વાહ ! / મધ્ય પ્રદેશના એક ગામમાં 21 વર્ષની યુવતી બની સરપંચ, ગામલોકોએ ઢોલ નગાડા વગાડી ઉજવણી કરી

• એમપીના એક ગામમાં સૌથી નાની ઉંમરની મહિલા બની સરપંચ
• યુવતી જીતી જતાં ગામલોકોએ ઢોલ નગારા વગાડી ઉજવણી કરી
• યુવતીએ ગામલોકોને આપ્યા હતા આવા વચનો

મધ્ય પ્રદેશના ઉજ્જૈનની 21 વર્ષિય લક્ષિકા ડાગર ત્રિસ્તરીય પંચાયત ચૂંટણી જીતીને રાજ્યમાં સૌથી નાની ઉંમરના સરપંચ બની ગયા છે. લક્ષિકા જિલ્લાના ચિંતામન જવાસિયા ગ્રામ પંચાયતના સરપંચ બન્યા છે. જન્મદિવસના એક દિવસ પહેલા સૌથી નાની ઉંમરના સરપંચ બનવા પર ગામલોકોએ તેમને શુભકામનાઓ આપી છે. તો વળી લક્ષિકા જીતી જતાં ગામમાં દિવાળી જેવો માહોલ છે. ગામલોકોએ યુવા મહિલા સરપંચ બનતા ઢોલ નગાડા સાથે સ્વાગત કર્યું હતું.

લક્ષિકાને જ્યારે આ મોટી ઉપલબ્ધિ વિશે પૂછવામાં આવ્યું તો તેણે કહ્યું કે, આ મારા માટે ખુશીની ક્ષણ છે, હું ભાગ્યશાળી છું કે, રાજ્યમાં સૌથી નાની ઉંમરની સરપંચ બની છું. હું ઈચ્છું છું કે, ગામ સારી રીતે વિકસીત થાય. મને આશા છે કે, હું તમામની સમસ્યાઓનું સમાધાન કરીશ અને સૌને સાથે રાખીને કામ કરીશ.

રેડિયો જોકી પણ રહી ચુકી છે લક્ષિકા

લક્ષિકાએ જર્નલિઝ્મ અને માસ કમ્યુનિકેશન વિષયમાં પોસ્ટ ગ્રેજ્યુએટ ડિપ્લોમાં કર્યું છે. થોડા સમય માટે તેણે મોડલિંગ પણ કર્યું હતું. ત્યાર બાદ ઉજ્જૈનમાં જ તેણે રેડિયો જોકીનું કામ પણ કર્યું છે. 

487 વોટથી વિપક્ષીને હરાવ્યા

લક્ષિકાએ 487 વોટથી જીત નોંધાવી છે. ગ્રામ પંચાયત ચિંતામન જવાસિયામાં સરપંચ પદ માટે ગામની આઠ મહિલાઓએ ઉમેદવારી નોંધાવી હતી. પણ ગ્રામવાસીઓએ લક્ષિકા પર વિશ્વાસ મુક્યો અને સૌથી નાની ઉંમરની સરપંચ બનાવી છે.

ચૂંટણી માટે કરી હતી આ જાહેરાતો

લક્ષિકાએ પોતાના ચૂંટણી ઢંઢેરામાં ગામમાં પીવાના પાણીની સમસ્યા, ગટર, સ્ટ્રીટ લાઈટની સમસ્યાને હલ કરવાના વચનો આપ્યા હતા. સાથે જ બેઘર લોકોને ઘર અપાવાનું વચન પણ આપ્યું છે. લક્ષિકા સરપંચ બનતા ગામલોકો ખુબ ખુશ છે. ગામલોકોનું માનવુ છે કે, લાંબા સમય બાદ કોઈ યુવા અને ઉચ્ચ શિક્ષિત મહિલા સરપંચ મળ્યા છે. તેનાથી ગામનો ખૂબ વિકાસ થશે.