મુશ્કેલી / ગયા વર્ષે સૌથી ગરમ રહ્યા મહાસાગર વિનાશકારી પરિણામ લાવી શકે છે

અત્યાર સુધીના માનવ ઇતિહાસમાં ૨૦૧૭માં દુનિયાના મહાસાગર ખાસ કરીને સપાટી અને ૨૦૦૦ મીટરની ઊંડાઇની વચ્ચે સૌથી વધુ ગરમ રહ્યા. વિજ્ઞાનીઓએ જણાવ્યું કે માનવ નિર્મિત ઉત્સર્જન ખૂબ જ ઝડપથી ગરમ થઇ રહ્યું છે, કેમ કે ગ્રીન હાઉસ ગેસના ઉત્સર્જનથી ઉત્પન્ન થતી ઉષ્માનો ૯૦ ટકા ભાગ મહાસાગર શોષી લે છે. મહાસાગરનું વધતું તાપમાન પૃથ્વીના જળવાયુ માટે ખૂબ જ વિનાશકારી સાબિત થઇ શકે છે.

દુનિયાભરના વિજ્ઞાનીઓની ટીમ દ્વારા ચીનની આઇએપી તરફથી સંકલિત કરાયેલા ડેટાના અભ્યાસમાં આ જાણકારી સામે આવી છે. એડ્વાન્સ ઇન એટ્મોસ્ફિયરિક સાયન્સીસ નામની જર્નલમાં જણાવાયું છે કે વૈશ્વિક મહાસાગરીય તાપમાન માટે છેલ્લાં ૧૦ વર્ષ સૌથી ગરમ રહ્યાં અને છેલ્લાં પાંચ વર્ષમાં સૌથી વધુ તાપમાન નોંધવામાં આવ્યું.

૨૦૧૯માં મહાસાગરનું તાપમાન ૧૯૮૧થી ૨૦૧૦ના સરેરાશ તાપમાનથી ૦.૦૭૫ ડિગ્રી સેલ્સિયસ વધુ હતું. આ તાપમાન સુધી પહોંચવા માટે મહાસાગરને ૨૨૮ અબજ ખરબ જુલ ઉષ્માની જરૂર પડી હશે. જુલ ઉષ્માના માપનું એકમ છે.

 
છેલ્લાં ૨૫ વર્ષમાં આપણે દુનિયાના મહાસાગરમાં જેટલી ઉષ્મા આપી છે તે હિરો‌શિમામાં પડેલા પરમાણુ બોમ્બ વિસ્ફોટમાંથી નીકળેલી ઉષ્મા કરતાં ૩.૬ અબજ ગણી છે. દુનિયાભરની ૧૧ સંસ્થાના ૧૪ વિજ્ઞાનીઓના આંતરરાષ્ટ્રીય દળે જળવાયુ પરિવર્તનના પ્રભાવને પલટવા માટે કાર્યવાહી કરવા માગણી કરી છે. વિજ્ઞાનીઓએ એમ પણ જણાવ્યું કે મહાસાગર ગરમ થવાથી પરિણામ આપણી સામે આવવાં લાગ્યાં છે. મોસમ ગરમ થઇ રહી છે. સમુદ્રનું જળસ્તર વધ્યું છે. સમુદ્ર જીવોને નુકસાન પહોંચ્યું છે. ક્યાંક પૂર તો ક્યાં દુષ્કાળની સ્થિતિ ઊભી થઇ રહી છે.