મોતનું માતમ / લઠ્ઠાકાંડ રિટર્ન્સ! કોઈએ ગુમાવ્યા પિતા, તો કોઈએ પતિ, કોણ સમજશે આ પરિવારોની વ્યથાને?

• ગુજરાતમાં લઠ્ઠાકાંડ રિટર્ન્સ!
• બરવાળામાં અનેક પરિવાર બરબાદ
• કોઈએ ગુમાવ્યા પિતા, તો કોઈએ પતિ

ગુજરાતમાં દારૂબંધી છે. બધાને ખબર છે. પણ ગલીએ ગલીએ દારૂ મળે છે, દેશી હોય કે ઈંગ્લિશ બુટલેગરો ઘર સુધી દારૂની ડિલીવરી આપે છે. પણ આ બધું કોની રહેમનજર હેઠળ થઈ રહ્યું છે એ પણ તમે જાણતા જ હશો. પણ આ રહેમનજર કેટલાક પરિવાર માટે જિંદગીભરની સજા બની ગઈ. કોઈએ ભાઈ ગુમાવ્યો, કોઈએ પતિ. તો કોઈએ પિતા અને કોઈએ દીકરો. બરવાળાના લઠ્ઠાકાંડની ચર્ચા આજે ચારેયકોર છે. પરિવારમાં આક્રંદ છે

મૌન સેવીને ઉભા રહેલા બાળકોને અંદાજ નથી કે તેના પિતા અને ભાઈના મોત થઈ ગયા..!
આ મહિલાઓનો આક્રંદ ભલભલાના રૂવાડા ઉભા કરી શકે છે. આ આક્રંદ છે એક પત્નીનો. એક માતાનો. જેને પોતાના સ્વજનોને ગુમાવ્યા છે. કોઈ મહિલાએ પતિ ગુમાવ્યો છે. તો કોઈએ દીકરો.  આ આક્રંદ વચ્ચે ઉભેલા આ બાળકોને જુઓ.  મૌન સેવીને ઉભા રહેલા આ બાળકોને એ અંદાજ પણ નથી કે તેના પિતા કે ભાઈ હવે આ દુનિયામાં નથી રહ્યા. પરિવારજનો શોકમાં ગમગીન છે. ગામનું વાતાવરણ પણ આ રુદનથી દ્રવી ઉઠયું છે. કોઈનો દીકરો પિતાની રાહ જોઈ રહ્યો છે. તો કોઈની દીકરી. પત્નીએ જીવનસાથી ગુમાવ્યો. જવા વાળા તો આ દુનિયા છોડીને જતા રહ્યા. પણ પાછળ મુકી ગયા છે આ આક્રંદ બોટાદ જિલ્લાના રોજિદ અને તેની આસપાસના ગામડાઓમાં હાલ વાતાવરણ રુદનથી દ્રવી ઉઠયું છે. કેમ કે અહીં એક સાથે એક બે નહીં પણ 31 લોકોની અર્થી ઉઠી. અનેક પરિવારે ઘરના મોભી ગુમાવતા હવે નિરાધાર થઈ ગયા છે. 

પ્રદીપ 2 દીકરીનો પિતા હતો....
બોટાદના બરવાળાના રોજિદ ગામ જ નહીં આસપાસના 8 ગામમાંથી 29 અર્થી એક સાથે ઉઠતા ગમગીન વાતાવરણ સર્જાયું હતું. આ સ્થિતિ સર્જાઈ છે કેમિકલયુક્ત દેશી દારૂથી. જેને પીધા બાદ એક બાદ એક એમ 31 લોકોનું પ્રાણ પંખેડુ ઉડી ગયું. તો હજુ પણ અનેક લોકો જીવન-મરણ વચ્ચે જંગ લડી રહ્યા છે.  રોજિદ ગામમાં લઠ્ઠાકાંડમાં મૃત્યુ પામેલો પ્રદીપ 2 દીકરીનો પિતા હતો. પરિવારમાં પ્રદીપ એક માત્ર કમાનાર હતો. તેના મૃત્યુથી પરિવાર નઃસહાય થઈ ગયો છે. તો દીકરીઓ હજુ પણ પિતા ઘરે ક્યારે આવશે તેની રાહ જોઈ રહી છે. 25 વર્ષીય દીપકે પણ લઠ્ઠાકાંડમાં જીવ ગુમાવ્યો. તેની બહેન ચોધાર આંસુએ રડી રહી છે. હવે આ બહેન રાખડી કોને બાંધશે તે મોટો પ્રશ્ન છે. જ્યારે તેની પત્ની કંઈ પણ બોલવાની હાલતમાં નથી. આ રૂદનનો અવાજ સાંભળીને ભલભલાની આંખમાંથી આંસુ સરી જાય તેવો માહોલ સર્જાયો છે. 

5 વ્યક્તિની અંતિમ યાત્રા ટ્રેક્ટરમાં નીકળી
રોજિદ ગામમાં ટ્રેક્ટરમાં એક સાથે 5 વ્યક્તિની અંતિમ યાત્રા નીકળી હતી. જેને પગલે મહિલાઓમાં આક્રંદનો માહોલ જોવા મળ્યો હતો. તો સૌ કોઈના આંખોમાં આંસુ જોવા મળ્યા. તો બીજી તરફ પરિવારોએ પોલીસ પર રોષ ઠાલવ્યો છે. અને આરોપીઓને કડક સજા થાય તેવી માગ કરી રહ્યા છે. આવી જ સ્થિતિ કંઈક આકરૂ ગામમાં પણ જોવા મળી. જ્યાં ઝેરી દારૂએ બે સગા ભાઈનો ભોગ લીધો છે. ભાવેશ ચાવડા અને કિશન ચાવડાનું લઠ્ઠાકાંડમાં મૃત્યુ થયું છે. ભાવેશની બાળકી હજુ નાની છે. જેને પિતાની છત્રછાયા ગુમાવી છે. તો બીજી તરફ પરિવારમાં આક્રંદ છે. હાલ તો પરિવારજનો આરોપીઓ વિરુદ્ધ કાર્યવાહીની માગ કરી રહ્યા છે. અને સરકાર તેમજ પોલીસ તંત્ર વિરુદ્ધ પણ રોષ જોવા મળ્યો હતો.