અગાઉ યુથ કોંગ્રેસના પ્રમુખ સહિતના હોદ્દેદારોએ પણ ટિકિટ માંગી હતી, આજે ગુજરાત કિસાન કોંગ્રેસના 8 હોદ્દેદારોએ ટિકિટ માંગતા રાજકારણ ગરમાયું
કોંગ્રેસ કોને આપશે ટિકિટ?
કિસાન કોંગ્રેસના હોદ્દેદારોએ માંગી ટિકિટ
8 હોદ્દેદારોએ અલગ અલગ બેઠક પર દાવેદારી કરી
ગુજરાતમાં વિધાનસભા ચૂંટણી પહેલા ટિકિટની દાવેદારીને લઈ રાજકિય ગરમાવો આવી ગયો છે. તેમાંય ખાસ કરીને કોંગ્રેસમાં દાવેદારીનો રાફડો ફાટ્યો છે. ત્યારે કોંગ્રેસના યૂથ મોરચાએ તેમજ કિસાન કોંગ્રેસે પણ આગામી ચૂંટણીમાં ઝપલાવવાનું નક્કી કરી લીધું છે. એક તરફ કોંગ્રેસના જૂના જોગીઓ હજુ પણ ચૂંટણી લડવા તલપાપડ છે ત્યારે બીજી તરફ આજે ગુજરાત કિસાન કોંગ્રેસના 8 હોદ્દેદારોએ ટિકિટ માંગતા રાજનીતના ખેલ ધીમે ધીમે ઉઘાડા થઈ રહ્યા છે. આગામી સમયમાં આંતરિક ડખો સામે આવે તેવી શક્યતા છે.
ગુજરાત કિસાન કોંગ્રેસના 8 હોદ્દેદારોએ માંગી ટિકિટ
દ્વારકા બેઠક પર પાલ આંબલિયાએ માંગી ટિકિટ
પાલ આંબલિયા ગુજરાત કિસાન કોંગ્રેસના છે પ્રમુખ
કાલાવડ બેઠક પર ગિરધર વાઘેલાએ કરી દાવેદારી
ગિરધર વાઘેલા કિસાન કોંગ્રેસના પ્રદેશ છે ઉપપ્રમુખ
મોરબી બેઠક પર કાંતિલાલ બાવરવાએ માંગી ટિકિટ
કેશોદ બેઠક પર મનીષ નંદાણીયાએ નોંધાવી દાવેદારી
સાણંદ બેઠક પર મહાદેવ વાઘેલાએ માંગી ટિકિટ
જસદણ વીંછિયા બેઠક પર વિનુભાઈ ધડુકે નોંધાવી દાવેદારી
પાલનપુર બેઠક પર ભરત કરેણે માંગી ટિકિટ
જેતપુર બેઠક પર ચેતનભાઈ ગઢીયાએ માંગી ટિકિટ
યુથ કોંગ્રેસના પ્રમુખ સહિતના હોદ્દેદારોએ પણ ટિકિટ માંગી
તો બીજી તરફ ગુજરાત યુથ કોંગ્રેસના પ્રમુખ સહિતના હોદ્દેદારોએ પણ ટિકિટની માંગ પ્રબળ કરી છે. રાજ્યની ધંધુકા, છોટાઉદેપુર અને પાલનપુર એમ 3 બેઠકો પર ખેંચતાણ થવાની સંભાવના છે કારણ કે 3 સિટિંગ ધારાસભ્યો સામે યુથ કોંગ્રેસના હોદ્દેદારોએ ટિકિટ માંગી છે. ગુજરાત યુથ કોંગ્રેસના પ્રમુખ સહિતના હોદ્દેદારોએ ટિકિટ માંગી છે.ગુજરાત યુથ કોંગ્રેસના પ્રમુખ હરપાલસિંહ ચુડાસમા, યુથ કોંગ્રેસના ઉપપ્રમુખ સંગ્રામ રાઠવા, યુથ કોંગ્રેસના મહામંત્રી અંકિતાબેન ઠાકોર, યુથ કોંગ્રેસના બનાસકાંઠાના ઉપપ્રમુખ સંજય ચૌધરી, યુથ કોંગ્રેસના મહામંત્રી ઉપેન્દ્રસિંહ જાડેજા, યુથ કોંગ્રેસના પંચમહાલ જિલ્લાના પ્રમુખ મિકી જોસેફ, યુથ કોંગ્રેસના મહામંત્રી રાહુલ પરમાર અને યુથ કોંગ્રેસના મહામંત્રી ઈરફાન શેખે ટિકિટની માંગ કરી છે.
કયા કોણે ઠોકી દાવેદારી?
