રાજકોટમાં દિવસને દિવસે ભૂમાફિયાનું રાજ વધતું જઈ રહ્યું છે એવામાં જમીન કૌભાંડી ભૂપત ભરવાડની ક્રાઈમ બ્રાન્ચે ધરપકડ કરતા શહેર પોલીસને મોટી સફળતા મળી છે. પરંતુ આ ધરપકડની સાથે રાજકોટ પોલીસ કમિશ્નર પર સવાલ ઊભાં થઈ રહ્યાં છે ત્યારે જાણો સમગ્ર મામલો શું છે.
જમીન કૌભાંડી અને પોલીસ કમિશનરના ફોટો થયો વાયરલ
ભુપતના પુત્રના લગ્નમાં પોલીસ કમિશનરે આપી હતી હાજરી
પોલીસ કમિશનરને હાજરી આપતા ઉઠ્યાં અનેક સવાલો
રાજકોટ ક્રાઈમ બ્રાન્ચે આજે જમીન કૌભાંડી ભૂપત ભરવાડની ધરપકડ કરી હતી. પોલીસ તંત્રએ પ્રેસ કોન્ફરન્સ કરીને મીડિયાને આ વિશે જાણકારી આપી હતી. પોલીસે જણાવ્યું હતું કે શહેરમાં ધાક-ધમકીને આધારે ભૂપત ભરવાડને ઘણી જમીનો પોતાના કબજામાં કરી હતી. જેના પગલે તેના સામે ઘણી ફરિયાદો પણ થઈ હતી.
આવામાં હવે ક્રાઈમ બ્રાન્ચે તેની ધરપકડ કરીને કાર્યવાહી હાથ ધરી છે. પરંતુ આ બધાની વચ્ચે સૌથી વધુ ચર્ચાનો વિષય બન્યો છે રાજકોટ પોલીસ કમિશ્નરની એક તસવીર જે ભૂપત ભરવાડ સાથેની છે. આ તસવીર ભૂપત ભરવાડના પુત્રના લગ્નની છે જેમાં રાજકોટ પોલીસ કમિશ્નર મનોજ અગ્રવાલની હાજરીએ ઘણાં સવાલો ઊભાં કર્યા છે.
ભૂપત ભરવાડની એક બાજુ ક્રાઈમ બ્રાન્ચે ધરપકડ કરી છે ત્યારે રાજકોટ પોલીસ કમિશ્નનરની ભૂપત સાથેની તસવીરો વાયરલ થઈ રહી છે. ઉલ્લેખનીય છે કે ગઈ કાલે જ રાજકોટ પોલીસ કમિશ્નરે ભૂમાફિયાઓ બાબતે ફરિયાદ કરવા સામે આવવા માટે લોકોને અપીલ કરી હતી.
ગઈ કાલે રાજકોટ પોલીસ કમિશ્નરે કરી હતી આ અપીલ
રાજકોટ પોલીસ કમિશનરે લોકોને સામે આવીને ફરિયાદ આપવા માટે અપીલ કરી હતી. શહેરમાં ભૂમાફિયાઓનો ત્રાસ વધતાં પોલીસ કમિશ્નરે કહ્યું હતું કે કોઈની પણ જમીન પચાવી હોય તો તેઓ સામે આવીને ફરિયાદ નોંધાવે. મહત્વનું છે કે જમીન કૌભાંડમાં ભૂપત ભરવાડ સાથે રાકેશ પોપટ અને રાજુ ગોસ્વામીના પણ નામ ખૂલ્યાં છે.