કચ્છમાં બે દિવસથી વરસી રહેલા વરસાદના કારણે અનેક નીચાણવાળા વિસ્તારોમાં પાણી ભરાયા છે. 24 કલાકમાં ભારે વરસાદના કારણે રણ પ્રદેશ કચ્છમાં જળબંબાકારની સ્થિતિ સર્જાઈ છે. ધોધમાર વરસાદને કારણે કચ્છ જળમગ્ન થઈ ગયું છે. કચ્છના નખત્રાણામાં 13 ઇંચ, રાપરમાં 9 ઈંચ અને અબડાસામાં 10 ઇંચ વરસાદ ખાબક્યો હતો.
કચ્છમાં વરસાદના પગલે ધોધ વહેતા થયા છે. નખત્રાણાનો રમણિય પાલરધુના ધોધ શરૂ થયો છે. છેલ્લા 36 કલાકમાં પડેલા 14 ઇંચ વરસાદથી ધોધ વહેતો થયો છે. જેને લઇ લોકો કુદરતી નજારો માણવા ઉમટી પહ્યા છે.
નખત્રાણા-નલિયાને જોડતા મુખ્ય માર્ગનું ધોવાણ
નખત્રાણામાં ભારે વરસાદ પડતા લોકો મુશ્કેલીમાં મૂકાયા છે. નખત્રાણા અને નલિયાને જોડતા મુખ્ય રોગનું ધોવાણ થયું છે. જેના કારણે સાત ગામ સંપર્ક વિહોણા બન્યા છે. રસ્તાનું ધોવાણ થતા જ ગ્રામજનોને ભારે હાલાકી ભોગવવાનો વારો આવ્યો છે. જોકે RNBના અધિકારીએ સ્થળ પર પહોંચી નિરીક્ષણ કર્યું હતું.
અનેક ગામોમાં પાણી ઘૂસ્યા
અબડાસામાં મૂશળધાર વરસાદથી કોઠાળામાં જળબંબાકારની સ્થિતિ સર્જાઇ છે. વરસાદના પગલે નદીઓ ગાંડીતૂર બની છે. નદીના પાણી કોઠાળા ગામમાં ઘૂસી ગયા છે. જળબંબાકારની સ્થિતિમાં માનપુરા વિસ્તાર પાણીમાં ગરકાવ થઇ ગયો છે. તો કોઠાળામાં બે દિવસથી વીજ પુરવઠો અને મોબાઇલ નેટવર્ક પણ ખોરવાયું છે. લોકોના ઘરમાં પાણી ઘૂસી ગયા છે. ગામમાં પાણી આવતા લોકોને સલામત સ્થળે ખસેડવામાં આવ્યા છે.
લખપતની જીવાદોરી જીવંત
ધોધમાર વરસાદ પડતા કચ્છના લખપત નજીક ગોધાતડ ડેમ ઓવરફ્લો થયો છે. લખપતની જીવાદોરી સમાન ગોધાતડ ડેમ ત્રણ વર્ષથી સુકો હતો અને હવે ઓવરફ્લો થતા ગામલોકોમાં ખુશીનો માહોલ સર્જાયો છે.
કચ્છના 10 ડેમો સંપૂર્ણ ભરાયા
કચ્છમાં મધ્યમ સિંચાઈના 10 ડેમો સંપૂર્ણ ભરાઈ ગયા છે. મધ્યમ સિંચાઈના ડેમોમાં 56 ટકા નવું પાણી આવ્યું છે. લખપતનો ગોધાતડ, સાન્ધ્રો ડેમ સંપૂર્ણ ભરાયો છે. નરા અને ગજણસર સહિત 4 ડેમ 100% ભરાઈ ગયા છે. અબડાસાના કંકાવટી, મથલ ડેમ 100% ભરાઈ ગયા છે. જંગડીયા, બેરાચીયા અને મીઠી સહિતના ડેમ 100% ભરાઈ ગયા છે. રાપરનો સુવઈ ડેમ 100 ટકા ભરાયો છે. માંડવીના ડોણ ડેમ તેમજ ભૂખી ડેમમાં 50%થી વધુ ભરાયો છે.
કયા ડેમ સંપૂર્ણ ભરાયા ?
ગોધાતડ
સાંધ્રો
નરા
ગજણસર
કંકાવટી
મથલ
જંગડીયા
બેરાચીયા
મીઠી
સુવઈ
ઝાડ પર ચડી ગયેલ યુવકને NDRFએ બચાવ્યો
અબડાસાનો મીઠી ડેમ થયો ઓવરફ્લો થયો છે. મીઠી ડેમ ઓવરફ્લો થતાં ખેતરોમાં પાણી ઘુસ્યા છે. ડેમના પાણી ભરાઈ જતા એક યુવક ફસાયો હતો. પાણીથી બચવા યુવકે ઝાડ પર આશરો લીધો હતો. ત્યારબાદ NDRFની ટીમે યુવકને રેસ્ક્યુ કરીને બચાવ્યો હતો.
નલિયા માર્ગ પર વિશાળ વૃક્ષ ધરાશાયી
કચ્છમાં વરસાદ સાથે ભારે પવન ફૂંકાઇ રહ્યો છે. નલિયા-દેશલપર માર્ગ પર ભારે પવન ફૂંકાઇ રહ્યા છે. જેથી નલિયા-દેશલપર માર્ગ પર વૃક્ષ ધરાશાયી થઇ ગયા છે. વિશાળ વૃક્ષ ધરાશાયી થતા એક માર્ગ બંધ કરી દેવાયો છે.
ભુજના હમીરસર તળાવમાં આવ્યા નવા નીર
ભુજના હમીરસર તળાવમાં નવા નીર આવ્યા છે. 2 વર્ષ બાદ હમીરસર તળાવમાં નવા નીર આવ્યા છે. ત્યારે પાણી આવતા હમીરસર તળાવ ખાતે લોકો ઉમટી પડ્યા છે. સૂકાભઠ હમીરસર તળાવમાં આજે નવા નીર આવતા લોકોમાં ખૂશી જોવા મળી હતી.
કચ્છમાં વરસાદના પગલે ટ્રેન વ્યવહાર ખોરવાયો
કચ્છમાં વરસાદના પગલે ટ્રેન વ્યવહાર ખોરવાઇ ગયો છે. ભચાઉના વોંધ પાસે રેલવે ટ્રેકનું ધોવાણ થયું છે. રેલવે ટ્રેકનું ધોવાણ થતા કચ્છનો ટ્રેન વ્યવહાર ખોરવાઇ ગયો છે. રેલવે તંત્ર દ્વારા યુદ્ધના ધોરણે કામગીરી હાથ ધરવામાં આવી છે.