લદ્દાખમાં LAC પર ચીનની સાથે ચાલી રહેલા તણાવ પર કોંગ્રેસે મોદી સરકાર પર પ્રહાર કર્યા છે. કોંગ્રેસના પૂર્વ અધ્યક્ષ રાહુલ ગાંધીએ પ્રધાનમંત્રી નરેન્દ્ર મોદી પર વાર કર્યા છે. તેમણે કહ્યું કે, ભૂલી જાઓ કે આપણે ચીન સામે ઉભા થઇ શકીએ. પ્રધાનમંત્રી મોદીમાં આટલી હિમ્મત નથી કે તેઓ ચીનનું નામ પણ લઇ શકે.
રાહુલ ગાંધીના પ્રધાનમંત્રી મોદી પર મોટા પ્રહાર
પ્રધાનમંત્રીમાં હિમ્મત નથી કે ચીનનું નામ લઇ શકેઃ રાહુલ ગાંધી
રક્ષા મંત્રાલયે આ દસ્તાવેજોને પોતાની વેબસાઇટથી હટાવી લીધા: રાહુલ ગાંધી
રાહુલ ગાંધીએ પોતાના ટ્વિટમાં એક સમાચાર પણ શેર કર્યા છે, જેમાં કહેવામાં આવ્યું છે કે, ચીનના અતિક્રમણની વાત કબૂલનારા દસ્તાવેજને રક્ષા મંત્રાલયની વેબસાઇટથી હટાવી દેવાયા છે. જોકે, રક્ષા મંત્રાલયે ગુરૂવારે પોતાની વેબસાઇટ પર એક ડૉક્યૂમેન્ટ અપલોડ કર્યા હતા, જેમાં કહેવામાં આવ્યું હતું કે લદ્દાખના કેટલાક વિસ્તારોમાં ચીની સેનાના અતિક્રમણની ઘટના વધી.
ડૉક્યૂમેન્ટમાં રક્ષા મંત્રાલયે સ્વીકાર કર્યો હતો કે મે મહિનાથી ચીન સતત LAC પર અતિક્રમણ વધતું જઇ રહ્યું છે. જોકે બાદમાં રક્ષા મંત્રાલયે આ દસ્તાવેજોને પોતાની વેબસાઇટથી હટાવી લીધા.
પ્રધાનમંત્રીને બચાવી રહ્યું છે રક્ષા મંત્રાલય
બીજી તરફ, આ સમગ્ર મામલાને લઇને કોંગ્રેસના નેતા અને પૂર્વ કેન્દ્રીય મંત્રી અજય માકને પ્રેસ કોન્ફરન્સ પણ કરી હતી. તેમણે કહ્યું કે, ચીનની સેનાએ આપણી જમીન પર અતિક્રમણ કર્યું. આપણી સેના LAC પર લડી રહી છે, પરંતુ સરકારનું નિવેદન ભ્રામક છે. ITBP પાછળ હટી રહી છે. પરંતુ ચીનની સેના પાછળ નથી હટી રહી.
અજય માકને કહ્યું કે, પીએમ મોદીએ કહ્યું આપણા વિસ્તારમાં કોઇ ઘુસ્યું નથી, ન કોઇએ આપણી જમીન પર કબજો કર્યો. પરંતુ રક્ષા મંત્રાલયે પોતાની વેબસાઇટ પર જૂનમાં થયેલી ગતિવિધિઓને લઇને માહિતી આપી. બાદમાં તેને હટાવી લેવામાં આવી. શું રક્ષા મંત્રાલય પ્રધાનમંત્રીને બચાવી રહ્યું છે.