ગુજરાત / છેલ્લી ઉત્તરાયણ.. દોરી વાગવાની ઘટનામાં 3 લોકોની જીવનની પતંગ કપાઈ, 1નું ધાબા પરથી પટકાતાં મોત

• ગુજરાતભરમાં હાલ ઉત્તરાયણના તહેવારની હર્ષોલ્લાસ સાથે ઉજવણી
• અમુક જગ્યાએ ધાબા પરથી પડવાના, ચાઈનીઝ દોરી વાગવાના બનાવો નોંધાયા
• ચાઈનીઝ દોરીથી મોતના કુલ 3 બનાવો નોંધાયા છે જ્યારે એક બનાવ ધાબા પરથી પડી જવાનો નોંધાયો છે

 ગુજરાતભરમાં હાલ ઉત્તરાયણના તહેવારની હર્ષોલ્લાસ સાથે ઉજવણી કરવામાં આવી હતી. ચાઈનીઝ દોરી પર પ્રતિબંધ હોવા છતાં અમુક લાલચુ તત્વો રૂપિયા રડી લેવાની લાલચે તેનું વેચાણ કરે છે. જેને પગલે રાજ્યમાં ગળા કપાવાની ઘટનાઓ બને છે. ત્યારે બાળકીના મોતથી પરીવારમાં આક્રંદ જોવા મળ્યો હતો.

વિસનગરમાં દોરી વાગવાથી બાળકીનું મોત
જીવલેણ ચાઈનીઝ દોરીએ મહેસાણાના વિસનગરમાં 4 વર્ષની બાળકીનો ભોગ લીધો છે. વિસનગરના કડા દરવાજા નજીક બાળકી અને તેની માતા ત્યાથી નિકળતા હતા તે સમયે બાળકીને ગળાના ભાગે ચાઈનીજ દોરી વાગતા બાળકીનું મોત નિપજ્યું છે. 4 વર્ષની કિષ્ના ઠાકોર નામની બાળકીનું ગળાના ભાગે દોરી વાગતા મોતના સમચારથી સમગ્ર વિસનગર શોકમગ્ન બન્યુ છે. ચાઈનીઝ દોરી પર પ્રતિબંધ હોવા છતાં અમુક લાલચુ તત્વો રૂપિયા રડી લેવાની લાલચે તેનું વેચાણ કરે છે. જેને પગલે રાજ્યમાં ગળા કપાવાની ઘટનાઓ બને છે. ત્યારે બાળકીના મોતથી પરીવારમાં આક્રંદ જોવા મળ્યો હતો.

વડોદરામાં પતંગની દોરીથી યુવકનું ગળું કપાયું
વડોદરામાં પણ લોકોએ ઉત્તરાયણનો પર્વ ઉલ્લાસ સાથે મનાવ્યો હતો. ત્યારે એક યુવક દશરથ બ્રિજ પરથી પસાર થઈ રહ્યો હતો ત્યારે અચાનક તેના ગળાના ભાગે દોરી વાગતા યુવકનું મૃત્યું થયું હતું. આ ઘટનાને પગલે સ્થાનિક તંત્રની ટીમ દોડતી થઈ જવા પામી હતી.

વિજયનગરમાં અગાશી ઉપરથી નીચે પટકાતા યુવાનનું મોત
સાબરકાંઠાના વિજયનગરમાં ઘરની અગાશી ઉપરથી પતંગ ચગાવતા નીચે પટકાતા યુવાનનું મોત નિપજ્યું હતું. ત્યારે યુવકને માથાના ભાગે ઈજાઓ થતા હોસ્પિટલ ખસેડાયો હતો. સીએચસી ખાતે હાજર તબીબે યુવકને મૃત જાહેર કર્યો હતો. 

રાજકોટ નજીક પતંગની દોરીએ ભોગ લીધો
રાજકોટના લોઠડા ગામે સાત વર્ષીય બાળકનું પતંગની દોરી વાગતા તેને તાત્કાલીક સારવાર અર્થે લઈ જવામાં આવ્યો હતો. જ્યાં સારવાર દરમ્યાન તેનું મોત નિપજવા પામ્યું હતું. 

