ખુલાસો / જમીન વિકાસ નિગમના પૂર્વ એમડી દેત્રોજાએ 2 વર્ષમાં 6 ગામમાં કરોડોની મિલકત ખરીદી

મળતી માહિતી મુજબ દેત્રોજાએ પોતાની સગા સંબંધીઓના નામે મિલકતો ખરીદી હતી. છેલ્લા 2 વર્ષમાં દેત્રોજાએ 70 હેક્ટરથી વધુની જમીન ખરીદી છે. રાજ્યના જુદાજુદા જિલ્લાના ગામોમાં દેત્રોજાએ પોતાના સંબંધીઓના નામે જમીન ખરીદી હતી. 

દેત્રોજાએ છેલ્લા 2 વર્ષમાં 2 કરોડ 52 લાખ રૂપિયાની જમીન ખરીદતા સવાલ ઉઠ્યા છે. બેનામી પ્રોપર્ટી ટેક્ષ હેઠળ જો પૂર્વ એમડી દેત્રોજા દોષિત સાબિત થશે તો તેમને 7 વર્ષની સજા થઈ શકે છે.

અત્રે ઉલ્લેખનીય છે કે, ગત વર્ષે સેટેલાઇટમાં આનંદ નિકેતન સ્કૂલ પાસે રત્નમ રેસિડેન્સીમાં રહેતા કે.એસ. દેત્રોજાના ઘરે સર્ચ કરીને તેમની પાસેથી કરોડોની મિકલતો ઝડપાય હતી. તપાસ દરમિયાન અમદાવાદ, ગાંધીનગર, મોરબી, સુરેન્દ્રનગર, ધાંગધ્રા, મહેસાણા અને વડોદરા સહિત રાજ્યના જુદા-જુદા સ્થળોએ કોમર્શિયલ દુકાનો, પેટ્રોલ પંપ, ફાર્મ હાઉસ હાઇવે-પર હોટલ તેમજ અમદાવાદ-સરખેજ હાઇવે પર વૈષ્ણોદેવી સર્કલ પાસે બાલાજી વિન્ડપાર્કમાં પત્નીના નામે ૭ બી.એચ.કે.નો ફ્લેટ, ખેતીની જમીન વિગેરે સ્થાવર મિલકતોમાં નામી-બેનામી મોટું રાકોણ કરેલું હોવાનું બહાર આવ્યું હતું, સાથે દસ્તાવેજી પુરાવા પણ મળ્યા હતા.