કચ્છ: કાપડના વેપારીનું બુકાનીધારીઓએ કર્યું અપહરણ પોલીસે શરૂ કરી તપાસ

કચ્છના આદિપુરમાં કાપડનાં વેપારીનું અપહરણ કરવામાં આવ્યું છે. માતા સાથે જઇ રહ્યાં હતાં ત્યારે વેપારીનું અપહરણ કરવામાં આવ્યુ હતું. ત્રણ બુકનીધારીઓએ વેપારીની કારમાં તોડફોડ કરી હતી. રૂપિયાના કારણે દિપક ખાટવાણીનું અપહરણ કરવામાં આવ્યુ હતું. આદિપુર પોલીસે આ અંગે વધુ તપાસ હાથ ધરી છે. 

આ ઘટના અંગે મળતી વિગત અનુસાર કચ્છ જિલ્લાના આદિપુરના કાપડના એક જાણીતા વેપારી આજરોજ જ્યારે પોતાના માતા સાથે જઇ રહ્યા હતા ત્યારે તેમનું અપહરણ કરવામાં આવ્યું હતું.

કાપડના વેપારી દિપક ખાટવાણી આજરોજ પોતાની સેવરોલેટ કંપનીની કાળા કલરની કારમાં જઇ રહ્યા હતા ત્યારે 3 બુકાનીધારી શખ્સોએ તેમની કાર અટકાવી હતી અને કારમાં તોડફોડ કરી તેમનું અપહરણ કર્યું હતું.

જો કે આ ઘટના બાદ વેપારી ઈજાગ્રસ્ત હાલતમાં ભદ્રેશ્વર નજીકથી મળી આવતા તેમને તાત્કાલિક અસરથી નજીકના ગાંધીધામ ખાતે આવેલ દવાખાને ખસેડવામાં આવ્યા હતા.

આ ઘટના અંગે જાણ પોલીસ મથકે થતાં પોલીસ દવાખાને પહોંચી હતી અને વેપારી સાથે આ મુદ્દે ચર્ચા કરી હતી. પોલીસે કરેલ પ્રાથમિક તપાસમાં આ અપહરણ રૂપિયાને કારણે કરવામાં આવ્યુ હોય તેવું જાણવા મળ્યું હતું. પોલીસે આ મામલે ફરિયાદ નોંધીને બુકાનીધારીઓને ઝડપી લેવા તપાસ યુધ્ધના ધોરણે શરૂ કરી છે.