સેવા / અહીં મહિલા પોલીસ જોવા મળી આદર્શ શિક્ષિકાનાં રૂપમાં, વંચિત બાળકો માટે કર્યુ એવું કામ કે...

પોલીસનું કામ કાયદો અને વ્યવસ્થાના રક્ષણનું છે. આથી તેમની ડ્યૂટી પણ તણાવથી ભરેલી હોય છે. આ સ્થિતિમાં તેઓ ઘર પરિવાર પર પૂરતું ધ્યાન કેન્દ્રીત કરી શકતા નથી. છતાં પણ કેટલાંક પોલીસકર્મી એવા પણ હોય છે જે પોતાની સર્વિસ ડ્યૂટીની જવાબદારી સાથે સામાજિક જવાબદારી પણ અદા કરતા હોય છે. આવી જ એક પોલીસની ઉમદા છાપ દર્શાવતી વાત ઉત્તરપ્રદેશનાં બુલંદશહરનાં ખર્જા ગામથી સામે આવી છે. જ્યાં એક મહિલા કોન્સ્ટેબલ પોતાની નોકરી બાદ બાળકોને ભણાવી રહી છે. તો કોણ છે આ પોલીસના રૂપમાં આદર્શ શિક્ષિકા તે જોઈએ આ અહેવાલમાં.

ના આ કોઈ સામાન્ય શાળા નથી અને આ કોઈ સાધારણ શિક્ષિકા નથી. તમે ઘણી શાળા જોઈ હશે પરંતુ આ એક એવી પાઠશાળા છે કે જેમાં ન તો કોઈ ફીસ લેવામાં આવે છે અને ન તો બાળકોને રાહ જોવરાવવામાં આવે છે. કેમ કે અહીંયા ભણાવવા માટે ખુદ પોલીસવાળી મેડમ આવે છે. જે દરરોજ પોતાની ડ્યૂટી પૂરી કર્યા બાદ બાળકોને અભ્યાસ કરાવવા લાગી જાય છે.

બુલંદશહરનાં ખુર્જા ગામમાં તહનાત આ મહિલા પોલીસકર્મી ખાસ કરીને એવા બાળકોને ભણાવે છે કે જેના માતા-પિતા પોતાના બાળકોને અભ્યાસ કરાવવા માટે ફી ભરી શકતા નથી અને અભ્યાસ માટે પુસ્તકો લાવી શકે તેવી સ્થિતિમાં નથી અને બાળકો પણ અહીં હોશે હોંશે અભ્યાસ કરી રહ્યાં છે.

ગુડ્ડુ ચૌધરી નામની આ મહિલા કોન્સ્ટેબલ એવા વંચિત બાળકોને ઓળખી કાઢે છે અને પછી તેમને એક જગ્યાએ એકઠા કરીને સડક કિનારે જ પાઠશાળા શરૂ કરી દે છે. ગુડ્ડૂ ચૌધરી આવા બાળકોને રોજ ત્રણ કલાક અભ્યાસ કરાવે છે. બાળકો પણ તેને પોલીસવાળી મેડમ કહીને સંબોધે છે.

પોલીસ અધિકારીઓ પણ આ મહિલા કોન્સ્ટેબલની પાઠશાળાની પ્રશંસા કરતા થાકતા નથી. હાથરસ નામના નાનકડા એવા ગામની રહેવાસી ગુડ્ડૂ ચૌધરી હજુ હમણાં છ મહિનાથી જ કોતવાલી ગામમાં ફરજ પર નિમણૂંક પામી છે. તે માત્ર વિદ્યાર્થીઓને ભણાવીને સંતોષ નથી માની રહી. તેણી આવા વંચિત બાળકો માટે પ્રાથમિક શાળાઓમાં એડમિશન અપાવવા માટે પણ મહત્ત્વની ભૂમિકા નિભાવી રહી છે અને નજીકની શાળાઓમાં જઈને તે આચાર્યને પણ સમજાવી રહી છે કે આ બાળકોને કોઈ પણ રીતે પ્રવેશ મળવો જોઈએ.

ગુડ્ડુ ચૌધરી નામની આ મહિલા કોન્સ્ટેબલની પ્રશંસનીય પહેલથી અનેક વંચિત બાળકો શાળાએ જતાં થયાં છે. એક પોલીસ તરીકેનું ઝનૂન અને એક શિક્ષિકા તરીકેની લાગણીથી તરબર આ મહિલા કોન્સ્ટેબલ પોતાની આ જહેમત દ્વારા અનેક લોકો માટે પ્રેરણાનું કામ કરી રહ્યાં છે. ખાસ કરીને એવા લોકો માટે કે જે લોકો હંમેશા સમય ન હોવાની ફરિયાદ કર્યા કરતા હોય છે.