ઉનાળામાં સૌથી વપરાતા એવા લીંબુના ભાવ આસમાને, લીંબુ શરબત પીવુ હવે મોંઘુ, ચોમાસાને લીધે ફ્લાવરીંગ મોડુ થતા આવક ઘટી
ઉનાળા પહેલા લીંબુની આવક ઘટી
રિટેલ બજારમાં લીંબુના ભાવ રુ.100/કિલો
વરસાદ હોવાથી ફ્લાવરિંગ મોડુ થતા ઉત્પાદન ઓછું
ઉનાળાની શરૂઆત વાતાવરણમાં વારંવાર થતા પલટાની સાથે થઇ છે. ત્યાં જ બજારમાં લીંબુના ભાવ આસમાને પહોંચી ગયા છે. જમાલપુર રિટેલ માર્કેટમાં એક કિલો લીંબુના ભાવ ૯૦થી ૧૦૦ રૂપિયા છે. એવું અનુમાન સેવાઈ રહ્યું છે કે ઉનાળામાં હજી પણ ભાવ વધશે. ઉનાળામાં ગરમી અને લૂથી બચવા લોકો લીંબુ શરબત, સોડા વગેરેનો આગ્રહ રાખે છે. પરંતુ આ વર્ષે લીંબુયુકત ઠંડાં પીણાંનો આગ્રહ મોંઘો પડશે, કારણ કે ઉનાળાના પ્રારંભે સ્વાસ્થ્યવર્ધક અને રોજિંદા ઉપયોગી એવા લીંબુના ભાવમાં કિલોએ રૂ.૪૦ના વધારાથી લીંબુ કડવાં બન્યાં છે.
ગૃહિણીઓને ફટકો
અત્યારે શાકભાજીના ભાવ તો આસમાને જ છે તેમાંય લીંબુના ભાવ ગૃહિણીઓને દઝાડશે. દેશમાં રોજે રોજ મોંઘવારી વધી રહી છે. શિયાળામાં હંમેશાં સસ્તાં રહેતાં શાકભાજી આ વર્ષે મોસમની અનિયમિતતા અને કમોસમી વરસાદને લઈને આખું વર્ષ વધેલા રહ્યા છે. શિયાળામાં પણ શાકભાજી સસ્તાં થયાં નથી ત્યારે હવે ઉનાળામાં તો શાકભાજી પણ મોંઘાદાટ થશે. મહેસાણામાં ૧૫ હજાર હેક્ટરમાં કાગદી લીંબુ થાય છે. ગુજરાતમાં સૌથી વધુ ૪૦૦-૫૦૦ કરોડના લીંબુ મહેસાણામાં પાકે છે. એક વૃક્ષ પરથી ૨૫૦ કિલો લીંબુ ઉતારે છે, વિશ્વના ૨૦ દેશોમાં તેની નિકાસ થાય છે. પરંતુ આ વર્ષે મહેસાણાથી લીંબુની આવક ઘટી છે.
ગુજરાતમાં ઘટી લીંબુની આવક
ઉનાળાની શરૂઆતે ધીમે ધીમે તાપમાન પણ વધી રહ્યું છે. હવે ટૂંક સમયમાં કાળઝાળ ગરમીની પણ શરૂઆત થઈ જશે. આથી ઉનાળામાં સ્વાસ્થ માટે વપરાતાં લીંબુની માગ વધી જાય છે. પરંતુ ઉનાળાની શરૂઆતથી લીંબુના ભાવ આસમાને પહોંચી ગયા છે. જમાલપુર રિટેલ માર્કેટમાં એક કિલો લીંબુના ભાવ ૯૦થી ૧૦૦ રૂપિયા છે. છૂટક ભાવે હાલમાં ૧૨૦ થી ૧૫૦ના પ્રતિ કિલો વેચાણ થઇ રહ્યાં છે શાકભાજીના વેપારીના જણાવ્યા મુજબ લીંબુની આવક મહારાષ્ટ્ર, ચેન્નઈથી થાય છે આ વર્ષે ઉત્તર ગુજરાતમાંથી આવતા લોકલ બજારમાં લીંબુની આવક ઓછી છે.
લીંબુ શરબતમાં ફરજિયાત કાપ મૂકવાની સ્થિતિ સર્જાઇ
લોકો ગરમીથી રાહત મેળવવા વિટામિન સીથી ભરપુર એવા લીંબુનો ઉપયોગ કરે છે. લીંબુ શરબત ઉપરાંત હાલમાં શેરડીના રસમાં પણ લીંબુનો ઉપયોગ થાય છે. લોકો રસોઈમાં લીંબુનો ઉપયોગ કરતાં હોય છે પરંતુ ઉનાળાને લઈને શરબતમાં લીંબુનો ઉપયોગ વધી જાય છે.લોકો ડિહાઇડ્રેશનનો ભોગ ન બને તેના માટે લીંબુનું શરબત પીતા હોય છે. દર વર્ષે લીંબુમાં પણ ભાવ વધારો થતો હોય છે. પરંતુ લીંબુના ભાવ મે-જૂનમાં વધુ વધારો જોવા મળે છે. પરંતુ આ વર્ષે ઉનાળાની શરૂઆતમાં જ લીંબુના ભાવમાં વધારો લોકોને દઝાડી રહ્યા છે.
ગુજરાતમાં છથી સાત લાખ ટન લીંબુનું ઉત્પાદન
૧થી ૧.૨૦ લાખ ખેડૂતો ૪૬થી ૫૦,૦૦૦ હેક્ટરમાં છથી સાત લાખ ટન લીંબુ પકવે છે. જે ભારતના ઉત્પાદનનો ૧૯.૨૫ ટકા હિસ્સો છે. ભારતમાં ૩૨ લાખ ટન લીંબુ પાકે છે. લીંબુમાં ત્રણ વખત ફ્લાવરિંગ આવે અને ચાર મહિને લીંબુ પાકે છે. ચોમાસામાં વરસાદ છેક સુધી ચાલુ રહેતાં લીંબુમાં ફ્લાવરિંગ મોડું થાય છે વરસાદ બંધ થયા પછી એક મહિને ફ્લાવરિંગ થાય છે તેથી મોડી સિઝન શરૂ થાય છે.