ગીર સોમનાથ / ગજબ જુગાડ! દારૂ છુપાવવા આ શખ્સોએ અપનાવી એવી ટેક્નિક કે LCB પણ ચકરાવે ચડી ગઇ

• ગીરસોમનાથ જિલ્લામાં કેરીની આડમાં દારૂની હેરાફરી
• કેસર કેરીના બોક્સ ચેક કરતા સમગ્ર મામલો સામે આવ્યો
• LCBએ વિદેશ દારૂની બોટલ સાથે બે શખ્સની કરી ધરપકડ

ગીરસોમનાથ જિલ્લામાંથી એક ચોંકાવનારો કિસ્સો સામે આવ્યો છે. અહીં કેરીની આડમાં દારૂની હેરાફરી થતી હોવાની ઘટના સામે આવી છે. ગીર સોમનાથના ઉના બસ સ્ટેશનમાંથી LCBએ કેસર કેરીના બોક્સ ચેક કરતા આ સમગ્ર ઘટના સામે આવી છે. LCBએ કેસર કેરીના બોક્સમાંથી વિદેશી દારૂ ઝડપી પાડ્યો છે. વિદેશ દારૂની બોટલ સાથે બે શખ્સની LCBએ ધરપકડ પણ કરી છે.

બોક્સમાંથી વિદેશી દારૂની બોટલ અને વિદેશી દારૂના ટીન મળી આવ્યાં

હાલમાં આ ઘટનાને લઇને LCB દ્વારા વધુ તપાસ હાથ ધરવામાં આવી રહી છે. આખરે આ દારૂ કેરીની પેટી સુધી પહોંચ્યો કેવી રીતે? કોણ સપ્લાય કરે છે આ દારૂની હેરાફેરી? શું પોલીસ આનાથી અજાણ છે કે પછી? દારૂની હેરાફેરીનો આ કીમિયો જોઇને ખુદ LCB પણ વિચારતી રહી ગઇ છે. કારણ કે કેરીના બોક્સની અંદર દારૂની હેરાફેરી કરનાર માસ્ટરમાઇન્ડે અંદર પહેલાં ઉપરની તરફ પેપર રાખ્યું છે, જેથી તે ખોખાને બહારથી કે અંદરથી જોતા એમ જ લાગે કે આ બોક્સમાં અંદર કેરીઓ રહેલી છે. પરંતુ તેની અંદરથી તો દારૂ મળી આવતા ઘટનાસ્થળે હાજર સૌ કોઇ વિસ્મય પામ્યા. જણાવી દઇએ કે, આ ખોખાની અંદરથી વિદેશી દારૂની બોટલ અને વિદેશી દારૂના ટીન મળી આવ્યાં છે.

થોડાંક દિવસો અગાઉ શાકભાજીના માર્કેટમાં દારૂનું વેચાણ થતું હોવાનો વીડિયો વાયરલ થયો હતો

ઉલ્લેખનીય છે કે, રાજ્યમાં અવારનવાર દારૂ પકડાયાની ઘટના સામે આવતી જ રહે છે. ત્યારે થોડાંક દિવસો અગાઉ સુરતના પાલનપુર જકાતનાકા વિસ્તારનો એક વીડિયો સોશિયલ મીડિયામાં વાયરલ થયો હતો. જેમાં પાલનપુર જકાતનાક શાકમાર્કેટમાં શાકની લારીની બાજુમાં દેશી દારૂનું ખુલ્લેઆમ વેચાણ થતું હોવાનું સામે આવ્યું છે. શાકભાજીના માર્કેટમાં બટેટા-રિંગણા સાથે દારુનું વેચાણ થતું હોવાનો વીડિયો વાયરલ થયો હતો. ત્યારે હવે દારૂનું વેચાણ કરનારા લોકો કેરીની આડમાં દારૂની હેરાફેરી કરતા જોવા મળી રહ્યાં છે.

ધ્રાંગધ્રા-માલવણ હાઇવે પર 42.62 લાખની કિંમતનો દારૂનો જથ્થો જપ્ત કરાયો હતો

મહત્વનું છે કે, ગુજરાતમાં કહેવાતી દારૂબંધી વચ્ચે ખુલ્લે આમ દારૂ વહેંચાઈ રહ્યો છે અને પીવાઇ પણ રહ્યો છે તેવાં અનેક વખત આરોપો લગાવાયા છે. વારંવાર દારૂના મસમોટા જથ્થાનો પર્દાફાશ થાય છે જે દારૂબંધી કાગળ પર જ રહી હોવાની ચાડી ખાઈ રહી છે. તાજેતરમાં જ ધ્રાંગધ્રા તાલુકા પોલીસે ડાંગરની ફોતરીના કોથળા નીચે સંતાડેલો રૂ. 42.62 લાખનો દારૂનો જંગી જથ્થો ભરેલી ટ્રક ધ્રાંગધ્રા-માલવણ હાઇવે પરથી ઝડપી પાડ્યો હતો. દારૂનુ કટીંગ થાય એ પહેલાં જ ટ્રક સાથે  પરપ્રાંતિય શખ્સને ઝડપી લઇ પોલીસે રૂપિયા 52.75 લાખનો મુદ્દામાલ કબ્જે કરી વધુ તપાસ હાથ શરૂ કરી.