ચૂંટણી / લાલુ યાદવની વહુ ઐશ્વર્યાએ નીતિશ કુમારના ચરણ સ્પર્શ કરી આશીર્વાદ લીધા અને કહ્યું, આજે હું મારા પિતા માટે...

• બિહારમાં યોજાવાની છે વિધાનસભાની ચૂંટણી
• લાલુ પરિવારના વેવાઈ JDUમાંથી લડી રહ્યા છે ચૂંટણી 
• લાલુ પરિવારની પુત્રવધુ ઐશ્વર્યા રાય પણ રાજનીતિમાં આવે તેવી અટકળો 

બિહાર માં હાલમાં રાજનીતિક ઘમાસાણ ચરમ પર છે અને આ વખતે જંગ નીતીશ કુમાર અને લાલુ પ્રસાદ યાદવ ના પુત્ર તેજસ્વી યાદવ વચ્ચે છે, આ રાજનીતિક રેસમાં જો કે લાલુ પ્રસાદ યાદવની પુત્રવધુ અને તેજસ્વી યાદવના ભાઈ તેજ પ્રતાપ યાદવની પત્નીનું સમર્થન નીતીશ કુમારની પાર્ટીને પ્રાપ્ત થયું છે એટલું જ નહિ તેના પિતા પણ JDU માંથી ચૂંટણી લડી રહયા છે. 

"હું મારા પિતા માટે વોટ માંગવા આવી છું": ઐશ્વર્યા રાય 

લાલુ પ્રસાદ યાદવ ના વેવાઈ ચંદ્રિકા રાય હાલમાં JDU માંથી ઉમેદવાર છે, એટલે જ્યારે નીતીશ કુમાર તેમના માટે પ્રચાર કરવા પરસા વિધાનસભા ક્ષેત્રે પહોંચ્યા હતા ત્યારે લાલુ પ્રસાદ યાદવની પુત્રવધુ ઐશ્વર્યા રાય પણ ત્યાં આવી હતી, ત્યારે તેણે નીતીશ કુમારના ચરણ સ્પર્શ કર્યા હતા અને સંબોધનમાં જણાવ્યું હતું કે "હું હાલમાં મારા પિતા માટે વોટ માંગવા આવી છું, આ પરસા વિધાનસભા ક્ષેત્રના માન સમ્માનની વાત છે અને હું થોડા જ સમયમાં તમારી વચ્ચે આવીશ"

બિહાર ના મુખ્યમંત્રી નીતીશ કુમારે પહેલા તેમની સરકારની સિદ્ધિઓ  ગણાવી હતી અને ઐશ્વર્યા રાયની મુશ્કેલીઓને લોકોની સામે મૂકી હતી, તેમણે કહ્યું હતું કે એક ભણેલી ગણેલી છોકરી સાથે આવી રીતે વ્યવહાર થયો તે યોગ્ય નથી" જેને લઈને લોકો લાલુ પરિવારની નિંદાકરી રહ્યા હતા, જો કે મુખ્યપ્રધાને જણાવ્યું હતું કે "પ્રકૃતિએ આ કૃત્યને લઈને કોઈ બીજી વ્યવસ્થા જરૂરથી બનાવી જ હશે"

શું છે મામલો? 

લાલુ પ્રસાદ યાદવના વેવાઈ ચંદ્રિકા રાય પહેલા આ જ વિધાનસભા સીટ પરથી RJD ની ટીકીટ પર ચૂંટણી લડ્યા હતાં અને જીત્યા પણ હતા, જો કે બાદમાં લાલુ પ્રસાદ યાદવ ના દીકરા તેજ પ્રતાપ યાદવ અને તેની પત્ની અને ચંદ્રિકા રાયની પુત્રી ઐશ્વર્યા રાય વચ્ચેના મતભેદો સપાટી ઉપર આવ્યા હતા. 

શરૂઆતમાં જો કે લાલુની પત્ની રાબડીદેવીએ આ ઘટના પર પડદો નાખવાનો પ્રયાસ કર્યો હતો અને ઐશ્વર્યા રાય ને ઘર છોડતા રોકી હતી પરંતુ પછી પણ તેજ પ્રતાપ યાદવ માન્યા નહોતા અને આખરે  છૂટાછેડા માટેની અરજી ફાઈલ થઈ હતી. હાલમાં આ મામલો અદાલતમાં પેન્ડિંગ છે.