રાષ્ટ્રીય પાટનગર નવી દિલ્હીમાં હોટલ, હોસ્પિટલ અને હાઉસિંગ સોસાયટીઓ હવે ટૂંક સમયમાં જ ઘેર બેઠાં ડીઝલની ડિલિવરી પ્રાપ્ત કરી શકશે. આ માટે સોમવારે 'હમસફર' નામની મોબાઇલ એપ્લિકેશન પણ લોંચ કરવામાં આવી છે.
સરકાર દ્વારા લોન્ચ કરાઈ આ નવી ખાસ સુવિધા
ડિલીવરી માટે ‘હમસફર’ મોબાઈલ એપ્લિકેશન લોન્ચ કરવામાં આવી
આ સેવા શરૂ કરવાનો હેતુ અવરોધ વગર ડીઝલનો સપ્લાય પહોંચાડવાનો છે
આ એપ્લિકેશનના લોન્ચિંગ પ્રસંગે આયોજિત એક કાર્યક્રમમાં શ્રમપ્રધાન સંતોષ ગંગવારે જણાવ્યું હતું કે ઓઇલ અને ગેસ ક્ષેત્ર દેશ માટે વ્યૂહાત્મક રીતે મહત્ત્વપૂર્ણ બન્યું છે અને આ નવો બદલાવ લાવવા તૈયાર છે.
હમસફર એપ્લિકેશનનો ઉપયોગ હાઉસિંગ સોસાયટી, હોટલ, મોલ, બાંધકામ સ્થળ, ઉદ્યોગ અને અન્ય જથ્થાબંધ ડીઝલ બાયર્સ હવે ઘેરબેઠાં ડીઝલની ડિલિવરી પ્રાપ્ત કરી શકશે. આ સુવિધા હાલ દિલ્હીના ગુરુગ્રામ, ગાઝિયાબાદ, નોઇડા, ફરિદાબાદ, હાપુર, કુંડલી, માનેસર અને બહાદુરગઢમાં ઉપલબ્ધ બનશે. હમસફરના ડાયરેક્ટર અને સંસ્થાપક સાનિયા ગોયલે જણાવ્યું કે આ સેવા શરૂ કરવાનો હેતુ મોલ, હોટલ, હાઉસિંગ સોસાયટી જેવા ડીઝલના મોટા બાયર્સને કોઇ જાતના અવરોધ વગર ડીઝલનો સપ્લાય પહોંચાડવાનો છે.
કોરોના આઉટબ્રેક બાદ પેટ્રોલ અને ડીઝલના ભાવ ઘટવાનો સિલસિલો જારી
કોરોના આઉટબ્રેક બાદ 12 જાન્યુઆરીથી પેટ્રોલ-ડીઝલના ભાવ ઘટવા લાગ્યા હતા અને આ સિલસિલો 11 ફેબ્રુઆરીએ અટકી ગયો હતો. ત્યાર બાદ ફરીથી પેટ્રોલ-ડીઝલના ભાવ ઘટવા લાગ્યા છે. ઓઇલ માર્કેટિંગ કંપનીઓએ આજે પેટ્રોલના ભાવમાં સરેરાશ પાંચ પૈસાનો ઘટાડો કર્યો છે. ગઇ કાલે પણ પેટ્રોલ 22 પૈસા સસ્તું થયું હતું અને એ અગાઉ 18 પૈસા પેટ્રોલમાં ઘટ્યા હતા. આમ, ત્રણ દિવસમાં પ્રતિલિટર પેટ્રોલના ભાવમાં ૪૫ પૈસાનો ઘટાડો થયો છે. દિલ્હી, મુંબઇ, કોલકાતા અને ચેન્નઇમાં પાંચ પૈસાના ઘટાડા સાથે ભાવ આજે રૂ.71.44, 77.13, 74.11 અને 74.23 પર આવી ગયો છે.
એ જ રીતે દિલ્હી અને કોલકાતામાં ડીઝલમાં સાત પૈસાના ઘટાડા સાથે ભાવ અનુક્રમે રૂ.64.03 અને રૂ.67.05 પર આવી ગયો છે, જ્યારે મુંબઇ અને ચેન્નઇમાં આઠ પૈસાના ઘટાડા સાથે ભાવ અનુક્રમે રૂ.67.05 અને રૂ.67.57 થઇ ગયો છે.