગો ભરીએ

- કવન વી. આચાર્ય

કોરોના મહામારી પછીની આ પહેલી દિવાળી છે, હાલો દિલ ખોલીને ઉજવીએ....આવા શબ્દો આજકાલ ચોરેને ચૌટે સાંભળવા મળી રહ્યા છે.2 વરહ બાદ જાણે ખોળીયામાં જીવ પાછો આવ્યો હોય તેવી સ્થિતિ છે. બજાર પણ માનવ મહેરામણથી હકડેઠઠ ભરાયેલું જોવા મળ્યું.

તો જે લોકોએ ગયા વર્ષે વીડિયો કોલ કરીને વતનમાં રહેતા પરિવારજનો સાથે દિપાવલી અને નવા વરહને આવકાર્યું હતું એ લોકોએ ચાલુ વર્ષે માદરે વતન ભણી ગયા છે. દેશભરમાં કોરોના સંકટ હળવું થતું જાય છે અને જિંદગી ફરી ધબકતી થતી જાય છે. સરકાર પણ કોવિડ નિયમોમાં ધીમે-ધીમે છૂટછાટ આપી રહી છે, કોરોના કાળમાં આપણે ઘણુ બધુ ગુમાવ્યું છે તેની પાસેથી શીખવા જેવી બાબતો પણ ઘણી છે. પરંતુ 100 વાતની એક વાત....આ વર્ષે દિવાળી ખરેખર દિ...વાળે એવી છે.
 

સબરસથી શરૂ થતી નવા વરહની સવાર
દિપાવલીના દિવસો એટલે પરિવાર સાથે મળી ભરપૂર આનંદ-ઉલ્લાસ કરવાના દિવસો. નાના બાળકથી શરૂ કરીને ઘરના મોભી સુધી સૌ આ દિવસો બહુ મસ્તીથી ઉજવતા હોય છે. વિક્રમ સંવંત મુજબ બેસતું વર્ષ “સબરસ” અને “અળસ કાઢવાની” પ્રથા સાથેની નવી નક્કોર સવાર શરૂ થાય છે. ‘અળશ જાય અને લક્ષ્મીજી આવે એ પરંપરા આજે પણ ગામડાઓ સાચવીને બેઠા છે.

સમય બદલાયો અને પરંપરા પણ બદલાઈ
થોડા વર્ષો પહેલાના ભૂતકાળની ઝાંખી કરીએ તો દિવાળી અને સાતમ-આઠમ જેવા ઉત્સવોના દિવસો નવા “લૂગડાં”(કપડા) ખરીદવાનો રીવાજ હતો. ગામડાની સંસ્કૃતિ મુજબ દેવદર્શન કરીને સગાં-વહાલાંના ઘેર જઈને રામ...રામ કે જય શ્રી કૃષ્ણ કરી મોઢું મીઠું કરાતું. સમય બદલાતા તેનું સ્થાન ઈ-મેલ facebook whatsapp instagram પર “Happy Diwali” “Happy new     year”   એ લીધું છે.
 

આંગણે દીવડા જરૂર મુકાય છે પરંતુ અંતરના દીવડા હોલવાઈ ગયા છે
ભીંત ભડાકા ટીલડી દેરાણી-જેઠાણી ભો’ચકેડી લવિંગીયાની જગ્યાએ માનવ શરીર અને વાતાવરણને નુકશાન પહોચાડતા ફટાકડા આવ્યા છે. દરેક જગ્યાએ સુપર માર્કેટની સીસ્ટમ શરૂ થતા “બજાર”ની વ્યાખ્યા જ ભૂંસી નાંખી છે. નવા વર્ષની ઉજવણી રૂપે આંગણે દીવડા મુકવામાં જરૂર આવે છે પરંતુ અંતરમાં પથરાયેલા અજવાળા હોલવાતા જાય છે. આ વાત આખી રાત મોબાઈલ “મંતરતી” પેઢી ક્યાં જાણે છે..? પણ ખેર...કોરોના હજી ગયો નથી, માત્ર હળવો પડ્યો છે માટે આ વર્ષે પણ આપણે દિપાવલી અને નવા વર્ષને સાવચેતી પૂર્વક ઉજવીએ અને નવા વર્ષે કોઈકના જીવનમાં પણ ખુશીઓના રંગ ભરવાનો સંકલ્પ કરીએ એજ આશ સાથે, સૌને નવા વરહના...રામ...રામ...

(નોંધ: ઉપરોક્ત વિચારો લેખકના વ્યક્તિગત અભિપ્રાય છે)