ક્રિકેટ / ક્રિકેટર યુવરાજ સિંહ આવી શકે છે મુશ્કેલીઓમાં, ચંદીગઢ પોલીસમાં ફરિયાદ નોંધાઈ, જાણો શું છે મામલો

• હરિયાણા પોલીસે ચંદીગઢ પોલીસને સોંપ્યો ઘટનાનો સ્ટેટસ રિપોર્ટ
• અદાલતે 4 એપ્રિલ સુધીમાં ઘટનાની વધુ વિગત હાજર કરવા આદેશ આપ્યા
• એસસી/એસટી એક્ટની કલમ 4 અંતર્ગત તપાસ હાથ ધરવાનાં આદેશ અપાયા

ક્રિકેટર યુવરાજ સિંહ દ્વારા ગત વર્ષે દલિત સમાજ માટે કરવામાં આવેલ અભદ્ર અને અપમાનજનક ટીપ્પણીની તપાસ હરિયાણા પોલીસે ચંદીગઢ પોલીસને સોંપી છે. હરિયાણા પોલીસ તરફથી હિસાર સ્થિત વિશેષ અદાલતમાં દાખલ સ્ટેટસ રિપોર્ટમાં આ અંગે માહિતી આપવામાં આવી છે. અદાલત તરફથી આ ઘટનાં અંગેની વધુ માહિતી દાખલ કરવા માટે 4 એપ્રિલ સુધીનો સમય આપવામાં આવ્યો છે. 

ઘટના ચંદીગઢની હોવાથી ત્યાંની પોલીસને સોંપાઈ ફરિયાદ 
હિસાર સ્થિત એસસી/એસટી એક્ટની વિશેષ અદાલત દ્વારા એડિશન સેશન જજ વેદપાલ સિરોહી સમક્ષ સ્ટેટસ રિપોર્ટ દાખલ કરતા હરિયાણા પોલીસે જણાવ્યું કે, તેમનાં દ્વારા શરૃઆતી તપાસમાં જાણવા મળ્યું છે કે આ ઘટના ચંદીગઢની છે, જેથી અમે આ ફરિયાદને ચંદીગઢ પોલીસને સોંપી છે. જે ઘટનાની વધુ તપાસ ચંદીગઢ પોલીસ કરશે. રિપોર્ટમાં જણાવવામાં આવ્યું છે કે થોડા દિવસો પહેલા જ આ ફરિયાદ ચંદિગઢ પોલીસને મોકલી આપવામાં આવી છે. અદાલતે આ ઘટનાની વધુ વિગત આગામી 4 એપ્રિલ સુધીમાં હાજર કરવાનાં આદેશ આપ્યા છે.

એસસી/એસટી એક્ટની કલમ 4 અંતર્ગત તપાસ હાથ ધરાઈ
આ ઘટનાની ગત સુનાવણીને હિસાર સ્થિત એસસી/એસટી એક્ટની વિશેષ અદાલતનાં એડિશનલ સેશન જજ વેદપાલ સિરોહીએ ફરિયાદી અને વકિલ રજત કલસનની અરજી પર ઘટનાનાં તપાસ અધિકારી ડીએસપી વિનોદ શંકર અને ઘટનામાં તપાસ અધિકારી રહેલા અને હાલમાં બરવાલાનાં પોલીસ સબઇન્સ્પેક્ટર રોહતાસ સિહાગ અને ઝાંસી શહેરનાં થાનાનાં તત્કાલિન ઇન્ચાર્જ જસવીર સિંહ વિરુદ્ધ અનુસૂચિત જાતિ અને જનજાતિ અત્યાચાર અધિનિયમની કલમ 4 અંતર્ગત તપાસ કરવાનાં આદેશ આપવામાં આવ્યા હતા.

6 મહિનાથી એક વર્ષથી થઈ શકે છે સજા
એસસી/એસટી એક્ટની કલમ અંતર્ગત કોઈ પણ લોકસેવક (જે અનુસૂચિત જાતિ અથવા અનુસૂચિત જનજાતિનો સભ્ય નથી) દ્વારા પોતાના કર્તવ્યોની અદેખાઇ કરનાર માટે 6 મહિનાથી એક વર્ષની જેલવાસ સજાની જોગવાઈ કરવામાં આવી છે.

વીડિયો કોલિંગ દરમિયાન અભદ્ર ટીપ્પણી કરી હોવાનો આક્ષેપ
નેશનલ એલાયંસ અને દલિત હ્યૂમન રાઇટ્સનાં સંયોજક રજત કલસને ગત 11 જાન્યુઆરીએ અદાલતમાં ફરિયાદ દાખલ કરીને આરોપ લગાવ્યો હતો કે, ગત વર્ષે 2 જૂનનાં રોજ તેમણે યુવરાજ સિંહ વિરુદ્ધ હાંસી પોલીસમાં એક ફરિયાદ દાખલ કરી હતી. જેમાં તેમણે કેસ દાખલ કરીને યુવરાજ સિંહની ધરપકડ કરવાની માંગ કરી હતી. યુવરાજ પર આરોપ લગાવાયો છે કે, તેણે ગત વર્ષે 1 જૂનનાં રોજ એક લાઇવ ચેટ દરમિયાન તેનાં સાથી ક્રિકેટર રોહિત શર્માની સાથે વીડિયો કોલિંગ પર ક્રિકેટર યુઝવેન્દ્ર ચહલ માટે અભદ્ર અને અપમાનજનક શબ્દોનો ઉપયોગ કર્યો હતો. જે વીડિયો વાયરલ પણ થયો હતો અને તે વિવાદને લીધે યુવરાજને માફી પણ માંગવી પડી હતી.