દ્વારકાના ભાણવડમાં ચાઇનીઝ દોરીથી યુવકને ગંભીર ઇજા
દ્વારકાના ભાણવડમાં ચાઈનીઝી દોરીથી યુવકને ગંભીર ઈજાઓ પહોંચી હતી. ત્યારે યુવકને ચાઈનીઝ દોરી ગળાના ભાગે વાગતા તેને ભાણવડની સરકારી હોસ્પિટલના સારવાર અર્થે ખસેડવામાં આવ્યો હતો. જ્યાં તેને સારવાર આપ્યા બાદ વધુ સારવાર  અર્થે યુવકને જામનગર લઈ જવામાં આવ્યો હતો.

પંચમહાલમાં બાઈક સવાર થયા ઈજાગ્રસ્ત
પંચમહાલમાં પણ પતંગનો દોરો આવી જતા બે બાઈક સવાર ઈજાગ્રસ્ત થયા છે. જેમાં પંચમહાલના રેણા ગામનો યુવક ઘરેથી પેટ્રોલપંપે જતો હતો ત્યારે ચાલુ બાઈકે ચાઈનીઝ દોરી ગળામાં ભરાઈ જતા યુવક ગંભીર રીતે ઈજાગ્રસ્ત થયો હતો. ઘટના બાદ યુવકને ગોધરા સિવિલ હોસ્પિટલ ખસેડવામાં આવ્યો છે જ્યાં યુવકની હાલત અત્યંત ગંભીર છે. તો બીજી ઘટનામાં યુવક મોરવા હડફ તાલુકાના મોજરી ગામેથી પસાર થઈ રહ્યો હતો ત્યારે અચાનક ગળામાં પતંગની દોરી આવી જતા બાઈક પરનો કાબુ ગુમાવ્યો હતો. જેથી રસ્તા ઉપર પટકાતા પગ અને શરીરના અનેક ભાગે ગંભીર ઇજાઓ પછી હતી.

રાજકોટમાં ચાઈનીઝ દોરીથી વધુ એકને ઈજા
ઉત્તરાયણના દિવસે રાજકોટમાં વધુ એક વ્યક્તિ જીવલેણ ચાઈનીઝ દોરીનો ભોગ બન્યો છે. બેડી વિસ્તારમાં તરૂણને ગળાના ભાગે ચાઈનીઝ દોરી વાગતા ગંભીર રીતે ઈજાગ્રસ્ત થતા તેને હોસ્પિટલ ખસેડવામાં આવ્યો હતો. તરૂણ જ્યારે ઘર તરફ જઈ રહ્યો હતો ત્યારે તેને ગળાના ભાગે દોરી વાગી હતી.

સાબરકાંઠાના ઈડરમાં ચાઇનીઝ દોરીથી યુવકનુ ગળું કપાયું
સાબરકાંઠાના ઈડરમાં પણ યુવકને ગળાના ભાગે ચાઈનીઝ દોરી વાગી હતી. વહેલી સવારે યુવક ગાયોને ઘાસચારો આપવા જતો હતો તે સમયે ઈડરના હાલુડી વિસ્તારમાં યુવકનું ચાઈનીઝ દોરીથી ગળુ કપાયુ હતુ. યુવકને ગળાના ભાગે ગંભીર ઈજા થતા યુવકને હોસ્પિટલ ખસેડાયો હતો.

મહીસાગર ગોધરા મોડાસા હાઇવે પર 4 લોકોને ઇજા
મહિસાગરના ગોધરા-મોડાસા હાઈવે પર 4 લોકો પસાર થઈ રહ્યા હતા. ત્યારે પતંગની દોરી ગળામાં ફસાઈ જતા તેઓને ગંભીર ઈજાઓ પહોંચવા પામતા તમામને સારવાર અર્થે સરકારી હોસ્પિટલમાં ખસેડાયા હતા.