સૌરાષ્ટ્રમાંથી 25 લાખ લીટર દૂધનો પ્લાન્ટમાં ઉપયોગ થશે, પ્લાન્ટમાં દૂધનો પાઉડર તૈયાર કરવામાં આવશે.
સૌરાષ્ટ્ર અને કચ્છ માટે મહત્વના સમાચાર
રાજકોટ નજીક બનશે અમૂલનો પ્લાન્ટ
રાજકોટના ગઢકા પાસે પ્લાન્ટ માટે જમીનની ફાળવણી
રાજકોટમાં ગઢકા ખાતે અમૂલ પ્લાન્ટને ગત જુલાઇ મહિનામાં જ સરકારે મંજૂરી આપી દીધી છે. મહત્વનું છે કે જિલ્લા વહીવટી તંત્રએ સરકારમાં દરખાસ્ત કરી હતી જે બાદ ગઢકા ખાતે 100 એકર જમીનની ફાળવણી કરવા માટે રાજકોટ તંત્રને આદેશ કરવામાં આવ્યો હતો. જે બાદ આજે રાજકોટના ગઢકા પાસે પ્લાન્ટ માટે 116 એકર જમીનની ફાળવણીની પ્રોસેસ કરવામાં આવી છે. અમૂલે 100 કરોડની રકમ રાજકોટ વહીવટી તંત્રને ચૂકવી દીધી છે. હવે કુલ 200 કરોડના ખર્ચે પ્રતિદિન 30 લાખ લીટર દૂધ પ્રોસેસ કરતો અમૂલનો પ્લાન્ટ સ્થાપિત થશે. જેનો સીધો જ ફાયદો સૌરાષ્ટ્ર-કચ્છના દૂધ ઉત્પાદકોને થશે. ટૂંક સમયમાં મુખ્યમંત્રીના હસ્તે અમૂલ પ્લાન્ટનું ભૂમિપૂજન કરાશે.
આ પહેલા જિલ્લા વહીવટી તંત્રએ સરકારમાં પ્લાન્ટની મંજૂરી માટે કરી હતી દરખાસ્ત
મહવનું છે કે ગઢકા ગામની સર્વે નંબર 477ની 100 એકર જમીન આ માટે પસંદ કરવામાં આવી હતી. જમીન માટે જિલ્લા તંત્રએ દરખાસ્ત પણ મૂકી હતી.જમીન જંત્રીનો ભાવ 520 રૂપિયા આસપાસ નક્કી કરાયો છે. આ પહેલા રાજકોટ જિલ્લા તંત્ર દ્વારા અમૂલ ડેરીના પ્લાન્ટ માટે જામનગર રોડ તરફ આવેલા આનંદપરા ગામમાં 100 એકર જમીન પસંદ કરવામાં આવી હતી. પણ GCMMFને પ્લાન્ટ સેટ અપ કરવા માટે આ ભાવ મોંઘો પડતો હતો. તેથી જગ્યા બદલીને ગઢકાગામની જમીન લેવાનું પસંદ કરવામાં આવ્યું હતું. અહી પ્લાન્ટ સ્થાપવાનો નિર્ણય 25 સપ્ટેમ્બર 2020માં લેવાયો હતો.
અમૂલની સ્થાપના અને ઇતિહાસ
અમૂલ એક સહકારી દૂધ મંડળી છે જેની સ્થાપના 1946માં થઈ હતી. અમૂલ એ ગુજરાત સહકારી દૂધ વિતરણ સંઘ લિ. (ગુજરાત કો-ઓપરેટિવ મિલ્ક માર્કેટિંગ ફેડરેશન લિમિટેડ) દ્વારા સંચાલિત એક બ્રાન્ડ છે. અમૂલ આણંદમાં આવેલી છે અને સહકારી સંસ્થાની લાંબા ગાળાની સફળતાનું ખુબજ ઉત્તમ ઉદાહરણ છે. અમૂલ ભારતની શ્વેત ક્રાંતિ છે, જેથી ભારત વિશ્વમાં દૂધ અને દૂધ ઉત્પાદનો સૌથી મોટું ઉત્પાદક બન્યું છે. તે વિશ્વની સૌથી મોટી શાકાહારી માખણની બ્રાન્ડ પણ છે.