કચ્છ: ભુજમાં શિક્ષણ વિભાગને શર્મસાર કરતી ઘટના સામે આવી છે. ભુજના મોટા રેહા ગામની પ્રાથમિક શાળાના વિદ્યાર્થીઓને શાળા તરફથી શબ્દજ્ઞાન આપવાને બદલે શૌચાલયની સફાઈ કરાવવામાં આવી રહી છે. આ શર્મસાર ઘટનાનો વીડિયો સોશિયલ મીડિયામાં વાયરલ થયો છે. ત્યારે રાજ્યમંત્રી વાસણ આહિરના મતવિસ્તારમાં આવેલી આ સરકારી શાળામાં જ બાળમજૂરીના કાયદાના ધજાગરા ઉડતા જોવા મળ્યા છે.
આ ઘટના અંગે મળતી વિગત અનુસાર ભુજના રેહા ગામની એક સરકારી પ્રાથમિક શાળામાં કેટલાક બાળકોને શૌચાલયની સાફ-સફાઇ કરાવવામાં આવી હતી આ ઘટના અંગેનો એક વિડીયો જાહેર માધ્યમોમાં વાયરલ થયા જોનારે શાળાના સંચાલક મંડળ સામે સવાલો ઉઠાવ્યા હતા.
ઉલ્લેખનીય છે કે એક તરફ રાજ્યસરકાર શાળા પ્રવેશોત્સવની શરૂઆત કરી છે અને રાજ્યભરની શાળામાં નવા સત્રમાં બાળકોને આવકારવામાં આવી રહ્યા છે ત્યારે ભુજના રેહા ગામની પ્રાથમિક શાળાના વિદ્યાર્થીઓ પાસે શાળા તંત્ર દ્વારા શૌચાલયની સાફ-સફાઇ હાથ ધરવામાં આવતા હોવાનો એક વીડિયો સોશિયલ મીડિયામાં ફરતો થયો હતો. તંત્ર દ્વારા એક તરફ બાળમજૂરી હટાવોની ઝૂંબેશ ચલાવવામાં આવી રહી છે અને બીજી તરફ પ્રાથમિક શાળાના વિદ્યાર્થીઓ સાફ-સફાઇ કરતા નજરે પડતા અનેક સવાલો ઉભા થયા હતા.
આપને જણાવી દઇએ કે તાજેતરમાં જ શાળાઓનું વેકેશન પૂર્ણ થતા શાળાઓમાં નવા સત્રની શરૂઆત થઇ છે રાજ્ય સરકાર દ્વારા પણ નવા વિદ્યાર્થીઓને આવકારવા માટે શાળા પ્રવેશોત્સવનું આયોજન કરવામાં આવ્યું છે. ત્યારે ભુજની એક શાળામાં કરાવાતી સાફ-સફાઇના દ્રશ્યો જાહેર માધ્યોમાં ફરતા શાળા તંત્ર પર લોકોએ ફિટકાર વરસાવ્યો હતો.