ક્રાઇમ / રાજકોટમાં મકાનમાલિકની નિર્દયતા: માત્ર 2 વર્ષના બાળકને દારૂ પીવડાવતા બેભાન, સિવિલમાં કરાયું દાખલ

• રાજકોટમાં મકાનમાલિકની નિર્દયતા
• 2 વર્ષના બાળકને દારૂ પીવડાવ્યો
• બાળક બેભાન થતા હોસ્પિટલમાં દાખલ

મકાનમાલિકે 2 વર્ષના બાળકને દારૂ પીવડાવતા બાળક બેભાન થઇ ગયું. આથી, બાળકને રાજકોટ સિવિલ હોસ્પિટલ ખાતે ખસેડવામાં આવ્યું. હાલમાં બાળક કે.ટી. ચિલ્ડ્રન હોસ્પિટલમાં સારવાર હેઠળ છે. આ સમગ્ર ઘટના રાજકોટના મીરા ઉદ્યોગનગર વિસ્તારની છે. વનરાજ નામના મકાનમાલિકે 2 વર્ષના બાળકને દારૂ પીવડાવ્યો હતો.

નાના બાળકને દારૂ પીવડાવવાનો આખરે મકાનમાલિકનો ઉદ્દેશ્ય શું?

જો કે, રાજકોટની આ ઘટનાને લઇને અહીં અનેક સવાલો ઊભા થાય છે જેવાં કે, આવડા નાના બાળકને દારૂ પીવડાવવાનો આખરે મકાનમાલિકનો શું ઉદ્દેશ્ય હશે? આ નાના બાળકે મકાનમાલિકનું શું બગાડ્યું? મકાનમાલિક પાસે દારૂ આવ્યો ક્યાંથી? ગુજરાતમાં છાશવારે બનતી આવી ઘટનાઓને લઇને રાજ્યમાં જાણે કે દારૂબંધીની માત્ર વાતો જ થતી હોય તેવું સ્પષ્ટપણે દેખાઇ રહ્યું છે. આખરે ગુજરાતમાં કેમ દારૂબંધીનો કડક અમલ નથી થતો? કથિત લઠ્ઠાકાંડ બાદ પણ રાજ્યમાં કોણ ખુલ્લેઆમ દારૂનું વેચાણ કરી રહ્યું છે? કેમ પોલીસની કાર્યવાહી પણ થોડા સમય સુધી જ થતી હોય છે ને પછી કેમ બંધ થઇ જાય છે? દારૂનું વેચાણ કરનારા સામે પોલીસ ક્યારે કાર્યવાહી કરશે? શું ગુજરાતમાં દારૂની બદીને નાથવા બનશે કોઇ એક્શન પ્લાન બનશે કે કેમ? જેવાં અનેક પ્રશ્નો અહીં ઊભા થતા હોય છે.

વડોદરાના નિઝામપુરામાં એક શિક્ષકે વિદ્યાર્થિનીને દારૂ પીવડાવ્યો

મહત્વનું છે કે, રાજ્યમાં આજે વડોદરાના નિઝામપુરા વિસ્તારમાં આવેલા એક ખાનગી ટ્યુશન ક્લાસના શિક્ષકે બદઇરાદાથી ક્લાસમાં આવતી ધો. 10ની વિદ્યાર્થિનીને દારૂ પીવડાવતા તેની તબિયત લથડી ગઇ હતી. આથી, વિદ્યાર્થિનીની તબિયત બગડ્યા બાદ ગભરાઇ ગયેલ શિક્ષક અર્ધ બેભાન હાલતમાં વિદ્યાર્થિનીને તેના ઘરે મૂકી આવ્યો હતો.

દીકરીની હાલત જોઇ માતા પણ ચોંકી ઉઠી હતી

જો કે અર્ધબેભાન અવસ્થામાં લથડીયા ખાતી ઘરે આવેલી દીકરીની હાલત જોઇને તેની માતા પણ ચોંકી ઉઠી હતી. આથી, દીકરીની હાલત માટે શિક્ષક જવાબદાર હોવાનો આરોપ મુકતી ફરિયાદ પણ પોલીસ મથકમાં કરવામાં આવી. જેથી ફરિયાદના આધારે ફતેગંજ પોલીસે શિક્ષક પ્રશાંત ખોસલાની અટકાયત કરી હતી.