મુંબઇ / બોલીવુડથી આવ્યા માઠા સમાચાર! લતા મંગેશકરના ભાઇની તબિયત લથડી, જાણો લેટેસ્ટ હેલ્થ અપડૅટ

• લતા મંગેશકરના ભાઈની તબિયત લથડતા હોસ્પિટલમાં દાખલ
• પુત્ર આદિનાથ મંગેશકરે આપી વિશેષ જાણકારી
• તાજેતરમાં જ લતા મંગેશકરનું નિધન થયું હતું

લતા મંગેશકરના ભાઈ અને મ્યુઝિક કમ્પોઝર હૃદયનાથ મંગેશકરની તબિયત અચાનક લથડતા તેઓને તાત્કાલિક ધોરણે હોસ્પિટલમાં દાખલ કરવામાં આવ્યા છે. આ અંગેની જાણકારી ખુદ તેમના પુત્ર આદિનાથ મંગેશકરે આપી છે. આદિનાથે કહ્યું કે, તેના પિતાને દસ દિવસમાં હોસ્પિટલમાંથી રજા આપવામાં આવશે. જો કે, તેઓએ એમ નથી જણાવ્યું કે, તેઓને શું થયું છે.

લતા દીનાનાથ મંગેશકર પુરસ્કાર સમારોહ દરમિયાન આદિનાથે સભાને સંબોધતા કહ્યું કે, “ગત વર્ષોમાં મારા પિતા પંડિત હૃદયનાથ મંગેશકરજી સ્વાગત પ્રવચન આપતા અને અમારા ટ્રસ્ટ અંગેની જાણકારી આપતા હતાં. જો કે, આ વર્ષે તેઓ આવું કરવામાં અસમર્થ રહ્યાં છે, કારણ કે તેઓ હાલમાં હોસ્પિટલમાં છે." તેઓએ વધુમાં ઉમેર્યું હતું કે "ભગવાનની કૃપાથી તેઓ આગામી 8થી 10 દિવસમાં ઘરે પાછા આવી જશે. તેમની હાલત હાલ સ્થિર છે અને તેઓની તબિયતમાં સુધારો થઈ રહ્યો છે."

11 એપ્રિલના રોજ લતા દીનાનાથ મંગેશકર પુરસ્કારની જાહેરાત કરાઇ

વધુમાં જણાવી દઈએ કે, પ્રથમ લતા દીનાનાથ મંગેશકર એવોર્ડ પીએમ નરેન્દ્ર મોદીને આપવામાં આવ્યો છે. આ દરમિયાન PM મોદી ખુદ પોતે પણ આ કાર્યક્રમમાં હાજર રહ્યાં હતા અને તેઓએ પોતાના ભાષણની શરૂઆતમાં જ હૃદયનાથ મંગેશકર જલ્દી સ્વસ્થ થઇ જાય તે માટે ભગવાનને પ્રાર્થના કરી હતી. માસ્ટર દીનાનાથ મંગેશકર સ્મૃતિ પ્રતિષ્ઠાન ચેરિટેબલ ટ્રસ્ટ દ્વારા 11 એપ્રિલના રોજ એવોર્ડની જાહેરાત કરવામાં આવી હતી. ટ્રસ્ટ વતી જણાવાયું હતું કે, આ એવોર્ડ દર વર્ષે સમાજ માટે અગ્રણીની ભૂમિકા ભજવનાર વ્યક્તિને આપવામાં આવશે. નોંધનીય છે કે, 24 એપ્રિલના રોજ માસ્ટર દીનાનાથની 80મી પુણ્યતિથિ હતી.

તાજેતરમાં જ લતા મંગેશકરનું નિધન થયું હતું

લતા મંગેશકર કે જેઓ બોલિવુડની લેજેન્ડરી સિંગર હતાં. 6 ફેબ્રુઆરી 2022 ના રોજ 92 વર્ષની વયે તેમનું અવસાન થયું હતું. લતા મંગેશકરનું મૃત્યુનું કારણ મલ્ટિપલ ઓર્ગન ફેલિયર હતું. તેમની વિદાયના કારણે ભારતીય મ્યુઝિક ઈન્ડસ્ટ્રીથી લઈને બોલિવુડમાં શોકની લહેર છવાઈ ગઈ હતી. લતા મંગેશકર પાંચ બહેનો અને ભાઈઓમાં સૌથી મોટી હતી. તેમની બહેનોમાં આશા ભોસલે, મીના ખેડકર, ઉષા મંગેશકર સામેલ છે. આ સાથે હૃદયનાથ મંગેશકર એ તેમના એકમાત્ર ભાઈ છે. આ તમામ બહેનો અને ભાઈઓ સંગીતકાર છે.