તમને જણાવી દઇએ કે, ગુજરાત યુથ કોંગ્રેસના પ્રમુખ હરપાલસિંહ ચુડાસમાએ ધંધુકા બેઠક પર દાવેદારી નોંધાવી છે. મહત્વનું છે કે, હરપાલસિંહ ચુડાસમા અમદાવાદ જિલ્લા પંચાયતના સદસ્ય પણ છે. ગુજરાત યુથ કોંગ્રેસના ઉપપ્રમુખ સંગ્રામ રાઠવા કે જેઓએ છોટા ઉદેપુર બેઠક પર દાવેદારી નોંધાવી છે. સંગ્રામ રાઠવા કે જેઓ છોટા ઉદેપુર નગરપાલિકાના પ્રમુખ પણ છે. આ સિવાય યુથ કોંગ્રેસના મહામંત્રી અંકિતાબેન ઠાકોરે બનાસકાંઠાની પાલનપુર બેઠક પરથી દાવેદારી નોંધાવી છે. અંકિતાબેન ઠાકોર કે જેઓ પાલનપુર નગરપાલિકાના સદસ્ય છે.યુથ કોંગ્રેસના બનાસકાંઠાના ઉપપ્રમુખ સંજય ચૌધરી કે જેઓએ પાલનપુર બેઠક પર દાવેદારી નોંધાવી છે. સંજય ચૌધરી તાલુકા પંચાયતના કારોબારી ચેરમેન પણ છે. ગુજરાત યુથ કોંગ્રેસના મહામંત્રી ઉપેન્દ્રસિંહ જાડેજાએ કચ્છની માંડવી બેઠક પરથી દાવેદારી નોંધાવી છે. યુથ કોંગ્રેસના પંચમહાલ જિલ્લાના પ્રમુખ મિકી જોસેફે ગોધરા બેઠક પરથી દાવેદારી નોંધાવી છે. યુથ કોંગ્રેસના મહામંત્રી રાહુલ પરમારે અમદાવાદની અસારવા બેઠક પર દાવેદારી નોંધાવી છે. યુથ કોંગ્રેસના મહામંત્રી ઈરફાન શેખે સુરતની લિંબાયત બેઠક પરથી દાવેદારી નોંધાવી છે.
આ ચૂંટણીમાં જીતી શકે તેવી મહિલાઓને વધારે ટિકિટ અપાશે: જેનીબેન ઠુમ્મર:
2 દિવસ અગાઉ બનાસકાંઠામાં પ્રદેશ કોંગ્રેસ મહિલા અધ્યક્ષ જેનીબેન ઠુમ્મરની અધ્યક્ષતામાં ચૂંટણીની રણનીતિ અંગે ચર્ચાઓ થઈ હતી. જેમાં જેનીબેન ઠુમ્મરે મોટું નિવેદન આપતા કહ્યું હતું કે આ ચૂંટણીમાં જીતી શકે તેવી મહિલાઓને વધારે ટિકિટ અપાશે. સક્ષમ મહિલા ઉમેદવારોને બનાસકાંઠાથી કોંગ્રેસ ચૂંટણીના જંગ મેદાનમાં ઉતારશે તેવી હામ ભરતા કહ્યું હતું કે ઘણી મહિલાઓ ચૂંટણી લડવાની તૈયારી બતાવી છે. ત્યારે કોંગ્રેસનું શીર્ષ નેતૃત્વ આ અંગેના સમીકરણો ચકાસી રહ્યું છે. ખાસ કરીને બનાસકાઠામાં વધુમાં વધુ મહિલાઓને કોંગ્રેસ ટિકિટ આપશે.
કોંગ્રેસ સપ્ટેમ્બરના અંતમાં 58 ઉમેદવારોના નામ કરશે જાહેર: બિમલ શાહ, ગુજરાત કોંગ્રેસના પ્રદેશ ઉપાધ્યક્ષ
4 દિવસ પહેલા ગુજરાત કોંગ્રેસના પ્રદેશ ઉપાધ્યક્ષ બિમલ શાહનું મોટું નિવેદન સામે આવ્યું હતું. સપ્ટેમ્બર માસના અંતમાં ઉમેદવારોના નામ કરાશે જાહેર કરી તેવામાં આવશે. શહેરી બેઠકોના ઉમેદવારોના નામ વહેલા જાહેર કરાશે. છેલ્લા ત્રણ ટર્મથી હારતી બેઠક પર કોંગ્રેસ ઉમેદવાર જલ્દી જાહેર કરશે. વધુ વિગત આપતા તેઓએ કહ્યું કે ઉમેદવારોનું લિસ્ટ હાઈકમાન્ડને મોકલાયું હતુ. જાહેર કરવામાં આવનાર 58 બેઠકો માટે કોંગ્રેસને ચૂંટણી લડવા 600થી વધુ ઉમેદવારોના બાયોડેટા મળ્યા હતા. વરસાદને કારણે ચૂંટણી લડવા ઈચ્છુક ઉમેદવારોને બાયોડેટા મોકલવા સમય લંબાવાયો છે. સીટિંગ MLAની સીટ પરથી મર્યાદીત બાયોડેટા મળ્યા છે જ્યારે SC અનામત બેઠકો પર અઢળક ઉમેદવારોએ દાવેદારી નોંધાવી છે.