ટેકનો કંપની લેનોવોએ દુનિયાનું સૌથી ઓછા વજનનું લાઇટવેઇટ લેપટોપ રજુ કર્યું છે. જેનું નામ Lavie Pro Mobile છે. આ લેપટોપનું વજન માત્ર 1.85 પાઉન્ડ એટલે કે 816 ગ્રામ છે. લેપટોપમાં 13 ઇંચના ડિસ્પ્લે સાથે પાવરફુલ પ્રોસેસરનો સપોર્ટ મળશે. લેપટોપની ઝલક અમેરિકાના લાસ વેગાસમાં યોજાનારા ધી કન્ઝયુમર ઇલેકટ્રોનિકસ શો (સીઇએસ) 2020માં જોવા મળશે.
લેનોવોએ આ લેપટોપ માટે જાપાનની NEC કંપની સાથે ભાગીદારી કરી છે. કંપનીએ આ લેપટોપની કિંમત 1,599 ડોલર (લગભગ 1,15,253 રૂપિયા) રાખી છે. જોકે, લેનોવોએ લેપટોપને ભારતમાં લોન્ચ કરવા બાબતે કોઇ સત્તાવાર માહિતી શેર કરી નથી. આ લેપટોપ માર્ચ ,2020થી અમેરિકાના માર્કેટમાં વેચાણ માટે મુકાશે.
13.3 ઇંચની એચડી ડિસ્પ્લેનું રેઝોલ્યુશન 1920 x 1080 પિક્સેલ્સ છે. તેમાં 8 જીબી રેમ અને ઇન્ટેલ યુએચડી 620 જીપીયુ સાથે 512 જીબી સ્ટોરેજ છે. લેપટોપના કીબોર્ડ વિશે વાત કરવામાં આવે તો કંપનીએ તેને જાપાની ડિઝાઇન આપી છે. કીબોર્ડ પરની વિવિધ પ્રકારની કીના કારણે યુઝર્સ ઝડપથી ટાઇપ કરી શકે છે. આ સિવાય યુઝર્સને ટચપેડનો સપોર્ટ પણ મળશે. કનેક્ટિવિટીની વાત કરવામાં આવે તો કંપનીએ આ લેપટોપમાં યુએસબી 3.1 ટાઇપ-સી, 2 પોર્ટ, એચડીએમઆઇ 1.4 અને માઇક્રો એસડી કાર્ડ સ્લોટ જેવી સુવિધાઓ આપી છે. આ સિવાય આ ડિવાઇસમાં યુઝર્સને 49 વોટની બેટરી મળશે.કંપનીએ દાવો છે કે લેપટોપની બેટરી 15 કલાક ચાલશે.