ટીમ ઇન્ડિયા આવતી કાલે બેંગલુરુમાં ઓસ્ટ્રેલિયા સામે શ્રેણીની અંતિમ વન ડે રમશે. શ્રેણીમાં હાલ બંને ટીમ ૧-૧ની બરોબરી પર હોવાથી આવતી કાલની મેચ ફાઇનલ સમાન બની રહેશે. ટીમ ઇન્ડિયા બેંગલુરુમાં અત્યાર સુધીમાં સાત વન ડે મેચ રમી ચૂકી છે, જેમાં ટીમ ઇન્ડિયાનું પલડું ભારે રહ્યું છે.
બેંગલુરુમાં સાતમાંથી ચાર મેચ ભારતે જીતી છે અને બે મેચમાં હારનો સામનો કરવો પડ્યો
અહીં ચાર મેચમાં પ્રથમ બેટિંગ કરનારી ટીમ જીતી છે અને બે વાર બાદમાં બેટિંગ કરનારી ટીમ જીતી છે
બેંગલુરુની પીચ બેટિંગ માટે સાનુકૂળ
બેંગલુરુમાં સાતમાંથી ચાર મેચ ભારતે જીતી છે અને બે મેચમાં હારનો સામનો કરવો પડ્યો છે, જ્યારે એક મેચમાં પરિણામ આવી શક્યું નહોતું. બંને ટીમે બેંગલુરુમાં પ્રથમ મેચ ૧૯૯૯માં રમી હતી, જેમાં ટીમ ઇન્ડિયાએ કાંગારુંઓને ૧૭ બોલ બાકી હતા ત્યારે ત્રણ વિકેટે પરાજય આપ્યો હતો, જ્યારે છેલ્લી મેચ બંને ટીમે સપ્ટેમ્બર-૨૦૧૭માં રમી હતી. એ મેચ ઓસ્ટ્રેલિયાએ ૨૧ રનથી જીતી લીધી હતી.
બેંગલુરુમાં ટીમ ઇન્ડિયાએ બે મેચ પ્રથમ બેટિંગ કરતા જીતી છે અને બે મેચ પ્રથમ ફિલ્ડિંગ કરતા જીતી છે, જ્યારે ઓસ્ટ્રેલિયાએ બંને મેચ પ્રથમ બેટિંગ કરતા જીતી છે. બેંગલુરુમાં ટીમ ઇન્ડિયા ફક્ત એક જ વાર ટોસ જીતી શકી છે. એ મેચ ભારતે ૬૦ રનથી જીતી લીધી હતી. અહીં ચાર મેચમાં પ્રથમ બેટિંગ કરનારી ટીમ જીતી છે અને બે વાર બાદમાં બેટિંગ કરનારી ટીમ જીતી છે.
છેલ્લી મેચમાં ડેવિડ વોર્નર અને એરોન ફિંચે રેકોર્ડ ૨૩૧ રનની ભાગીદારી નોંધાવી હતી. એ રેકોર્ડને આ બંને બેટ્સમેનોએ વર્તમાન શ્રેણીની મુંબઈ વન ડેમાં તોડી નાખ્યો હતો. મુંબઈમાં વોર્નર-ફિંચે ૨૫૮ રનની ભાગીદારી કરી નવો રેકોર્ડ બનાવ્યો હતો.
બેંગલુરુમાં ટીમ ઇન્ડિયાનો સર્વોચ્ચ સ્કોર ૩૮૩ રનનો છે, જે તેણે નવેમ્બર-૨૦૧૩માં બનાવ્યો હતો. એ મેચમાં રોહિત શર્માએ બેવડી સદી ફટકારીને ૨૦૯ રનની ઇનિંગ્સ રમી હતી. રોહિતની એ ઇનિંગ્સને કારણે જ ટીમ ઇન્ડિયાએ એ મેચ ૫૭ રને જીતી લીધી હતી. ૧૯૯૬ના ટાઇટન કપમાં ટીમ ઇન્ડિયાએ ઓસ્ટ્રેલિયાને ૨૧૫ રનના સ્કોર પર રોકી દીધું હતું અને બે વિકેટે મેચ જીતી લીધી હતી.
આમ બેંગલુરુના રેકોર્ડની કહાણી સીધી તો નથી, પરંતુ અહીંની પીચ બેટિંગ માટે સાનુકૂળ છે. મેદાન પણ નાનું હોવાથી દર્શકોને ચોગ્ગા-છગ્ગાની રમઝટ જોવા મળશે એ નક્કી છે.