મેઘમહેર / રાજ્યમાં છેલ્લા 24 કલાકમાં 32 જિલ્લાના 176 તાલુકામાં વરસાદ

રાજ્યમાં સિઝનનો અત્યાર સુધી કુલ 98.10 ટકા જેટલો વરસાદ વરસ્યો છે અને ઓગસ્ટ માસથી અત્યારસુધી રાજ્યમાં સરેરાશ 18 ઇંચ વરસાદ નોંધાયો છે. રાજ્યના ત્રણ તાલુકામાં 4.9થી 9.8 ઇંચ વરસાદ અને 70 તાલુકામાં 9.8 ઇંચથી 19.6 ઇંચ વરસાદ પડ્યો છે. જ્યારે 121 તાલુકામાં 19.6 ઇંચથી 39.37 ઇંચ વરસાદ અને 57 તાલુકામાં 40 ઇંચ કરતા પણ વધુ વરસાદ પડ્યો છે.

આગામી 5 દિવસ ભારે વરસાદની આગાહી વચ્ચે રાજ્યના અનેક જિલ્લામાં મેઘમહેર જોવા મળી રહી છે. જેમાં બનાસકાંઠા, કચ્છ, જામનગર, રાજકોટ દ્વારકામાં છેલ્લા 24 કલાકથી મેઘમહેર જોવા મળી રહી છે.

સૌરાષ્ટ્રના અનેક જિલ્લાઓમાં વરસાદ વરસ્યો છે જેના કારણે ખેડૂતોમાં ખુશીની લહેર જોવા મળી રહી છે. વરસાદના કારણે કપાસ, મગફળી અને કઠોળ સહિતના પાકને ફાયદો થશે. ખેડૂતનોને પિયતની જરૂરિયાતના સમયે જ વરસાદ પડતા ખેડૂતો ખુશ થઇ ગયા છે. 

ગુજરાતમાં આગામી 5 દિવસ ભારે વરસાદની આગાહી કરવામાં આવી છે. રાજસ્થાન પર વરસાદી સિસ્ટમ ફરી સક્રિય થતા પૂર્વ-મધ્ય ગુજરાત અને દક્ષિણ ગુજરાતમાં ભારે વરસાદની આગાહી કરવામાં આવી છે. જ્યારે સૌરાષ્ટ્રમાં પણ ભારે વરસાદ પડી શકે છે. આગામી 3થી 5 સપ્ટેમ્બરથી ઉત્તર ગુજરાતમાં ભારે વરસાદની આગાહી કરવામાં આવી છે.

રાજકોટ શહેરમાં 7 ઇંચ વરસાદ ખાબક્યો
રાજકોટ શહેરમાં 7 ઇંચ જેટલો વરસાદ ખાબક્યો છે. ભારે વરસાદના કારણે લક્ષ્મીનગર અને પોપટપરા નાળું બંધ કરી દેવાયું છે. મહિલા કોલેજે અન્ડરબ્રિજનું નાળું બંધ કરી દેવાયું છે. સાવચેતીના ભાગરૂપે ફાયર બ્રિગેડની ટીમ અને મનપાનો વિજિલન્સ પોલીસ સ્ટાફ પણ તૈનાત કરી દેવાયો છે. શહેરમાં નીચાણવાળા વિસ્તારોમાં પાણી ભરાઇ ગયા છે. શહેરમાં હાલ ધીમીધારે વરસાદ હજુ ચાલું છે.