અમદાવાદ, વડોદરા, સુરત, રાજકોટ, ભાવનગર, જામનગર, જૂનાગઢ અને ગાંધીનગર આ તમામ મહાનગરના વિસ્તારો માટેના જમીન એનએ, શરતફેરની અરજીઓ અને જમીન સુધારણા અંગેની કામગીરી હવે ગાંધીનગરની કચેરીએથી કરવામાં આવશે.
ડે. કલેકટરને મહાનગરપાલિકામાં આ કામગીરી કરવાની હતી
14 દિવસ પછી ફરી એક ફેરફાર
તમામ અધિકારી એક જ સ્થળ ગાંધીનગરથી કામગીરી સંભાળશે
હવેથી તમામ આઠ ડેપ્યુટી કલેકટર ગાંધીનગર ખાતેથી જ ઓનલાઇન અરજીઓની ચકાસણી કરીને જે તે ઓર્ડર નિયમ મુજબ કરશે. મહત્વનું છે કે અગાઉ આ ડેપ્યુટી કલેકટરો અલગ અલગ મહાનગરપાલિકોમાં કામગીરી કરવાની હતી.
રાજ્ય સરકારે આઠ મ્યુનિસિપલ કોર્પોરેશન માટેની જમીન એનએ અને શરતફેરની ઓનલાઇન અરજીઓમાં દરેક મહાનગરપાલિકા દીઠ એક એમ આઠ ડેપ્યુટી કલેકટરની નિમણુંક કરી હતી. જેમાં તેમને જે તે મહાનગરપાલિકામાં આ કામગીરી કરવાની હતી. હવે 14 દિવસ પછી તેમાં ફરી એક ફેરફાર કરવામાં આવ્યો છે તે મુજબ હવે ગાંધીનગર ખાતે આ આઠ ડેપ્યુટી કલેકટર તેમની કામગીરી સંભાળશે.
આ વિસ્તારોના જમીન એનએ, શરતફેર અને જમીન સુધારણાની કામગીરી નાયબ કલેકટર, એનએ મામલતદાર અને ચૂંટણી શાખામાં રજૂ થતી હતી. જેની ચકાસણી પ્રાંત અધિકારી દ્વારા કરવામાં આવતી હતી. પ્રાંત અધિકારી પર આ કામનું ભારણ વધતા સરકારે આ માસની શરૂઆતે ડેપ્યુટી કલેકટરની કક્ષાની નવી જગ્યા ઉભી કરી હતી.
આ કામગીરીની વહેંચણી કરાઈ હતી તે માટે આઠ અધિકારીએ જે તે મહાનગરમાં પૂર્વ ચકાસણી અધિકારી તરીકે કામગીરી કરવાની હતી. હવેથી 20 નવેમ્બરના રોજ સરકારે કરેલા નવા નિર્ણય અનુસાર તમામ અધિકારી એક જ સ્થળ ગાંધીનગરથી તમામ મહાનગરપાલિકાની ઓનલાઈન અરજીની કામગીરી સંભાળશે.