રાત્રિના લગભગ 2 વાગ્યે, ઈસરો સેન્ટર બેંગલુરુમાં પ્રધાનમંત્રી નરેન્દ્ર મોદી બેસીને ઐતિહાસિક ક્ષણની રાહ જોઈ રહ્યાં હતાં. વૈજ્ઞાનિકોની નજર પણ કમ્પ્યૂટર સ્ક્રીન્સ પર ચંદ્ર પરથી સંકેતોની રાહ જોઈ રહ્યાં હતાં. પરંતુ અચાનક એવું બન્યું કે વૈજ્ઞાનિકો સહિત સમગ્ર દેશમાં ચિંતા વધી ગઈ. કારણ કે ઘટના જ એવી બની હતી.
લૅન્ડર વિક્રમ સાથે ચંદ્રની સપાટીથી લગભગ 2.1 કિ.મી દૂર અંતિમ ક્ષણોમાં સંપર્ક અચાનક તૂટી ગયો. આ સંપર્ક એક વખત તૂટી ગયો અને સંપર્ક થવાની રાહ જોતા રહ્યાં. વૈજ્ઞાનિકોના ચહેરા ઉદાસ થઈ ગયાં.
વિક્રમ લૅન્ડરની આ હતી અંતિમ ઝલક
લૅન્ડિંગ પ્રક્રિયા શરૂ થઈ ત્યારે શરૂઆતમાં તો સફળતાપૂર્વક વિક્રમ લૅન્ડિંગના ચારેય ઍન્જિન શરૂ કરી દેવાયા હતાં. લૅન્ડિંગ પણ થઈ રહ્યું હતું અને બધું બરાબર ચાલી રહ્યું હતું. વૈજ્ઞાનિકો સહિત પીએમ મોદી પણ તાળીઓ પાડી રહ્યાં હતાં અને ઐતિહાસિક ક્ષણની રાહ જોઈ રહ્યાં હતાં. એવામાં મોડી રાત્રે આશરે 1:50 વાગ્યે અચાનક વિક્રમ લૅન્ડર સાથે સંપર્ક તૂટી ગયો. વિક્રમની અંતિમ તસવીરો પણ જોવા મળી અને બસ, ઉતરાણ કરવાની થોડી જ મિનિટો બાકી હતી અને આખરે અંતિમ ઝલક આપી તે ISRO ની આંખથી ઓઝલ થઈ ગયું.
વૈજ્ઞાનિકોએ 2.15 વાગ્યા સુધી કોઈ સત્તાવાર નિવેદન આપ્યું ન હતું કે વિક્રમનું સૉફ્ટ લૅન્ડિંગ થયું છે કે નહીં. સૌ કોઈ સ્પેસ રિસર્ચ સૅન્ટરથી સારા સમાચારની રાહ જોઈ રહ્યું હતું. આ અંતિમ ક્ષણોમાં સૌ કોઈના ધબકારા થંભી ગયાં હતાં.
આ એ ક્ષણ હતી જ્યારે ચંદ્રયાન મિશનના રોકેટ લૉન્ચરનો સૌથી આગળનો હિસ્સો વિક્રમ લૅન્ડર સૉફ્ટ લૅન્ડિંગ કરવા જઈ રહ્યું હતું. ત્યારે અચાનક દરેક જગ્યાએ સન્નાટો છવાઈ ગયો. ISRO ના મીડિયા સેન્ટરમાં પણ અસમંજસની સ્થિતિ બની ગઈ.
ઈસરોએ અંતમાં સત્તાવાર રીતે પત્રકારોને સંબોધીને માત્ર એટલું કહ્યું હતું કે વિક્રમ લૅન્ડર સાથે 2.1 કિ.મી દૂર સંપર્ક તૂટી ગયો છે. ત્યાર બાદ ISRO ની પત્રકાર પરિષદ પણ રદ્દ કરી દેવામાં આવી હતી.
પ્રધાનમંત્રી મોદીએ અને અન્ય નેતાઓએ જુસ્સો વધાર્યો
ઉલ્લેખનીય છે કે PM મોદીએ ISRO ના મુખ્યાલયથી રવાના થતાં પહેલાં વૈજ્ઞાનિકોની પ્રસંશા કરી હતી. તેમણે કહ્યું હતું કે હિંમત રાખો હું અને દેશ તમારી સાથે છે. તમે જે સિદ્ધિ પ્રાપ્ત કરી છે તે કંઈ ઓછી નથી.
મહેનત કરી છે તેની કોઇ તુલના નહીંઃ અમિત શાહ
દેશના ગૃહમંત્રી અમિત શાહે પણ ઈસરોની કામગીરીને વખાણી. અમિત શાહે ટ્વીટ કરીને કહ્યું કે વૈજ્ઞાનિકોએ જે મહેનત કરી છે તેની કોઈ તુલના થઈ શકે એમ નથી. આ સાથે જ અમિત શાહે વૈજ્ઞાનિકોને ભવિષ્યના સાહસો માટે શુભેચ્છા પાઠવી હતી.
ISRO’s achievement with getting Chandrayaan-2 so far has made every Indian proud.
India stands with our committed and hard working scientists at @isro.
તો ઈસરોની અથાગ મહેનતને રાહુલ ગાંધીએ પણ બિરદાવી. રાહુલ ગાંધીએ ટ્વીટ કરીને ઈસરોની ટીમને અભિનંદન આપ્યા અને કહ્યુ કે ઈસરોની મહેનત દેશના દરેક વ્યકિત માટે પ્રેરણાદાયી છે. રાહુલ ગાંધીએ એમ પણ કહ્યું કે ઈસરોની આ સિદ્ધિ દેશ માટે ભવિષ્યના અવકાશ સંશોધન કાર્યક્રમમાં સિમાચિન્હરૂપ સાબિત થશે.