પાક વીમો / ખેડૂતોને પાકવીમો ન મળતા કોંગી ધારાસભ્યએ CM રૂપાણીને લખ્યો પત્ર

રાજકોટ: છેલ્લા ઘણા સમયથી રાજ્યભરમાં ખેડૂતો પાકવીમાને લઈને વિરોધ કરી રહ્યા છે. ખેડૂત રસ્તા પર ઉતરવા માટે મજબૂર બન્યો છે. ત્યારે ખેડૂતોને ન્યાય મળે અને તેમને પાકવીમાના પુરતા પૈસા મળે તે માટે ધોરાજીના ધારાસભ્ય લલિત વસોયાએ મુખ્યમંત્રી વિજય રૂપાણીને પત્ર લખ્યો છે. 
 

આ સાથે જ એવી દલિલો કરી છે કે, સરકારના કેટલાક અધિકારીઓ અને વીમાકંપનીની મિલીભગતના કારણે ખેડૂતો પાક વીમાથી વંચીત છે. સરકાર ખેડૂતો સાથે આ પ્રકારનો અત્યાચાર કરવાનું બંધ કરે. ખેડૂતોમાં પણ જીવ છે.

પરંતુ સરકારની નીતિઓના કારણે આજે ખેડૂત દીવસેને દિવસે મરી રહ્યો છે. રાજ્યના અનેક જિલ્લાઓમાં આ વર્ષે ઓછા વરસાદના કારણે, ખેડૂતોની સ્થિતિ કફોડી બની છે. તેમ છતાં સરકાર તે વિસ્તારને અછતગ્રસ્ત નથી જાહેર કરી રહી.
 

જોકે ધોરાજી અને ઉપલેટાને અછતગ્રસ્ત તો જાહેર કર્યા છે. પરંતુ હજુ સુધી આ તાલુકાના લોકોને સરકાર તરફથી સહાય પેટે રાતીપાઈ પણ નથી મળી. જેથી સરકાર આ દીશામાં પણ કોઈ પગલા ભરે તેવી માગ કરવામાં આવી છે.