સુવિધા / પિંક કલરના હેરિટેજ લૂકમાં રંગાયું લાલ દરવાજા AMTS બસ ટર્મિનસ: CM ના હસ્તે અમદાવાદીઓને મળશે ભેટ

• પિંક કલરના હેરિટેજ લૂકમાં રંગાયું લાલ દરવાજા AMTS બસ ટર્મિનસ
• સોમવારે મુખ્યપ્રધાનના હસ્તે લાખો અમદાવાદીઓને અનોખી ભેટ મળશે
•  મુસાફરોએ ફરિયાદ કરવા જમાલપુર જવું નહીં પડે

લાખો અમદાવાદીઓ લાંબા સમયથી જેની પ્રતીક્ષા કરતા હતા તે પિંક કલરના હેરિટેજ લૂક ધરાવતા લાલ દરવાજા એએમટીએસ બસ ટર્મિનસનું લોકાર્પણ ૫ જૂન, સોમવારે મુખ્યપ્રધાન ભૂપેન્દ્ર પટેલના હસ્તે કરાશે. એએમટીએસ તંત્ર દ્વારા તેને હેરિટેજ લૂક આપીને ભવ્ય રીતે તૈયાર કરાયું હોવાથી શહેરીજનોમાં પણ ઉત્સાહ જોવા મળી રહ્યો છે. આ ટર્મિનસમાં સત્તાવાળાઓએ પેસેન્જરલક્ષી અનેક સુવિધાઓ ઊભી કરી હોવાનો દાવો કર્યો છે, જેમાં એએમટીએસ બસના સંચાલન કે ડ્રાઇવર-કંડક્ટરના વર્તન સહિતની બાબતોની ફરિયાદ કરવા માટે હવે પેસેન્જર્સે છેક જમાલપુરના ટ્રાન્સપોર્ટ હાઉસ સુધી નહીં જવું પડે, પરંતુ તે માટે આ ટર્મિનસ ખાતે જ અલગ કંટ્રોલ કેબિન તૈયાર કરાઈ છે. આ નવી વ્યવસ્થા પેસેન્જર્સને એએમટીએસ સંબંધિત ફરિયાદ અને તેનો વ્યવસ્થિત નિકાલ લાવવાના મામલે ભારે મદદરૂપ બનશે.

અંદાજિત ખર્ચ રૂ. ૮.૮૮ કરોડ થયો છે
એએમટીએસના ચેરમેન વલ્લભ પટેલ આ અંગે વધુ માહિતી આપતાં કહે છે, આ ટર્મિનસને બનાવવાનો અંદાજિત ખર્ચ રૂ. ૮.૮૮ કરોડ થયો છે. ટર્મિનસનું મુખ્ય બિલ્ડિંગ પ્લેટફોર્મ નંબર-૧ પર બંધાયું હોઈ તેમાં રાજસ્થાનના ભરતપુરથી સ્પેશિયલ માર્બલ મંગાવીને ઉપયોગમાં લેવાતાં તેનાથી બિલ્ડિંગનું તાપમાન ચારથી પાંચ ડિગ્રી ઓછું રહેશે.

ટર્મિનસ બિલ્ડિંગના ગ્રાઉન્ડ ફ્લોર પર આધુનિક ફિલ્ટર હેવી ડ્યૂટી સ્ટોરેજ સાથે પાણીની સુવિધા કરાઈ હોઈ પેસેન્જર્સને આરોગ્યપ્રદ પીવાનું પાણી મળશે. પ્લેટફોર્મ નંબર-૧થી ૭ ઉપર બેઠક વ્યવસ્થા સાથે પાઇપ ફેબ્રિકેશન ઉપર ડેકોરેટિવ બસ શેલ્ટર, અંધજન-અપંગ તથા શારીરિક ખોડખાંપણવાળા પેસેન્જર્સ માટે અલાયદી વ્યવસ્થા, દરેક પ્લેટફોર્મ ઉપર પેસેન્જર્સ માટે બસના રૂટ અને સમયપત્રક માટેની માહિતી ઉપલબ્ધ કરાવતી પબ્લિક ઇન્ફર્મેશન સિસ્ટમ તેમજ દરેક પ્લેટફોર્મ ઉપર સીસીટીવી કેમેરાની વ્યવસ્થા કરાઈ હોવાનું એએમટીએસના ચેરમેન વલ્લભ પટેલ વધુમાં કહે છે.

બિલ્ડિંગનો હરિટેજ લૂક જાળવી રાખવા સોલર પેનલ લગાવાઈ નથી
અહીં આવનાર તથા ટર્મિનસથી શરૂ થનાર બસની માહિતી એલઈડી સ્ક્રીન પર દર્શાવાશે. મુખ્ય કંટ્રોલરૂમ સાથે નવ કંટ્રોલ કેબિન મુકાઈ છે. ઉપરાંત એએમટીએસની ૧૯૪૭થી ૨૦૨૩ સુધીની હિસ્ટ્રીવાેલ પણ પેસેન્જર્સને આકર્ષિત કરશે. ટર્મિનસમાં પ્રવેશતી વખતે બસની ગતિ ધીમી પડે અને પેસેન્જર્સની સલામતી સચવાય તે માટે દરેક પ્લેટફોર્મ પર સ્પીડ બ્રેકર મુકાયા છે. ફાનસ પેટર્ન ધરાવતી લાઇટ અને પથ્થરની બેઠક વ્યવસ્થા છે.ટર્મિનસના ગ્રાઉન્ડ ફ્લોર પર આ‌િસ. મેનેજર કેબિન ઇન્સ્પેક્ટર અને એકાઉન્ટ ઓફિસરની ઓફિસ, બુકિંગ ઓફિસ, ઇન્કવાયરી ઓફિસ, પીવાનું પાણી, પેસેન્જર્સની ફરિયાદ માટે અલગ કંટ્રોલરૂમ છે. પહેલા માળે કેશ કલેક્શન કેબિન, મિટિંગ હોલ, ડિરેક્ટર ઓફ ટ્રાફિકની ઓફિસ, વીઆઇપી વેઇટિંગરૂમ, ઈલેક્ટ્રિક-સોલર પાવર કેબિન, ટિકિટ મશીનરૂમ છે.ટર્મિનસમાં આરસીસી રોડ અને ડ્રેનેજની સુવિધા કરાઈ છે, જોકે બિલ્ડિંગનો હરિટેજ લૂક જાળવી રાખવા સોલર પેનલ લગાવાઈ નથી.