આણંદ / ગ્રીસના ડબ્બામાંથી ઝડપાયો વિદેશી દારૂનો જથ્થો, મોડસ ઓપરેન્ડી જોઇ LCB પણ ચોંકી ઉઠી

• આણંદમાં દારૂની હેરાફેરી માટે મોડસ ઓપરેન્ડી સામે આવી
• બોચાસણ ગામે ગ્રીસના ડબ્બાની આડમાં દારૂની હેરાફેરી
• આણંદ LCBએ વિદેશી દારૂની 1779 બોટલો ઝડપી પાડી

આણંદમાં દારૂની હેરાફેરી માટે નવી મોડસ ઓપરેન્ડી સામે આવી. આણંદના બોચાસણ ગામે ગ્રીસના ડબ્બાની આડમાં દારૂની હેરાફેરી કરવામાં આવી હોવાનું સામે આવ્યું છે. આણંદ LCBએ વિદેશી દારૂની 1779 બોટલો ઝડપી પાડી. ગ્રીસના ડબ્બાની આડમાં પેકિંગ કરીને દારૂ લઈ જવાતો. આ ઘટનામાં પોલીસે કુલ રૂ. 10 લાખના મુદ્દામાલ સહિત 2 આરોપીઓની ધરપકડ કરી છે.

મહત્વનું છે કે, ગાંધીના ગુજરાતમાં કડક દારૂબંધી હોવા છતાં ખુલ્લેઆમ દારૂની રેલમછેલ થતી હોવાનું જોવા મળી રહ્યું છે. ગુજરાત રાજ્યમાં દારૂબંધી માત્ર કાગળ પર જ છે. આ વાત આજકાલની નહીં પરંતુ દારૂબંધી સમયથી કહેવામાં આવે છે.

સુરતમાં પણ વરાછા પોલીસે દારૂનો જથ્થો ઝડપ્યો હતો

ઉલ્લેખનીય છે કે, ગઇકાલે સુરતમાં પણ વરાછા પોલીસે દારૂનો જથ્થો ઝડપી પાડ્યો હતો. વરાછા સંતોષી નગર સોસાયટીમાંથી પોલીસે દારૂનો જથ્થો ઝડપી પાડ્યો હતો. બે ભાઈઓ દારૂ મંગાવી તેનું ખુલ્લેઆમ વેચાણ કરતા હતા. આથી, વરાછા પોલીસે બંને આરોપીઓની ધરપકડ કરી હતી. વરાછા પોલીસે દારૂનો જથ્થો જપ્ત કરીને આગળની કાર્યવાહી હાથ ધરી હતી.

તાજેતરમાં PCBએ અમદાવાદના ચાંદખેડામાંથી દોઢ કરોડનો દારૂ ઝડપ્યો હતો

એ જ રીતે તાજેતરમાં જ PCBએ અમદાવાદના ચાંદખેડામાંથી દોઢ કરોડનો દારૂ ઝડપી પાડ્યો હતો. જેમાં PCBએ 650 પેટી વિદેશી દારૂનો જથ્થો ઝડપ્યો હતો. દારૂનો આ જથ્થો રાજસ્થાનથી આવતો હતો અને તેને છેક સૌરાષ્ટ્રમાં મોકલવામાં આવતો હતો. આ ઘટનામાં પોલીસે 3 આરોપીઓની ધરપકડ કરી હતી.